މިދިޔަ ހަފުތާ ވެގެން ދިޔައީ، ރާއްޖޭގެ ކުޅިވަރު ހަޔާތުގައި، އެންމެ ގިނަ ކުންފުނިތައް، އެ މޭޒަށް ގެނެވުނު ހަފުތާ އަކަށެވެ. ޕަބްލިކް ސެކްޓާގެ އަށް ކުންފުންޏާއި، ފުރަތަމަ ޑިވިޝަންގެ އަށް ކުލަބުން ގުޅުވާލަ ދީފި އެވެ. އެ އަށް ކުންފުނީގެ އިތުން، މުބަރާތުގެ ސްޕޮންސަރުންނާއި، ދިވެހި ޕްރިމިއާ ލީގަށް އަތޮޅު ތަކުން އަންނަ ހަތަރު ޓީމަށް އެހީތެރިން ފޯރުކޮށްދޭން އަންނަ ކުންފުނި ތަކާއެކު، ފުޓްބޯޅަ އަށް ޕަބްލިކް ސެކްޓާއިން 13 ވަރަކަށް ކުންފުނި އަންނާނެ ކަމުގެ ފެހި ސިގްނަލް އޮތީ ލިބިފަ އެވެ.
ޕަވްލިކް ސެކްޓާގެ ކުންފުނިތަކަށް ފަހު އެފްއޭއެމްގެ ރައީސް ބައްސާމް އަދީލް ޖަލީލް، މިހާރު އަމާޒަކީ ޕްރައިވެޓް ސެކްޓާ ދިވެހި ފުޓްބޯޅައަށް އޮންބޯޑް ކުރެއްވުމަށެވެ.
"ފުރަތަމަ، މިދަނީ، ފަސޭހައިން އަތުޖެހޭނެ ކުންފުނިތައް މިކަމުގެ ތެރެއެއަށް ވެއްދުން، އޮގޮތުން ޕަބްލިކް ސެކްޓާގެ ކުންފިނިތަކާއެކު އެއްބަސްވުމަށް މިއައީ، އިރާދަ ކުރެއްވިއްޔާ ޕްރައިވެޓް ސެކްޓާވެސް ފުޓްބޯޅައިގެ ތެރެއަށް ގެންނާނަން،" ބައްސާމް ވިދާޅުވި އެވެ.
އޭނާ ވިދާޅުވީ، ކުރިއަށް އޮތް ދެ ހަފުތާ ތެރޭ، ގައުމީ ޓީމުގެ ސްޕޮންސަރެއްގެ ގޮތުގައި، ރާއްޖޭގެ ބޮޑު ކުންފުންޏެއް ފުޓްބޯޅައިގެ މޭޒު ދޮށަށް އަންނާނެ ކަމަށެވެ.
މިދިޔަ އަހަރު، ގައުމީ ޓީމުގެ އެގްޒިބިޝަން މެޗަށް އެފްއޭއެމުން ވަނީ، ގިނަ އަދަދެއްގެ އަމިއްލަ ކުންފުނިތަކާއެކު، އެއްބަސްވުންތައް ގާއިމު ކޮށްފަ އެވެ. އޭގެ ތެރޭގައި، ޓްއަރިޒަމް ދާއިރާގެ އިންޓަނޭޝަނަލް ބްރޭންޑެއްވެސް ހިމެނެ އެވެ. އެއީ އެމެޗަށް އެއްބަސްވި ކުންފުނި ތަކެވެ.
ނަމަވެސް ބައްސާމްގެ އަމާޒަކީ، ދައިމީ ގޮތެއްގައި، އަމިއްލަ ކުންފުނިތަކުގެ އެހީތެރީކަން ވެސް ފުޓްބޯޅަށް ހޯދުމެވެ.