މަސްތުވާތަކެތި ހޯދަން އެހީތެރިވުމަށް ރާއްޖެ ގެންނަ ކޮންމެ ކުއްތާއަކަށް ވަކިން ކިޔާނެ ނަމެއް ހޯދަން ދިވެހި ބަހުގެ އެކަޑަމީގައި ފުލުހުން އެދިއްޖެ އެވެ.
ފުލުހުން ބުނީ ރާއްޖެ ގެންނަ 16 ކުއްތާގެ ތެރޭގައި ހިމެނެނީ ހަތަރު އަންހެން ކުއްތާ އާއި 12 ފިރިހެން ކުއްތާ ކަމަށެވެ. އެއިން ކޮންމެ ކުއްތާއަކަށް ކިޔާނެ ނަމެއް ހޯދަން ދިވެހި ބަހުގެ އެކަޑަމީގައި ފުލުހުން އެދުނީ މިއަދުގެ ވަގުތެއްގައި ކަމަށް ފުލުހުން ބުންޏެވެ.
އެ ކުއްތާތައް ހިމެނޭ މުޅި ސްކޮޑަށް "ފާރަގެމަ" ގެ ނަން ދިނީ ވެސް ހޯމް މިނިސްޓްރީގެ އެދުމުގެ މަތިން ދިވެހި ބަހުގެ އެކަޑަމީންނެވެ. އެ ކުއްތާތަކުގެ ތެރެއިން ބައެއް ކުއްތާތައް މިރޭ ރާއްޖެ ގެންނައިރު އެ ކުއްތާތައް ބޭތިއްބުމަށް ޚާއްސަ ކެނަލްތަކެއް ވެސް މިހާރު ވަނީ އެއާޕޯޓްގައި ވަނީ ގާއިމްކޮށްފަ އެވެ.
މަސްތުވާތަކެތި ހޯދުމަށް ޚާއްސަ ތަމްރީނުތަކެއް ދީފައިވާ ކުއްތާ ބޭނުން ކުރުމަކީ ގިނަ ގައުމުތަކުގައި ކުރާ ކަމެކެވެ. މީގެކުރިން ވެސް ރާއްޖޭގައި ދެ ކުއްތާއެއް އެއާޕޯޓުގައި ގެންގުޅުނު ނަމަވެސް ފަހުން ވަނީ އެ ދެ ކުއްތާ ރާއްޖެއިން ފޮނުވާލައިފަ އެވެ.