މިމަހު ފަސް ވަނަ ދުވަހު އޮލމްޕަހުން ޓިކެޓް ވިއްކަން ފަށާފައިވާ ފިލްމު "މަލިކާ" އަށް ބޮޑު ތަރުހީބެއް ލިބެމުން އަންނަ ކަމަށާއި ފުރަތަމަ ފަސް ޝޯގެ ގިނަ ޓިކެޓް ވިއްކި ހުސްވެފައިވާ ކަމަށް ފިލްމުގެ މާކެޓިން ޓީމުން ބުނެފި އެވެ.
މަލިކާގެ މާކެޓިން ޓީމާއި ހަވާލުވެ ހުރި ހުސެން ނޫރައްދީން ބުނީ ފިލްމު ޕްރޮމޯޓް ކުރަންވެސް ގިނަ ކަންތައްތަކެއް ކުރިއަށް ގެންދަން ރާވާފައިވާ ކަމަށެވެ. އެގޮތުން އިއްޔެވެސްވަނީ ފިލްމުގެ އާ ޕޯސްޓަރެއް ނެރެފަ އެވެ. މީގެ އިތުރުން ފިލްމުގެ އިތުރު ޓްރެއިލާއެއް ވަރަށް އަވަހަށް ނެރޭނެ އެވެ. މީގެ އިތުުރުންވެސް ފިލްމު ޕްރިމިއާ ކުރުމާ ހަމައަށް އެ ފިލްމު ޕްރޮމޯޓްކުރަން ހާއްސަ ކަންތައްތަކެއް ކުރިއަށް ގެންދާނެ ކަމަށް އޭނާ ބުންޏެވެ.
މަލިކާ އޮލިމްޕަހުގައި އަޅުވަން އަޅުވަން ހަމަޖެހިފައިވަނީ މާޗުމަހުގެ ދެ ވަނަ ދުވަހު އެވެ. އެ ފިލްމުގެ 20 ޝޯ ދައްކަން ހަމަޖެހިފައިވީ ނަމަވެސް އަދި ޓިކެޓް ވިއްކަމުންދަނީ ފުރަތަމަ ފަސް ޝޯ އަށެވެ. ޕްރިމިއާ ނައިޓްގެ ޓިކެޓް 200 ރުފިޔާއަށް ވިއްކި ނަމަވެސް އެހެން ޝޯތަކުގެ ޓިކެޓްގެ އަގަކީ 100 ރުފިޔާ އެވެ.
މި ފިލްމު ޕްރިމިއާ ކުރުމަށްފަހު އަތޮޅުތެރޭގައިވެސް ފިލްމު އެޅުވުމުގެ އިންތިޒާމް ހަމަޖައްސާނެ އެވެ.
މި ފިލްމަކީ ބިންމާ އިބްރާހިމް ވަހީދުގެ ސްކްރީންޕްލޭއަކަށް، ފިލްމީ ދާއިރާގެ ތަޖުރިބާކާރު ސެމީ މުސްތަފާ ޑައިރެކްޓްކޮށްފައިވާ އަސަރުގަދަ އާއިލީ ޑްރާމާއެކެވެ. މުހައްމަދު ޖުމައްޔިލް އާއި ފާތިމަތު އާޒިފާ އަދި އަލީ އާޒިމް އާއި މަރިޔަމް ޝަކީލާގެ އިތުރުން އިސްމާއިލް ޒާހިރު އާއި ނީނާ ސަލީމް މުހިންމު ރޯލުތައް ކުޅެފައިވާ މި ފިލްމުގެ ޓައިޓްލް ރޯލުން ފެނިގެންދާނީ އަލަށް ފިލްމީ ދާއިރާ އަށް ތައާރަފްވާ ނުޒުހަތު ޝުއައިބު އެވެ.
މި ފިލްމުގައި ސިނެމެޓޯގްރާފަރެއްގެ އިތުރުންނާއި އާޓް ޑައިރެކްޓަރެއްގެ ގޮތުގައި މަސައްކަތްކޮށްފައި ވަނީ މޫމިން ފުއާދެވެ.
މިއީ ލިލީގެ ޗެއާމަން އަދި ކުރީގެ މަޝްހޫރު ޕްރޮޑިއުސަރެއް ކަމުގައިވާ މައްލާ ނާސިރު އެނބުރި ފިލްމީ ދާއިރާ އަށް ވަނުމަށް ކުރާ ތަފާތު ތަޖުރިބާއެކެވެ. ފިލްމުގެ ޕްރޮޑިއުސަރުންނަކީ މައްލާ ނާސިރު އާއި އިބްރާހިމް ރަޝީދު (މަހުރަބު އިއްބެ) އެވެ.
އާންމުކޮށް ދިވެހި އެހެން ފިލްމުތަކާ ހިލާފަށް "މަލިކާ" އަކީ އޭގެ ހުރިހާ މަސައްކަތެއް ނިންމައި، ކްލެސިފައި ވެސް ކޮށް އަދި ފިލްމު ދައްކާނެ ތާރީޚުތައް އޮލިމްޕަހުން ނެގުމަށް ފަހު ހުރިހާ ކަމެއް ނިންމައިގެން އިއުލާނުކޮށްފައިވާ ފިލްމެކެވެ. ފިލްމު އިއުލާނުކުރިއިރު މި އޮތީ ބަލަން ތައްޔާރުވެފަ އެވެ.