މާޒިޔާ ސްޕޯޓްސް އެންޑް ރެކްރިއޭޝަންގެ ކުރީގެ ފޯވަޑް ރިސްޓޭ ނައުމޯފްގެ ދެ ލަނޑާއެކު، އޭއެފްސީ ކަޕްގެ ގުރޫޕް އެޗްގައި މިއަދު ނިއު ރޭޑިއަންޓް އަތުން 3-0 އިން މިޔަންމާގެ އަޔެޔަވާދީ ޔުނައިޓެޑްް ރަށުން ބޭރުގައި މޮޅުވެއްޖެ އެވެ.
ގުރޫޕްގައި ކުޅުނު ފުރަަތަމަ ދެ މެޗުގައި ޕޮއިންޓަކާއެކު ފުއްދާލަަން ޖެހުނު އަޔެޔަވާދީ އިން ލީޑު ނެގީ މެޗުގެ 35 ވަނަ މިނިޓުގައި ބްރެޒިލްގެ ފޯވަޑް އެޑިސަން ފޮންސެކާ ޖެހި ލަނޑުންނެވެ. ކޯނަރަކުން އަޔެޔަވާދީގެ ކުޅުންތެރިއެއް ނިއުގެ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ، މެސެޑޯނިއާގެ ރިސްޓޭ ބޮލުން ގޯލު ކުރިމައްޗަށް ފޮނުވާލުމުން ފޮންސެކާ ވަނީ ބޮލުން ގޯލަށް ބޯޅަ އަމާޒުކޮށްލައިފަ އެވެ.
މެޗުގެ 68 ވަނަ މިނިޓުގައި ނިއުގެ އިންގްލެންޑް ފޯވަޑް ޑޭވިޑް މޯލީ އަށް ވަނީ މެޗުގެ ނަތީޖާ އެއްވަރުކުރަން ރަނުގެ ފުރުސަތެއް ލިބިފަ އެވެ. މުހައްމަދު ރަޝީދު (ހޮކޭ) އަޔެޔަވާދީގެ ޕެނަލްޓީ އޭރިޔާ ތެރެއަށް ތިރިތިރިން ހުރަސްކޮށްލި ބޯޅަ އޭރިޔާ ތެރޭގައި ހުސްކޮށް ހުރި މޯލީ އަށް ލިބުނު ނަމަވެސް، އޭނާ ފޮނުވާލި ޝޮޓް ގޯލަށް އަމާޒެއްނުވި އެވެ.
އަދި އޭގެ ފަހުން ޕެނަލްޓީ އޭރިޔާ ތެރެއިން މޯލީ ބޮލުން ފޮނުވާލި ބޯޅައެއް އަމާޒުވީ ގޯލުގެ ދަނޑިއަށެވެ.
ނިއު އަށް ލިބުނު ފުރުސަތުތައް ބޭކާރުކޮށްލުމުގެ ނަތީޖާއަކަށްވީ 86 ވަނަ މިނިޓުގައި ރިސްޓޭ އަޔެޔަވާދީގެ ދެވަނަ ލަނޑު ޖަހައި، އެ ޓީމަށް ތިން ޕޮއިންޓް ޔަގީންކޮށްދިނުމެވެ. މިދިޔަ އަހަރުގެ ދިވެހި ލީގުގައި ވެސް ނިއު ކޮޅަށް ލަނޑު ޖެހި ރިސްޓޭ ވަނީ ޕެނަލްޓީ އޭރިޔާ ތެރެއިން ލިބުނު ބޯޅަ ތިރިތިރިން ގޯލަށް އަމާޒުކޮށްލައިފަ އެވެ.
އަޔެޔަވާދީގެ ތިން ވަނަ ލަނޑު ރިސްޓޭ ޖެހީ މެޗުގެ އިތުރު ވަގުތުގަ އެވެ. ނިއު ދެ ޑިފެންޑަރުން ކައިރިން ދެމިގަތުމަށް ފަހު، ބޯޅަ ހިފައިގެން ޕެނަލްޓީ އޭރިޔާ ތެރެއަށް ވަދެ، ރިސްޓޭ ގޯލަށް ބޯޅަ ވައްދާލީ ނިއުގެ އުޒްބެކިސްތާން ގޯލްކީޕަރު އަލިޝާ އަހުމަދޯފް ކައިިރިން ވެސް ނައްޓާލުމަށް ފަހު އެވެ.
އަޔެޔަވާދީ ގުރޫޕް އެޗްގެ ދެވަނައިގައި އޮތީ ފަސް ޕޮއިންޓާއެކު އެވެ. އެއްވަނައިގައި ހަތް ޕޮއިންޓާއެކު އޮތީ އިންޑޮނޭޝިއާގެ ޕެރްސިބް ބަންޑުންގެވެ. ޕެރްސިބް ވަނީ މި ގުރޫޕްގައި މިއަދު ކުޅުނު މެޗުގައި ލާއޮސްގެ ލާއޯ އެފްސީ އަތުން 1-0 އިން މޮޅުވެފަ އެވެ. ނިއު އޮތީ ތިން ޕޮއިންޓާއެކު އެވެ. ގުރޫޕްގެ ފުލުގައި އޮތީ އެއް ޕޮއިންޓާއެކު އޮތް ލާއޯ އެފްސީ އެވެ.
ނިއުގެ ކޯޗުކަމާ މިދިޔަ ހަފުތާގައި ހަވާލުވި ބޮސްނިއާގެ އާމިރު އަލަޖިކްގެ އިރުޝާދުގެ ދަށުން ކުުޅުނު ފުރަތަމަ މެޗުގައި ނިކުތް ނަތީޖާގެ އިތުރުން، ކުޅުންތެރިންގެ "ފިޓްނަސްް"އާމެދު ހިތްހަމަނުޖެހޭ ކަމަށް މެޗަށް ފަހު އާމިރު ބުންޏެވެ.
"މި މެޗުގައި ފެނިގެންދިޔަ ކުޅުންތެރިންގެ ފިޓްނަސް ހުރީ 60 މިނިޓަށްކަން. ފަހަރެއްގައި ރާއްޖޭގެ މުބާރާތްތަކުގައި މި ފިޓްނަސް ލެވެލްގައި ކުޅެވިދާނެ. އެކަމަކު މި ކަހަލަ އިންޓަނޭޝަނަލް މުބާރާތެއްގައި މިއީ ވާނެކަމެއް ނޫން،" އާމިރު ބުންޏެވެ. "ނަސީބު ވެސް ދެރައީ. ލިބުނު ފުރުސަތެއް ބޭނުންކުރެވުނު ނަަމަ، ނަތީޖާ ތަފާތު ވެދާނެ. ތިން ލަނޑުގެ ތަފާތަކުން ބަލިވީމަ، އެއީ ގަބޫލްކުރަން ދަތި ނަތީޖާއެއް."
އަޔެޔަވާދީގެ ކޯޗު މެސެޑޯނިއާގެ މަރްޖާން ސެކުލޮވްސްކީ ބުނީ މެޗުގެ ނަތީޖާ އާއި ކުޅުންތެރިން މެޗުގައި ދެއްކި ކުޅުމާމެދު ހިތްހަމަޖެހޭ ކަމަށެވެ. އަދި ރިސްޓޭ އަށް މަރްޖާން ވަނީ ތައުރީފްކޮށްފަ އެވެ.
"މި ދަނޑުގައި މޮޅުވުމަކީ ފަސޭހަކަމެއް ނޫން. ކުޅުންތެރިން ދެއްކި ކުޅުމާމެދު ވަރަށް ހިތްހަމަޖެހޭ،" މަރްޖާން ބުންޏެވެ. "ރިސްޓޭ އޭނާގެ ފެންވަރު ދައްކާލައިފި. އެކަމަކު ނިއު ރޭޑިއަންޓް ކޮޅަށް ލަނޑު ޖެހުމަކީ ރިސްޓޭ އަށް އާކަމެއް ނޫން. މިދިޔަ އަހަރު ރާއްޖޭގެ ލީގުގައި ވެސް ނިއު ރޭޑިއަންޓް ކޮޅަށް ރިސްޓޭ ލަނޑު ޖެހިކަން އެނގިފައި އޮތީ."