މިދިޔަ ސީޒަންގައި ކްލަބު ވެލެންސިއާ އިން ފެނުނު ތަޖުރިބާކާރު މިޑްފީލްޑަރު މުހައްމަދު ޝައްފާޒް (ސައްޕޭ) ނިއު ރޭޑިއަންޓަށް ސޮއިކޮށްފި އެވެ.
ސައްޕޭ ވަނީ ނިއުގެ ފަރިތަކުރުންތަކުގައި ބައިވެރިވާން ފަށައިފަ އެވެ. އެކަމަކު އޭއެފްސީ ކަޕަށް ރަޖިސްޓްރީކޮށްފައިވާ ނިއުގެ ސްކޮޑްގައި ސައްޕޭގެ ނަން ނުހިމެނޭތީ، އޭއެފްސީ ކަޕްގައި އޭނާ އަށް ނުކުޅެވޭނެ އެވެ.
މޮޅު ޑިފެންސިވް މިޑްފީލްޑަރެއްގެ ގޮތުގައި ފާހަގަވެފައިވާ ސައްޕޭ ފުރަތަމަ ޑިވިޝަންގައި 2003 ވަނަ އަހަރު ވިދާލީ ކްލަބު ވެލެންސިއާ އިންނެވެ. ވެލެންސިއާގެ އިތުރުން ސައްޕޭ ވަނީ ވިކްޓަރީ އާއި ވީބީ އައްޑޫ އެފްސީ އަދި ބީޖީ ސްޕޯޓްސް އަށް ކުޅެފަ އެވެ.
މިދިޔަ ސީޒަންގައި ދިވެހި ލީގާއި ޕްރެޒިޑެންޓްސް ކަޕް ކާމިޔާބުކުރި ނިއު އިން ވަނީ އޭއެފްސީ ކަޕްގައި އިއްޔެ ލާއޮސްގެ ލާއޯ އެފްސީ އަތުން 2-1 އިން މޮޅުވެފަ އެވެ.
ނިއުގެ ކޯޗުކަމުން ފިންލެންޑްގެ މިކާ ލޮންސްޓްރޮމް ވަކިކޮށް، އެ ޓީމު ކޯޗަކަށް ހަމަޖައްސާފައިވާ ބޮސްނިއާގެ އަަލަޖިކްގެ އެ ޓީމާ ރަސްމީކޮށް ހަވާލުވާނީ މާދަމާ އެވެ.