އަދާލަތު ޕާޓީ އާއި އެމްޑީޕީ އިން އިސްވެ އޮވެ މިހާރު ކުރިއަށް ގެންދާ މުޒާހަރާތަކުގައި ގާނޫނާ ގަވާއިދާ ހިލާފު އަމަލުތައް ހިންގާތީ އެ ކަންތައްތަކަށް ފިޔަވަޅު އަޅަން ޖެހިދާނެ ކަމުގެ އިންޒާރު އިލެކްޝަންސް ކޮމިޝަނުް (އީސީ) އިން އެ ޕާޓީތަަކަށް ދީފި އެވެ.
ރޭގެ މުޒާހަރާގައި ހިންގި ބައެއް އަމަލުތަކާ ގުޅޭ ގޮތުން އެ ކޮމިޝަނުން އެ ދެ ޕާޓީއަށް މިއަދު ފޮނުވި ސިޓީގައި ބުނެފައި ވަނީ ސުލްހަވެރިކޮށް އެއްވެ އުޅުމުގެ ގާނޫނާއި ސިޔާސީ ޕާޓީތަކުގެ ގާނޫނާ ހިލާފަށް، ރޭގެ އެއްވުުމުގައި ފުލުހުންނަށާއި އާންމު ރައްޔިތުންގެ މުދަލަށް ގެއްލުންދީ އަނިޔާވެރި އަމަލުތަކަށް ހިތްވަރު ލިބޭ ގޮތަށް މުޒާހަރާގައި އަމަލުކޮށްފައިވާ ކަމަށެވެ.
ކޮމިޝަނުން ބުނީ ސިޔާސީ ޕާޓީތަކުން ގާނޫނާއި ގަވާއިދާ ހިލާފަށް ހިންގަމުން އަންނަ އެފަދަ އަމަލުތައް ބަލަމުން އަންނަ ކަމަށެވެ. އަދި އެ މައްސަލަ ބެލުމަށް ފަހު ގާނޫނާއި އެއްގޮތްވާ ގޮތުގެ މަތިން އެ ޕާޓީތަކާ މެދު ފިޔަވަޅު އެޅޭނެ ކަމަށް ވެސް ކޮމިޝަނުން ބުންޏެވެ.
ރޭގެ މުޒާހަރާގައި ބޭނުން ކުރި ސައުންޑް ޕިކަޕް ފުލުހުންގެ ބެލުމުގެ ދަށަށް ގެނެސް މުޒާހަރާ ރޫޅާލަން އުޅުމުން މުޒާހަރާގެ ބައިވެރިން ރުޅިގަދަވެ، ފުލުހުންނަށް ހަމަލާދީފައިވެ އެވެ. އަދި ޕޮލިސް ކޮމިޝަނަރު ހުސެން ވަހީދުގެ ގެކޮޅަށް ގެއްލުންދީ އެ ގޭ ތެރެއަށް ވަދެގަންނަން ވެސް މަސައްކަތް ކޮށްފައިވެ އެވެ. އެ މައްސަލަތައް ފުލުހުން ތަހުގީގު ކުރާއިރު، 10 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. އެ މީހުންނަށް ކޯޓުން ވަނީ ބަންދުގެ މުއްދަތު ވެސް ޖަހައިފަ އެވެ.