ހަބަރު

ގާސިމް ޕާސްޕޯޓް ހިފެހެއްޓި އަމުރު އިސްތިއުނާފަށް

ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ޕާސްޕޯޓް ހިފަހައްޓަން ކުރިމިނަލް ކޯޓުން ނެރެފައިވާ އަމުރު ހައިކޯޓުގައި އިސްތިއުނާފު ކުރުމަށް ހުށަހަޅައިފި އެވެ.

ގާސިމް އިބްރާހިމްގެ ގާނޫނީ ވަކީލުން މިއަދު ބޭއްވި ނޫސްވެރިންގެ ބައްދަލުވުމުގައި ވަކީލުން ވިދާޅުވީ، ތަހުގީގަށް ގާސިމް އެއްބާރުލުން ދެއްވަމުން ގެންދާއިރު އެމަނިކުފާނުގެ ޕާސްޕޯޓް ހިފެހެއްޓުމަކީ އެއްވެސް ބޭނުމެއް އޮތް ކަމެއް ކަމަށް ގަބޫލު ނުކުރައްވާ ކަމަށެވެ.

ގާސިމްގެ ޕާސްޕޯޓް ހިފަހައްޓާފައިވަނީ ވިލާ ޝިޕިންއަށް ދޫކުރި ތ. އެލާގެ މައްސަލާގައި އެ ކުންފުންޏާ ދެކޮޅަށް ހައިކޯޓުން މައްސަލަ ނިންމައި ފައިސާތަކެއް ދެއްކުމަށް އަމުރުކޮށްފައިވާ މައްސަލާގަ އެވެ.

ވިލާ ޝިޕިންގެ އެކައުންޓްތައް ވެސް ވަނީ ފްރީޒް ކޮށްފަ އެވެ. މިރާއިން އެ ކުންފުންޏަށް އަންގާފައިވަނީ އެލާގެ ބިމުގެ ކުލީގެ ގޮތުގައި 3.8 މިލިއަން ޑޮލަރު ދައްކަން ޖެހޭ ކަމަށެވެ. އަދި ޖޫރިމަނާގެ ގޮތުގައި 14.6 މިލިއަން ޑޮލަރާއި އިންޓްރަސްޓް ރޭޓްގެ ގޮތުގައި 226،352 ޑޮލަރު މީރާއަށް ވިލާ ޝިޕިންއިން ދައްކަން ޖެހެ އެވެ.

އެކައުންޓްތައް ފްރީޒްކޮށް އެޅި ފިޔަވަޅުން އެ ކުންފުނި ވީއްލޭނީ ސިޓީގައިވާ ގޮތުން މީރާއަށް ދައްކަންޖެހޭ ހުރިހާ ފައިސާތަކެއް ދައްކާ ހަލާސް ކުރުމުންނެވެ.

ގާސިމްގެ ޕާސްޕޯޓް ހިފަހައްޓާފައިވާއިރު ގާސިމަށް ވަނީ ރިޝްވަތު ދޭން އުޅުއްވި ކަމަށް ވެސް ތުހުމަތު ކޮށްފަ އެވެ. އެ މައްސަލާގައި ދެ ފަހަރެއްގެ މަތިން ފުލުހަށް ވެސް ވަނީ ހާޒިރުކޮށްފަ އެވެ. އެ ތުހުމަތު ކުރަނީ މަޖިލިސް މެންބަރުންނަށް ރިޝްވަތު ދެއްވައި، ނުފޫޒު ފޯރުވިދާނެފަދަ ގޮތަކަށް ޖުމްހޫރީ ޕާޓީގެ ޖަލްސާއެއްގައި ވާހަކަފުޅު ދައްކަވާފައިވާ ކަމަށް ބުނެ އެވެ. ވަކީލުން ވަނީ ރިޝްވަތު ދޭން އުޅުނު ކަމަށް ބުނާ މައްސަލައިގައި ދައުވާ ކުރުމަށް ޕީޖީ އޮފީހަށް މައްސަލަ ވަނީ ފޮނުވާފަ އެވެ.