ވަޒީފާގައި ވަރަށް ބުރަ އެވެ. ހެނދުނު ފަށާ ގޮތަށް އިރު އޮއްސޭއިރު ހަމަޖެހިލާނެ ވަގުތެއް ނުލިބެ އެވެ. އެހެންކަމުން ދުވާލު އެއްކޮށް ހޭދަކުރެވެނީ ބަނޑުހައިކަންމަތީގަ އެވެ. އެކަމުގެ ސަބަބުން މަސައްކަތަށް ބުރޫ އަރަ އެވެ. އެއް ކަމެއް ދެ ފަހަރު ނުވަތަ ތިން ފަހަރަށްވެސް ކުރަންޖެހޭ ފަހަރު އާދެ އެވެ. ރަނގަަށް ސަމާލުކަން ނުދެވުމުގެ ސަބަބުންނެވެ. އެހެން ނަމަވެސް އެއްޗެއް ކާލަން އެންމެ ފަސް މިނެޓު ވެސް ނުލިބެ އެވެ. އެހާ ބުރަކޮށް އުޅޭއިރުވެސް މަސައްކަތްތައް އަބަދުވެސް އޮންނަނީ ފުނި ޖެހިފަ އެވެ.
މިގޮތަށް ބިޒީކޮށް އުޅޭ މީހަކަށް ނިކަން ރަނގަޅު ޑައިޓެއް ކިޔައިދީފާނަމެވެ. މި ކަމަށް މާގިނަ ވަގުތެއް ހޭދައެއް ނުވާނެ އެވެ. މަސައްކަތުގައި އުޅެމުންވެސް ކެވޭނެ އެވެ. ހަމައެކަނި ޖެހޭނީ ހަފްތާއެއް ނުވަތަ ދެ ހަފްތާއިން އެއް ފަހަރު ބާޒާރުކޮށްލާށެވެ. އެކަމަށް ކޮންމެސް ގޮތަކުން ވަގުތު ހޯދާށެވެ.
އެލްމަންޑު، އޮފީހަށްދާ މަގުމަތީގައި ވެސް ކެވޭނެ
އެލްމަންޑަކީ އޭގައި ގިނަ އަދަދަކަށް ކެލްޝިއަމް ހިމެނޭ އެއްޗެކެވެ. އެހެން ކަމުން ކަށްޓަށް އިތުރު ވަރުގަދަ ކަމެއްވެސް ގެނެސްދެ އެވެ. މީގެ އިތުރުން ގިނަ އަދަދަކަށް ވިޓަމިން އީ ހިމެނޭތީ ހަންގަނޑުގެ ދުޅަހެޔޮކަމާއި ރީތިކަން އިތުރުކޮށްދެ އެވެ. މި ވަރަކުން ނިމުނީ އެއް ނޫނެވެ. އަލްމަންޑުގައި ހުންނަ ފްލެވަނޮއިޑް އޭ މިކިޔާ މާއްދާގެ ސަބަބުން ހިތުގެ ދުޅަހެޔޮކަން ވެސް އިތުރުކޮށްދެ އެވެ.
ޕްލެއިން ގްރީކް ޔޯގަޓަކީވެސް ވަރަށް ރަނގަޅު އެއްޗެކެވެ. އޭގައި ކެލްޝިއަމް، ޕޮޓޭޝިއަމް، ޕްރޮޓީން، ޒިންކް، ވިޓަމިން ބީ ހައެއް އަދި ވިޓަމިން ބީ 12 ހިމެނެ އެވެ. މި ހުރިހާ މާއްދާތަކަކީ ވެސް ހަށިގަނޑަށް ވަރަށް މުހިންމު މާއްދާތަކެކެވެ. ގްރީކް ޔޯގަޓުގައި ހުންނަ ކްރީމްގައި ޕްރޯބަޔޮޓިކް ކަލްޗާސްގެ ސަބަބުން ލެކްޓޯސްގެ މިންވަރު ދަށްކޮށްދެ އެވެ. އަދި މި ޔޯގަޓުގައި އާދައިގެ ޔޯގަޓުގައި ހުންނަ ވަރަށްވުރެ ދެ ގުނަ އިތުރަށް ޕްރޮޓީން ހިމެނެ އެވެ.
ދޮންކޭލާއި ކިވީވެސް އެންމެ ރަނގަޅުވާނެ
ދޮންކޭލަކީ ކޮންމެ ދުވަހެއްގެ ޑައިޓުގައިވެސް ހިމަނަން ޖެހޭ މޭވާ އެކެވެ. އަދި ހާއްސަކޮށް ބުރަކޮށް މަސައްކަތް ކުރާ މީހެއް ނަމަ އެވެ. ދޮންކޭލަކީ ހަމައެކަނި ބަރުދަން ލުއި ކުރާ ޑައިޓުގެ ތެރޭގައި ހިމަނައިގެން ފުއްދާލެވޭ ވަރުގެ މޭވާއެއް ނޫނެވެ. އެއަށް ވުރެ ބޮޑަށް ހަށިގަނޑަށް ބޭނުންވާ ގިނަ މާއްދާތަކެއް އޭގައި އެކުލެވެ އެވެ. ދޮން ކޭލަކީ ގޮހޮރަށް ވެސް ފަރުވާ އެކެވެ. ގޮހޮރު ސާފުކޮށް ބެހެއްޓުމަށް ކޮންމެހެން ވެސް ދޮންކެޔޮ ކާންވާނެ އެވެ. މީގެ އިތުރުން ހިތުގެ ދުޅަހެޔޮކަމާއި ލޮލުގެ ފެނުމަށް ވެސް ދޮން ކޭލަކީ އެއް ވަނައިގެ ފަރުވާ އެކެވެ.
ކިވީއަކީ ވެސް ކޮންމެހެން ޑައިޓުގައި ހިމަނަންޖެހޭ މޭވާ އެކެވެ. ސަބަބުތައް ބައިވަރެވެ. ކުރުގޮތަކަށް ބަލާނަމަ ހަށިގަނޑަށް މުހިންމު 20 މާއްދާއެއް އޭގައި ހިމެނެ އެވެ. އަދި ކިވީ އަކީ އޮރެންޖުން ހަށިގަނޑަށް ލިބޭ ފައިދާތައް ވެސް ހަށިގަނޑަށް ފޯރުކޮށްދޭ މޭވާ އެކެވެ. ކިވީގައި ހިމެނޭބައެއް މާއްދާ ތަކުގެ ތެރޭގައި ވިޓަމިން އޭ، ކޭ، އީ އަދި ބީ، ޕޮޓޭޝިއަމް، ކޮޕާ، ފޮލޭޓް އަދި ފައިބާ ފާހަގަކޮށްލެވެ އެވެ.