ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ މައިލޯ ކްލަބް މޯލްޑިވްސް ފުޓްސަލް ކަަޕް ރޭ ފަށައިފި އެވެ.
މާފަންނު ސްޓޭޑިއަމްގައި ކުރިއަށްދާ ކްލަބް މޯލްޑިވްސް ފުޓްސަލް ކަޕް ހުޅުވުމުގެ ގޮތުން ރޭ ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އަބްދުﷲ ޔާމީނާއި އެ މަނިކުފާނުގެ އަނބިކަނބަލުން ފާތިމަތު އިބްރާހިމެވެ. މި ރަސްމިއްޔާތުގައި ކުޅިވަރާ ބެހޭ ވަޒީރު މުހައްމަދު މަލީހު ޖަމާލް އަދި އެފްއޭއެމްގެ ނޯމަލައިޒޭޝަން ކޮމެޓީގެ ޗެއާމަން މުހައްމަދު ޝަވީދު ވެސް ބައިވެރިވެވަޑައިތެވެ.
މި މުބާރާތުގެ ހުޅުވުމުގެ ރަސްމިއްޔާތަށް ފަހު މުބާރާތުގެ ފިރިހެން ބައިގައި ކުޅުނު ފުރަތަމަ މެޗުގައި ފިއުލް ސަޕްލައި މޯލްޑިވްސް (އެފްއެސްއެމް) އަތުން ފެނަކަ މޮޅުވީ 2-1 އިންނެވެ. އަދި 18/30 ވިމެންްސް ފުޓްސަލް ފިއެސްޓާ ނުވަތަ މި މުބާރާތުގެ އަންހެނުންގެ ބައިގައި ކުޅުނު ފުރަތަމަ މެޗުގައި ދިރާގު ގާލްސް އަތުން ދިވެހި ސިފައިންގެ ކްލަބް މޮޅުވީ 11-0 އިންނެވެ.
ސަރުކާރު އޮފީސްތަކާ ކުންފުނިތަކަށް ހުޅުވާލައިގެން ބާއްވާ މި މުބާރާތުގައި ފިރިހެން ބައިގައި މިއަދާއި މިރޭ ހަތް މެޗު ކުޅުމަށް ވަނީ ހަމަޖެހިފަ އެވެ. އަދި އަންހެން ބައިގައި ދެ މެޗު ވަނީ މިއަދު ކުޅުމަށް ހަމަޖެހިފަ އެވެ.
ސަރުކާރު އޮފީސްތަކާއި ކުންފުނިތަކަށް ހުޅުވާލައިގެން 2005 ވަނަ އަހަރުން ފެށިގެން ބާއްވަމުން އަންނަ ކްލަބު މޯލްޑިވްސް ކަޕްގެ ފިރިހެން ބައިގައި މި އަހަރު ޖުމްލަ 36 ޓީމު ވާދަކުރެ އެވެ. އަންހެން ބައިގައި ޖުމްލަ 12 ޓީމު ވާދަކުރެ އެވެ.