ފައިދިގު މަކުނުގެ ވިހައިން ސްޓްރޯކަށް ފަރުވާ!

ވިހަ ގަދަ ވައްތަރެއްގެ ފައިދިގު މަކުނުގެ ވިހައިގައި އެކުލެވިފައި ހުންނަ މާއްދާއަކުން ސްޓްރޯކް ޖެހޭ މީހުންނަށް ފަރުވާ ކުރެވިދާނެ ކަމަށް ދިރާސާއަކުން ދައްކައިފި އެވެ.

އޮސްޓްރޭލިއާގެ ކްއީންސްލޭންޑް ޔުނިވާސިޓީއާއި މޮނާޝް ޔުނިވާސިޓީގެ ސައިންސްވެރިން ކުރި ދިރާސާއަކުން އެނގިފައިވާ ގޮތުގައި އެ ގައުމުގައި އުޅޭ " ޑާލިން ޑައުންސް ފިއުނަލް ވެބް ސްޕައިޑާސް " ނަމަކަށް ކިޔާ ބާވަތުގެ ފައި ދިގު މަކުނުގެ ވިހައިގައި ހިމެނޭ މާއްދާގެ އެންމެ ޑޯޒެއް ދިނަސް، ސްޓްރޯޖް ޖެހުމުގެ ސަބަބުން މީހުންގެ ސިކުނޑިއަށް ލިބޭ ގެއްލުން ހުއްޓުވައިދެއެވެ. އެވައްތަރުގެ ފައިދިގު މަކުނުގެ ވިހައަކީ އޭގެ ޒާތުގައި، 15 މިނެޓް ތެރޭގައި މީހަކު މަރުވާ ފަދަ ވަރުގަދަ ވިހައެކެވެ. ނަމަވެސް ސްޓްރޯކް ޖެހޭ މީހުންގެ ސިކުނޑީގެ ސެލްތައް ހަލާކުވުމުން ދުރުކޮށްދޭ ފަދަ ޕްރޮޓީން އެއް އެ ވިހައިގެ ތެރޭގައި އެކުލެވޭ ކަން ދިރާސާއިން ވަނީ އެނގިފަ އެވެ.

"އެޗްއައި1އޭ" ގެ ނަންދީފައިވާ އެ މާއްދާ ފައިދިގު މަކުނުގެ ވިހައިގައި އެކުލެވޭކަން އެނގުނީ ވިހައިގެ ޑީއެންއޭ ބެލުމަށް ކުރި ދިރާސާއެއްގެ ތެރޭގައެވެ. އެ މާއްދާ ސައިންސްވެރިންނަށް ފާހަގަވީ އެއީ ސިކުނޑި ހިމާޔަތްކޮށްދޭ ދެ ކެމިކަލެއްގެ ދެ ނަކަލު އެއްކޮށްލާފައި ހުންނަ އިރު ހުންނަ ފަދަ ގޮތަކަށް އެމާއްދާ ހުރީތީ ފެނިގެންނެވެ. އެކަން ފާހަގަވުމުން ސައިންސްވެރިން ވަނީ ލެބޯޓްރީ ޓެސްޓްތައް ކުރުމަށް ގެންގުޅޭ މީދާ ބޭނުންކޮށްގެން އޭގެ ފައިދާ ދެނެގަތުމަށް ޓެސްޓްކޮށްފައެވެ.

ފައިދިގު މަކުނުގެ ވިހައިގެ ތެރެއިން އަލަށް ހޯދުނު އެމާއްދާ އިންސާނުންގެ ހަށިގަނޑުގައި ރަނގަޅަށް މަސައްކަތް ކުރާކަން ކަށަވަރު ކުރެވިއްޖެ ނަމަ، އެކަން ވެގެން ދާނީ ސްޓްރޯކް ޖެހޭ މީހުންގެ ސިކުނޑީގެ ނިއުރޯންތައް ގެއްލުނަ ނުދީ ސަލާމަތް ކުރުމަށް ބޭހެއް އުފެއްދޭ ފުރަތަމަ ފަހަރަށެވެ.

ސްޓްރޯކް ޖެހެނީ ސިކުނޑިއަށް ލޭ ދައުރުވުމަށް ހުރަހެއް އެޅި ، ސިކުނޑިއަށް ބޭނުންވާ ވަރަށް އޮކްސިޖަން ނުލިބުމުންނެވެ. ސްޓްރޯކް ޖެހޭ މީހުންގެ ތެރެއިން 85 ޕަސެންޓް މީހުންނަށް އެކަން ޖެހެނީ ސިކުނޑީގެ ލޭ ނާރެއްގައި ގަނޑު ލޭކޮޅެއް އުފެދުމުގެ ސަަބަބުންނެވެ. އަނެއް 15 ޕަސެންޓް މީހުންނަށް ސްޓްރޯކް ޖެހެނީ ލޭނާރެއް ފަޅައިގެން ދިއުމުގެ ސަބަބުންނެވެ. ދުނިޔޭގައި ސްޓްރޯކް ޖެހިގެން އަހަރަކު ގާތްގަނޑަކަށް ހަ މިލިޔަން މީހުން މަރުވެއެވެ. އެގޮތުން އެއީ ދުނިޔޭގައި ދެވަނައަށް އެންމެ ގިނަ މީހުން މަރުވާ ސަބަބެވެ. އެންމެ ގިނަ މީހުން މަރުވަނީ ހާޓް އެޓޭކް ޖެހިގެންނެވެ.