ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޓްރެވަލް ޕާޓްނަރަކަށް ގައުމީ އެއާލައިން މޯލްޑިވިއަން ހަމަޖައްސައި، އެއްބަސްވުމުގައި މިއަދު ސޮއިކޮށްފި އެވެ.
އެފްއޭއެމް ހައުސްގައި މިއަދު އޮތް ރަސްމިއްޔާތެއްގައި އެފްއޭއެމްގެ ފަރާތުން އެއްބަސްވުމުގައި ސޮއިކުރެއްވީ ޖެނެރަލް ސެކްރެޓަރީ ބައްސާމް އަދީލް ޖަލީލެވެ. މޯލްޑިވިއަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުލް ހާރިސް އެވެ. މިއީ 2016 ވަނަ އަހަރުގެ ނިޔަލަށް ހަދައިފައިވާ އެއްބަސްވުމެކެވެ.
މި އެއްބަސްވުމުގެ ދަށުން މޯލްޑިވިއަން އިން އެފްއޭއެމް އަށް ޑޮމެސްޓިކް ދަތަރުތަކަށް 30 ޓިކެޓު ހިލޭ ދޭނެ އެވެ. މީގެ އިތުރުން ގައުމީ ޓީމުތަކާއި އެފްއޭއެމްގެ އެހެން ބޭނުންތަކަށް ރާއްޖޭން ބޭރަށް ދަތުރުތަކަށް ޓިކެޓާއި އެކޮމަޑޭޝަން އަދި ވިސާގެ ކަންތައްތައް ހަމަޖައްސައިދިނުމުގައި މޯލްޑިވިއަން އިން އެހީތެރިވެދޭނެ އެވެ.
އެފްއޭއެމްގެ ޖެނެރަލް ސެކްރެޓަރީ ބައްސާމް ވިދާޅުވީ މޯލްޑިވިއަން ޓްރެވަލް ޕާޓްނަރަކަށް ހަމަޖެއްސުމަކީ އެފްއޭއެމް އަށް ލިބޭ ވަރަށް ބޮޑު ލުއިކަމެއް ކަމަށެވެ.
"މިއީ އެފްއޭއެމް އަށް ލިބޭ ވަރަށް ބޮޑު ފަސޭހައެއް. ޑޮމެސްޓިކް 30 ޓިކެޓަށް ބެލިޔަސް ވަރަށް ބޮޑު ހަރަދެއް ސަލާމަތްވާނެ. އަނެއްކާ ރާއްޖޭން ބޭރަށް ކުރާ ދަތުރުތަކުގައި ވެސް އެންމެ އަގުހެޔޮ ފެއާ އެ ބޭފުޅުން ދޭނީ. އެކޮމެޑޭޝަންގައި އެގޮތަށް ހަމަޖައްސައިދޭނީ،" ބައްސާމް ވިދާޅުވި އެވެ.
ހާރިސް ވިދާޅުވީ މި އެއްބަސްވުމަކީ މާލީ ފައިދާ އަށްވުރެ ބޮޑަށް، ފުޓްބޯޅަ އަށް އެހީތެރިވެދިނުމުގެ ނިޔަތުގައި އެ ކުންފުނިން ހެދި އެއްބަސްވުމެއް ކަމަށެވެ.
"ކޯމާޝަލް ކޮންޓުރެކްޓަށްވުރެ ބޮޑަށް އަޅުގަނޑުމެން ބޮޑަށް ވިސްނަނީ ފުޓްބޯޅަ އަށް ދެވޭނެ އެހީތެރިކަމަކަށް. އެހެންވީމަ ކޮންމެހެން މާބޮޑު އަގުތަކެއް ލައިގެން ކުރާކަށް ބޭނުމެއް ނޫން އަޅުގަނޑުމެން ބޭނުންވަނީ،" ހާރިސް ވިދާޅުވި އެވެ.