އިސްލާމް ދީނުގެ ކަންކަން ދިރުވައި ދަމަހައްޓަން ރައީސް އަބްދުﷲ ޔާމީންގެ ސަރުކާރުން އެއްވެސް ހުރަހެއް ކުރިމަތި ކުރުވާފައި ނުވާ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ސަރުކާރާމެދު ހިޔާލު ތަފާތުވެ ސަރުކާރަށް ދިން އެއްބާރުލުން ގެންގޮސްފައިވާ އަދާލަތު ޕާޓީގެ ވެސް އިސް މަގާމެއްގައި ހުންނެވި ދީނީ އިލުމުވެރިޔާ، އަދި މިނިސްޓަރު ވިދާޅުވީ ދިނީ ކަންކަން ދިރުވައި އާލާ ކުރުމަށް ރައީސް އަބްދުﷲ ޔާމީންގެ ސަރުކާރުން މިހާތަނަށް އެއްވެސް ހުރަހެއް ކުރިމަތި ކުރުވާފައި ނުވާ ކަމަށާއި އަރަބި އިސްލާމީ ތައުލީމް ފުޅާ ކުރުމަށާއު ޅަދަރިންގެ އަގީދާ ހރުދަނާ ކުރަން ގިނަ މަސައްކަތްތަކެއް ވެސް ސަރުކާރުން ކުރަމުން އަންނަ ކަމަށެވެ.
މިނިސްޓަރު ވިދާޅުވީ އެންމެނާމެދު އިންސާފުވެރިވާންޖެހޭ ފަދައިން އިންސާފަށް ގޮވާލާ ފާރާތްތައް ވެސް އިންސާފުވެރި ބަހެއް ނޫނީ ބުނެގެން ނުވާނެ ކަމަށެވެ.
ފޭސްބުކް މެދުވެރިކޮށް މިނިސްޓަރު މިއަދު ވިދާޅުވީ ދީނީ އިލްމުވެރިންގެ އެއްބާރުލުން ސަރުކާރުގެ މުއައްސަސާތަކަށް ބޭނުންވާ ކަމަށައި އެފަދަ އިލްމުވެރިންގެ ފަރާތްޕުޅުން ހެޔޮގޮތުގައިދޭ އިރުޝާދުތައް ސަރުކާރުން ވެސް ބަލައިގަންނާނެ ކަމަށެވެ.
އެމަނިކުފާނު މިމޭރުމުން ވާހަކަފުޅު ދެއްކެވި އިރު އެމަނިކުފާނު ނިސްބަތްވެ ވަޑައިގަންނަވާ އަދާލަތުގެ މަޝްވަރާ މަޖިލީހުން ރޭ އިގްރާރުވެފައި ވަނީ ސަރުކާރުގެ އަނިޔާވެރިކަން ބޮޑުވެ ގާނޫނުތަކާއި ހިލާފު އަމަލުތައް އާންމުކޮށްފައިވާތީ ހުރިހާ ގޮތަކުން އެކަމާ ދެކޮޅަށް މަސައްކަތް ކުރުމަށެވެ.
އަދި ބުނެފައި ވަނީ ގާނޫނު އަސާސީން ލިބިދޭ ހައްގުތައް ހަނިކޮށް ބާރުތައް ވަކިކުރި ވެރިކަމުގެ ނިޒާމު ރޫޅާލާފައިވާ ކަމަށާއި ޝަރުއީ ނިޒާމުގެ މައްޗަށް ނުފޫޒުތައް ފޯރުވައި ޝަރީއަތުގެ ނިންމުންތަކުގެ އިންސާފުވެރިކަމާމެދު ސުވާލު އުފެދި އަދުލުވެރިކަމާއި ހަަމަހަމަކަން ވެސް ގެއްލެމުންދާ ކަމަށެވެ. ވެރިކަން ހިންގުމުގެ ބާރުގެ ތެރެއަށް ދައުލަތުގެ އެންމެހާ ބާރުތައް ޖަމާކުރުމުގެ ސަބަބުން ގާނޫނު އަސާސީގެ ބާރު ކެނޑެމުންދާ ކަމަށް ވެސް ބުނެފައި ވެއެވެ.
" ދިވެހި ދައުލަތް ހިންގުމުގެ މަތިވެރި ޒިންމާ އަދާކުރުމަށް ޢާލަމްތަކުގެވެރި ﷲ ގަންދީ ޙުވާކޮށްގެންތިބި ރައްޔިތުންގެ ޚާދިމުންގެ އަނިޔާވެރިކަން ރައްޔިތުންގެ މައްޗަށް އާންމުވެ، މީސްމީހުންގެ މުދާ ނުޙައްޤުން ފިރުކައިގަނެ، ރައްޔިތުން ޙިމާޔަތަށްޓަކައި އެކަނި ވުޖޫދުގައި އޮންނަ ޤައުމުގެ ސަލާމަތީ ބާރުތަކާއި ރައްޔިތުންގެ މެދުގައި ޢަދުލުވެރިކަން ޤާއިމްކުރުމަށްޓަކައި އުފައްދާފައިހުރި މުއައްސަސާތަކުގެ ބޭނުން ނަހަމަގޮތުގައި ހިފަމުންދާތީ އާއި ދިވެހިރާއްޖެއިން ނެތެމުންދިޔަ އަނިޔާވެރި ވެރިކަމުގެ ވައްޓަފާޅި އަލުން އަނބުރާ އިޔާދަވަމުންއަންނަކަން ޢަދާލަތު ޕާޓީގެ މަޝްވަރާ މަޖިލީހަށް ކަށަވްރުވެއްޖެ ހިނދު، މި އެންމެހައި އަނިޔާވެރި ކަންކަމާދެކޮޅަށް، އިސްލާމީ ޝަރީޢަތާއި ދިވެހިރާއްޖޭގެ ޤާނޫނު އަސާސީ އާއި ޤާނޫނުތަކާ އަދި ޢަދާލަތު ޕާޓީގެ ދުސްތޫރާއި އުސޫލުތަކުން ބާރުލިބިގެން ކުރެވެންހުރި އެންމެހައި ކަންކަން ކުރުމަށް ޢަދާލަތު ޕާޓީގެ މަޝްވަރާ މަޖިލީހުން އިޤުރާރުވަމެވެ،" އަދާލަތުގެ އިގްރާރުގައި ވެއެވެ.