މެލޭޝިއާ ސުޕަ ލީގުގައި ރޭ ރަށުން ބޭރުގައި ޕެރަކް އަތުން 3-1 އިން ޕީޑީއާރްއެމް މޮޅުވި މެޗުގައި، ޕީޑީއާރްއެމް އަށް ކުޅެމުންދާ ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) އަށް އަނިޔާވެއްޖެ އެވެ.
މި މެޗުގައި މޮޅު ކުޅުމެއް ދައްކައި، ޕީޑީއާރްއެމް އިން ޖެހި ދެ ލަނޑުގައި މުހިންމު ދައުރެއް އަދާކުރި ދަގަނޑޭ އަށް ކުރިމަތިވި ހެމްސްޓްރިންގް އިންޖަރީއަކާ ގުޅިގެން މެޗުގެ 81 ވަނަ މިނިޓުގައި ދަގަނޑޭ ވަނީ ބާލައިފަ އެވެ.
ދަގަނޑޭ މިއަދު ބުނީ އޭނާ އަށް ލިބުނު އަނިޔާއާ ގުޅޭގޮތުން އިތުުރު އެއްޗެއް ބުނަން އެނގޭނީ ޑޮކްޓަރަށް ދެއްކުމަށް ފަހު ކަމަށެވެ.
"މި ވަގުތު ބުނާކަށް ނޭނގޭ ކުޅެވޭނެތޯ ނުކުޅެވޭނެތޯ. ޑޮކްޓަރަށް ދެއްކީމަ އެނގޭނީ ވަކި އެއްެޗެއް ބުނަން،" ދަގަނޑޭ ބުންޏެވެ. "އިރާދަކުރެއްވިއްޔާ މިއީ ސީރިއަސް ކަމަކަށް ނުވާނެ. އަދި ވީހާ ވެސް އަވަހަކަށް ކުޅެން ނުކުމެވޭނެ ކަމަށް އުންމީދުކުރަން."
އެހެން ނަމަވެސް މި އަނިޔާއާ ގުޅިގެން އެފްއޭ ކަޕްގެ ގަދަ 16ގެ ބުރުގައި މި މަހުގެ 17 ވަަނަ ދުވަހު ސައިމް ޑާބީއާ ދެކޮޅަށް ޕީޑީއާރްއެމް ކުޅޭ މެޗުގައި ދަގަނޑޭ އަށް ކުޅެވޭނެ ކަމާމެދު ވަނީ ސުވާލު އުފެދިފަ އެވެ.
މި ސީޒަންގައި ތިން ލަނޑު ޖަހައި، ގިނަ މެޗުތަކުގައި ޕީޑީއާރްއެމް އަށް ލަނޑު ޖެހުުުގެ ފުރުސަތުތައް ތަނަވަސްކޮށްދީފައިވާ ދަގަނޑޭ އަކީ ޕީޑީއާރްއެމްގެ އެންމެ މުހިންމު އެއް ކުޅުންތެރިޔާ އެވެ. ދަގަނޑޭ އަށް އަނިޔާވުމަކީ އެ ޓީމުން ފިކުރުބޮޑުވާނެ ކަމެކެވެ.
ޕެރަކް އަތުން ރަށުން ބޭރުގައި މޮޅުވެ، ޕީޑީއާރްއެމް މި ވަގުތު އޮތީ ސުޕަ ލީގު ތާވަލްގެ ދެވަނައިގަ އެެވެ.