ނޭޕާލްގެ ކަތަމަންޑޫގައި އިއްޔެ ބޭއްވި ސާފްގެ އެގްޒެކެޓިވް ކޮމިޓީގެ ބައްދަލުވުމުގައި، މި އަހަރުގެ ސާފް ޗެމްޕިއަންޝިޕް ހޯމް އެންޑް އަވޭ ފޯމެޓަށް ބަދަލުކުރުމަށް ނިންމައިފި އެވެ.
މިއީ މި މުބާރާތުގެ ތާރީހުގައި މި މުބާރާތް ކުޅޭ ފޯމެޓަށް ގެނެވޭ އެންމެ ބޮޑު އެއް ބަދަލެވެ.
ކުރިން މި މުބާރާތް ބާއްވަމުން އައީ އެއް ގައުމެއްގައި ސެންޓްރަލައިޒްކޮށެވެ. ނަމަވެސް އަލަށް މި ގެނައި ބަދަލާ އެކު މިހާރު ކޮންމެ ގައުމަކަށްވެސް އެ ގައުމެއްގެ ސަޕޯޓަރުންގެ ކުރިމަތީގައި މެޗު ކުޅުމުގެ ފުރުސަތު ލިބިގެންދާނެ އެވެ.
އާ ފޯމެޓްގެ ދަށުން ކުޅޭ ފުރަތަމަ މުބާރާތް ކުރިއަށްދާނީ މިއަހަރުގެ ޖޫން 15 އިން ޖުލައި 25 އަށެވެ.
ސާފްގެ ސެކްރެޓަރީ ޖެނެރަލް އަލްވާރުލް ހައްގު ހިލާލް ވިދާޅުވި ގޮތުގައި އިންޑިއާ އާއި ޕާކިސްތާނުގެ ދެމެދުގައި އޮތް ސިޔާސީ ގުޅުމަށް ރިއާޔަތްކޮށް، މި ދެ ގައުމުގެ މެދުގައި ކުޅެވޭ މެޗުތައް އެއްބަސްވެވޭ ތަނެއްގައި ބޭއްވުމަށް ވަނީ ނިންމާފަ އެވެ.
ބައްދަލުވުމުގައި ނިންމި އިތުރު ކަންކަން
- 2026 ވަނަ އަހަރު ސާފް ކުލަބް ޗެމްޕިއަންޝިޕް ބޭއްވުމަށް ނިންމުން
- ސާފް 23 އަހަރުން ދަށުގެ މުބާރާތެއް ބޭއްވުމަށް ނިންމުން
- މުބާރާތް ބޭއްވުމަށް ދަތިތަކެއް ދިމާވެއްޖެނަމަ، ކުރީގެ ސެންޓްރަލައިޒްޑް ފޯމެޓަށް ބަދަލުކުރުމުގެ އިޚްތިޔާރު އޮތުން
ދެހާސް އަށާރަވަނަ އަހަރަކީ މި މުބާރާތުގެ ތާރީޚުގައި ދެ ގައުމެއްގައި މުބާރާތް ބޭއްވި ފުރަތަމަ އަހަރެވެ. އެ އަހަރު މި މުބާރާތް ކުރިއަށް ދިޔައީ ދިވެހިރާއްޖެ އާއި ސްރީލަންކާ ގައެވެ.
އާ ބަދަލާ އެކު ދެކުނު އޭޝިއާގެ ފުޓްބޯޅައަށް އާ ދިރުމެއް ލިބި، މުޅި ސަރަހައްދުގެ ކުޅިވަރުގެ ރޫހު އިތުރަށް ވަރުގަދަ ވެގެންދާނެ ކަމަށް ތަޖުރިބާކާރުން ގަބޫލުކުރެ އެވެ.