ރައީސް އަބްދުﷲ ޔާމީންގެ ރިޔާސީ ކެމްޕޭނުގައި އެ މަނިކުފާނުގެ އަނބިކަނބަލުން، ފަސްޓް ލޭޑީ، ފާތުމަތު އިބްރާހިމް އިސްވެ ފައްޓަވާފައިވާ ހަރަކާތްތަކުގެ ހާއްސަ ބައްދަލުވުމެއް މާދަމާ ރޭ ކުރިޔަށް ގެންދަން ހަމަޖައްސައިފި އެވެ. ކެމްޕޭނުގެ މި ހަރަކާތް އޮންނާނީ އަލިމަސް ކާނިވާ ސަރަހައްދުގަ އެވެ.
މި ހަރަކާތާބެހޭ ގޮތުން މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ މިރޭ ވިދާޅުވީ މާދަމާ ރޭގެ އެ ހަރަކާތަކީ އަށް އަތޮޅެއްގެ ރައްޔިތުންނަށް ހާއްސަކޮށްގެން ކުރިއަށް ގެންދާ ހަރަކާތެއް ކަމަށެވެ. އެއީ ރ. އަތޮޅާއި މާލެ އަތޮޅާއި ވ. އަތޮޅާއި މ. އަތޮޅާއި އަދި ފ. އަތޮޅާއި ދ. އަތޮޅާއި ތ. އަތޮޅާއި ފުވައްމުލަކު ސިޓީ އެވެ.
އޭނާ ވިދާޅުވީ މާދަމާ ރޭގެ ހަރަކާތުގައި އެ އަތޮޅުތަކުގެ ރައްޔިތުންގެ ތެރެއިން މާލެ، ހުޅުމާލެ އަދި ވިލިމާލޭގައި ދިރިއުޅޭ ރައްޔިތުންނާ ފަސްޓް ލޭޑީ، ފާތުމަތު އިބްރާހިމް ބައްދަލު ކުރައްވާ އެ ފަރާތްކާއެކު ވަގުތު ހޭދަ ކުރައްވާ މައުލޫމާތު އޮޅުން ފިލުއްވާނެ ކަމަށެވެ.
އަދި ވިދާޅުވީ އެ ރައްޔިތުންގެ ދިރިއުޅުމުގެ ފެންވަރާއި އެ ރަށްތަކުގެ ހާލަތާއި އެ އަތޮޅުތަކުގެ ހާލަތު ބައްލަވާނެ ކަމަށާއި ރައްޔިތުންގެ ދެކެން ބޭނުންވާ ތަސައްވުރުވެސް އެކަމަނާ އޮޅުން ފިލުއްވާނެ ކަމަށެވެ.
"މިއީ ވަރަށް ތަފާތު ހަރަކާތެއް. މެޑަމް ފާތުން [މާދަމާ ރޭ އެ އަތޮޅުތަކުގެ] ރައްޔިތުންގެ ކަންކަން ވަރަށް ގާތުން ބައްލަވާނެ. އެހެން ނަމަވެސް އާންމުކޮށް ހުރިހާ ބޭފުޅުންނަށް ވެސް މި ހަރަކާތުގައި ބައިވެރިވެވޭނެ،" މުއާޒް ވިދާޅުވި އެވެ. އޭނާ އިތުރަށް ވިދާޅުވީ މިފަދަ ތަފާތު ހަރަކާތްތައް ކުރިއަށް އޮތްތަނުގައި ވެސް ކުރިއަށް ގެންދާނެ ކަމަށެެ.
ރައީސް ޔާމީންގެ ކެމްޕޭން ހަރަކާތްތެއް މިދިޔަ ހުކުރު ދުވަހުގެ ރޭ ހުޅުމާލޭގައި ފަސްޓް ލޭޑީ އިސްވެ ވަނީ "ފެށުން" ގެ ނަމުގައި ވެސް ބާއްވާފަ އެވެ.
