ކުރީގެ ޑިފެންސް މިނިސްޓަރު މުހައްމަދު ނާޒިމް ވަނީ ފްރޭމް ކުރެވިފައިކަން ނުވަތަ ނޫންކަން ވެސް ރައީސް އަބްދުﷲ ޔާމީނަށް އެގިވަޑައިނުގަންނަވާ ކަމަށް ރައީސް އޮފީހުން މިއަދު ބުނެފި އެވެ.
އަދާލަތު ޕާޓީގެ ރައީސް އިމްރާން އަބްދުﷲ ރޭ ދެއްކެވި ވާހަކަތަކާ ގުޅިގެން، ރައީސް އޮފީހުގެ ތަރުޖަމާން އިބްރާހިމް މުއާޒި އަލީ މިއަދު ނެރުއްވި ބަޔާނެއްގައި ބުނެފައި ވަނީ، މި މަހުގެ ތިން ވަނަ ދުވަހު އިމްރާން ރައީސްއާ ބައްދަލު ކުރައްވައި އެދިވަޑައިގެންނެވީ ނާޒިމް ފްރޭމް ކުރެވިފައިވާތީ، އެމަނިކުފާނުގެ މައްޗަށް ޝަރީއަތަށް ހުށަހެޅިފައިވާ މައްސަލަ އަނބުރާ ނެގުމަށެވެ. ނަމަވެސް އެކަމާ ގުޅިގެން ރައީސް ވިދާޅުވި ކަމަށް ބަޔާނުގައި ވަނީ، އެކަމަށް ހެކިދޭ ކަންތައްތަކެއް ހުރި ނަމަ ނާޒިމްގެ ގާނޫނީ ޓީމާ ގުޅިގެން އެ ކަންކަން ޝަރީއަތުގެ މަޖިލީހަށް ހުށަހެޅުމަށެވެ. އަދި ޝަރީއަތުގައި އޮންނަ މައްސަލައެއް އަނބުރާ ގެނައުމުގެ ބާރެއް ރައީސަށް ނެތް ކަމަށް ވެސް އިމްރާން އަރިހު ރައީސް ވިދާޅުވި ކަމަށް ވެސް ބަޔާނުގައިވެ އެވެ.
"ޝައިޚް އިމްރާން ޢަބްދުﷲގެ އެވާހަކަފުޅާ ގުޅޭގޮތުން، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކުރީގެ ޑިފެންސް މިނިސްޓަރ ވަނީ ފްރޭމް ކުރެވިފައިކަން ނުވަތަ ނޫންކަން ރައީސުލްޖުމްހޫރިއްޔާއަށް އެނގިވަޑައިނުގަންނަވާ ކަމަށް ވިދާޅުވިއެވެ. ،" ބަޔާނުގައިވެ އެވެ. ޝައިޚް އިމްރާން ޢަބްދުﷲ އަށް، ކުރީގެ ޑިފެންސް މިނިސްޓަރު ފްރޭމް ކުރެވިފައިވާ ކަމަށް ޤަބޫލުފުޅުކުރެއްވޭނަމަ، ނުވަތަ ސާބިތު ހެކިތަކެއް ވާނަމަ، ކުރީގެ ޑިފެންސް މިނިސްޓަރުގެ ޤާނޫނީ ޓީމާއި ގުޅިވަޑައިގެން ޝަރީޢަތުގެ މަރުޙަލާގެ ތެރެއިން އެމަސައްކަތްކުރެއްވުމަށް، ރައީސުލްޖުމްހޫރިއްޔާ އިރުޝާދު ދެއްވިއެވެ".
ނާޒިމްގެ މައްސަލައަކީ މިހާރު ޝަރުއީ ދާއިރާގައިވާ ކަމަކަށް ވާތީ އެކަމާ މެދު ގޮތެއް ނިންމަން ޖެހޭނީ ޝަރުއީ މަރުހަލާގެ ތެރެއިން ކަމަށް ރައީސް ދެކެވަޑައިގަންނަވާ ކަމަށް ވެސް ބަޔާނުގައިވެ އެވެ.
އެ ބައްދަލުވުމުގައި އިތުރަށް ދެއްކުނު ވާހަކަތައް ހާމަ ކުރަމުން ބަޔާނުގައި ބުނެފައި ވަނީ އިމްރާން ދެން ޝަކުވާ އުފުއްލެވި ކަމަކީ ސަރުކާރުގެ ތެރޭގައި ކޮރަޕްޝަންގެ އަމަލުތަކާއި ފަސާދަ އިތުރުވެފައިވާ ކަމަށް ވިދާޅުވެ އެވެ. އެކަމާ ގުޅިގެން ރައީސް ވިދާޅުވި ކަމަށް ބަޔާނުގައި ބުނެފައި ވަނީ، އެފަދަ މައްސަލައެއް އޮތް ނަމަ އެކަމެއް އެންޓި ކޮރަޕްޝަން ކޮމިޝަން (އޭސީސީ) އާއި އެހެން ވެސް މިނިވަން މުއައްސަސާތަކަށް އެ މައްސަލައެއް ހުށަހަޅުއްވައިގެން ކުރިއަށް ގެންދެވުމަށް ރައީސް އެދިވަޑައިގެން ކަމަށެވެ.
"ރައީސުލްޖުމްހޫރިއްޔާ އެދިވަޑައިގަންނަވަނީ ދިވެހި ޖުމްހޫރިއްޔާގެ ޤާނޫނު އަސާސީން އުފައްދާފައިވާ މުއައްސަސާތަކާއި، ނިޒާމުތަކަށް ޖާގަދެއްވައިގެން، ޑިމޮކްރަސީ ހަރުދަނާ ކުރެއްވުމަށް ކަމުގައި ޝައިޚް އިމްރާން ޢަބްދުﷲ ގެ އަރިހުގައި ދެންނެވިއެވެ،" ބަޔާނުގައިވެ އެވެ.
އިދިކޮޅު ޕާޓީތައް އެކުވެގެން ރޭ ބޭއްވި މުޒާހަރާގައި އިމްރާން ވިދާޅުވެފައި ވަނީ ނާޒިމް ފްރޭމް ކުރުމަށް ހަތިޔާރު އެތެރެކޮށް އެކަން ކުރި މީހުން ރައީސް އަބްދުﷲ ޔާމީނަށް އެގިވަޑައިގަންނަވާ ކަމަށެވެ. އަދި އެކަމަކީ ރައީސްއަށް ނޭނގި ކޮށްފައިވާ ކަމެއް ނޫން ކަމަށް ވެސް އޭނާ ވަނީ ވިދާޅުވެފަ އެވެ.