މާލޭގައި ކުރާ މުޒާހަރާތަކުގައި ރޭގަނޑު 11 ގެ ފަހުން އަޑުގަދަ ކުރާ ބޭނުން ކުރުން މަނާކޮށް 12 ގެ ފަހުން މުޒާހަރާތައް ނުކުރެވޭ ގޮތަށް ހެދުމަށް ފުލުހުން ނިންމައިފި އެވެ.
ފުލުހުން މިއަދު އާންމުކޮށްފައިވާ ބަޔާނެއްގައިވަނީ ރޭގަނޑު 11 ގެ ފަހުން އަޑު ގަދަ ބޭނުން ނުކުރެވޭ ގޮތް ހެދުމަށާއި 12 ޖެހުމުން އެއްވުން ހުއްޓާލައި، މަގުމަތި އަމާންކުރަން އެއްވުން އިންތިޒާމް ކުރާ ފަރާތްތަކަށް އަންގަން ނިންމާފައިވާ ކަމަށެވެ. އަދި އެގޮތަށް 12 ގެ ފަހުން އެއްވުންތައް ކުރިއަށް ގެންދިއުމުގެ ފުރުސަތު ނުދޭނެ ކަމަށް ވެސް އެ ބަޔާނުގައިވެ އެވެ. މީގެ އިތުރުން ތަކުރާރުކޮށް، އެއް މަގަކަށް ނުވަތަ އެއް ސަރަހައްދަށް އެއްވުމަށް ފުރުސަތު ނުދޭން ވެސް ފުލުހުން ވަނީ ނިންމައިފަ އެވެ.
ފުލުހުން ބުނީ އެގޮތަށް ހަމަޖެއްސީ މިހާރު މާލޭގައި ހިނގަމުންދާ ސިލްސިލާ މުޒާހަރާތަކުގެ ސަބަބުން އާންމުންނަށާއި ވިޔަފާވެރިންނަށް ދަތިވެ، ދަތުރުފަތުރަށް ހުރަސް އެޅޭތީ އެ ފަރާތްތަކުން އެކަމުގެ ޝަކުވާ ކުރަމުންދާތީ ކަމަށެވެ. އެގޮތަށް ނިންމީ އެއްވެ އުޅުމުގެ ގާނޫނުގެ ދަށުން ފުލުހުންނަށް ލިބޭ ބާރުގެ ދަށުން ފުލުހުންނަށް ލިބިދޭ ބާރުގެ ދަށުން ކަމަށް ވެސް އެ ބަޔާނުގައިވެ އެވެ.
ރޭގަނޑު 11 ގެ ފަހުން މުޒާހަރާތަކުގައި ސައުންޑް ބޭނުން ނުކުރެވޭ ގޮތަށް ހެދުމަށް ފުލުހުން ނިންމީ އެކަން އެގޮތަށް ކުރުމަށް ހޯމް މިނިސްޓަރު އުމަރު ނަސީރު ފުލުހުންގެ ކިބައިން އެދިވަޑައިގެންފައި ވަނިކޮށެވެ.
އެއްވެ އުޅުމުގެ ގާނޫނު ބުނާގޮތުން ވަކި ވަގުތެއްގައި އެއްވުން ނުބޭއްވުމަށް ނުވަތަ އަޑުގަދަކުރާ ބޭނުން ނުކުރުމަށް އެންގުމުގެ ބާރު ފުލުހުންނަށް އޮންނާނެ އެވެ. ނަމަވެސް ވަކި ތަނެއްގައި އެއްވުން ބޭއްވުމަކީ އެއްވެ އުޅުމުގެ ހައްގު ހަނި ކުރެވޭނެ ކަމެއް ނޫން ކަމަށް އެ ގާނޫނުގައިވެ އެވެ.