މާފަންނުގައި ހުރި ގެއެއްގައި ރެނދުލުމުން އެ ގޭގެ މީހުން އެހެން ގެއަކަށް ބަދަލުކުރުމުގެ މަސައްކަތް ފަށައިފި އެވެ.
މިމައްސަލަ ދިމާވީ މ. ކެރިންލައިޓް ނަމަކަށް ކިޔާ ގެއެއްގައި އިމާރާތްކުރަމުން ދިޔައިރު ދިމާވި މައްސަލައަކާ ގުޅިގެންނެވެ.
މާލެ ސިޓީ ކައުންސިލުން މިއަދު ބުނީ މިމައްސަލަ ދިމާވީ ކެރިންލައިޓް އިމާރަތްކުރަމުން ދިޔައިރު ޝީޓް ޕައިލްނުކޮށް މަސައްކަތް ފެށުމުން ކަމަށާއި އެކަމާ ގުޅިގެން މ. ލަކީހެވަންގޭގައި ރެނދުއަޅާ އެ އިމާރާތް އަޑިއަށް ދާން ފަށާފައިވާ ކަމަށެވެ.
މިމައްސަަލަ ފާހަގަވުމާ އެކު މ. ލަކީހެވަން ގޭގައި އުޅޭ އެންމެން އެހެން ތަނަކަށް ބަދަލުކުރުމުގެ މަސައްކަތް ފަށައިގެން ކުރިއަށްދާ ކަމަށްވެސް ސިޓީ ކައުންސިލުން ބުންޏެވެ.
ލަކީހެވަން ގޭގައި އުޅެނީ 4 އާއިލާއެއްގެ 18 އަހަރުން ދަށުގެ 3 ކުދިންނާއި 6 މީހުންނާއި ގޭގެ ދެ ބައެއްގައި ކުއްޔަށް ދިރިއުޅުނު ބޭރު ބައެކެވެ.