އިންޑިއާގައި ކުޅުނު އެކުވެރިކަމުގެ މެޗުގައި އެ ގައުމުގެ އަންހެން ފުޓްބޯޅަ ޓީމުން ދިވެހިރާއްޖޭގެ އަންހެން ޓީމު 14-0ގެ ބޮޑު ތަފާތަކުން ބަލިކޮށްފި އެވެ.
ބެންގަލޫރުގައި އިއްޔެ ކުޅުނު މި މެޗުގައި އިންޑިއާ އިން ފުރަތަމަ ހާފުގައި 8 ލަނޑު ޖަހައި ދެވަނަ ހާފުގައި 6 ލަނޑު ޖެހި އެވެ.
މެޗުގެ ފުރަތަމަ 7 މިނިޓުގެ ތެރޭގައި އިންޑިއާގެ ޕިޔާރީ ޒާޒާ ދެ ލަނޑު ޖެހި އެވެ. އޭނާ ވަނީ މި މެޗުގައި ހެޓްރިކްވެސް ހަދާފަ އެވެ.
މި މެޗުގެ އެންމެ މޮޅު ކުޅުންތެރިޔާގެ މަގާމު ހޯދި އިންޑިއާގެ ލެންޑާ ކޮމްވެސް ވަނީ ހެޓްރިކެއް ހަދާފަ އެވެ.
މެޗުގެ ފުރަތަމަ ހާފު ކުޅެމުން ދަނިކޮށް ކުޅަނދުރުތަކެއްގެ އުދަނގުލާ ގުޅިގެން ވަގުތުކޮޅަކަށް މެޗު މެދުކަނޑާލަންވެސް ޖެހުނެވެ. އަދި އެސިސްޓެންޓް ރެފްރީވެސް ދަނޑުމައްޗަށް ވެއްޓި ފަރުވާ ދޭން ޖެހުނެވެ.
މި މެޗުގައި އިންޑިއާ އިން 20 ޝޮޓް ރާއްޖޭގެ ގޯލަށް ފޮނުވާލިއިރު، ރާއްޖެއަށް އެންމެ ޝޮޓެއްވެސް އިންޑިއާގެ ގޯލަށް ފޮނުވާނުލެވިފައެއް ނުވެ އެވެ.
މިއީ 2024 ވަނަ އަހަރު ރާއްޖޭގެ އަންހެން ފުޓްބޯޅަ ޓީމަށް ލިބުނު އެންމެ ބޮޑު ބައްޔެވެ. މީގެ ކުރިން ސާފް ޗެމްޕިއަންޝިޕްގައި ބޫޓާން އަތުން 13-0 އިން ބަލިވި އެވެ. އަދި ހަމަ މި މުބާރާތުގައި ނޭޕާލް އަތުން 11-0 އިން އަދި ސްރީ ލަންކާ އަތުން 1-0 އިން ބަލިވި އެވެ.
އިންޑިއާގެ ކޯޗު ބުނެފައިވަނީ ރާއްޖޭގެ ޓީމަކީ އެހާ ގަދަ ޓީމެއް ނޫން ކަމަށެވެ. އިންޑިއާގެ ޓީމުގައި ހިމެނެނީ 20 އަހަރުން ދަށުގެ 14 ކުޅުންތެރިންނެވެ.