މިދިޔަ އަހަރު ބޮޑު މަގުބޫލު ކަމެއް ލިބުނު ބޮހެމިއަން ނުވަތަ ބޮހޯ ސްޓައިލްގެ ހެދުންތައް ދޫކޮށްލުމަށްފަހު މިއަހަރު ފެށިގެން އައީ ބެލް ސްލީވް ނުވަތަ އަތުކުރި ފުޅާ ޓޮޕްތަކުންނެވެ. މިއީ މިހާރު ކޮންމެ ދިމާލަކުން ވެސް އެންމެ ގިނައިން ފެންނަ އަންހެން ކުދިންގެ މެދުގައި އެންމެ މަގުބޫލް އެއް ސްޓައިލެވެ.
އެންމެ ޒަމާނީ ފަހުގެ ފެޝަންތަކަށް ލޯބިކުރާ ދިވެހި އަންހެން ކުދިންގެ މެދުގައި މިއީ އެންމެ ފުރަތަމަ ޗޮއިސް އެވެ. މިއީ މިހާރު ކައިވެނި ޕާޓީއަކަށް ދިޔަ ނަމަވެސް ނުވަތަ އެހެން ތަނަކަށް ދިޔަ ނަމަވެސް އެންމެ ގިނައިން ހެދުން އަޅާ ވައްޓަފާޅި އަކީ މިއީ އެވެ.
ބުރުގާ އެޅި އަންހެންކުދިންގެ މެދުގައި ވެސް އެންމެ މަގުބޫލީ މިހާރު އަތްކުރި ފުޅާ ޓޮޕެވެ. މިއީ ވެސް ރީތި ގޮތެކެވެ.
މީގެއިތުރުން ވެސް އަތްކުރި ފުޅާޓޮޕް ހާއްސަވަނީ ހަމައެކަނި ޕާޓީތަކާއި އާންމުކޮށް އުޅޭއިރު ލާކަށް ނޫނެވެ. އޮފީސް މާހައުލުގައި ވެސް މި ސްޓައިލް މިފަހަކަށް އައިސް ކޮންމެވެސް ވަރަކަށް ފެނެ އެވެ.
އަށްޑިހައިގެ އަހަރު ތަކުގައި އެންމެ ގަދަޔަށް ހިނގި ހެދުން އެޅުމުގެ ވަށްޓަފާޅި ޒަމާނީ ވެގެން މިހާރު މި އޮތީ އެނބުރި އައިސްފަ އެވެ.
މީގެއިތުރުން ވެސް އޮފް ޝޯލްޑާ ޓޮޕަކީ ވެސް މިއަހަރުގެ ފެށިގެން އައިރު ވަރަށް ވައިގަ ހިފައިގެން އުޅޭ އާ ގޮތެކެވެ. ހާއްސަކޮށް މިދިޔަ އަހަރުގެ ފަހުކޮޅުން ފެށިގެން އޮފްޝޯލްޑާގެ ޓޮޕްތައް ފެންނަލެއް ގިނަކަން ފާހަގަ ކުރެވެ އެވެ.
- ފޮޓޯ- އަހުމަދު ޝުރާއު/އަވަސް
- ރީޓަޗް- އަހުމަދު ސައްފާހް/އަވަސް
- މޮޑެލް- މައި އަދި ޗޫޓީ