ރާއްޖޭގައި އަމާންކަން ގާއިމުކުރުމަށް އޮތް އެންމެ ބޮޑު ގޮންޖެހުމަކީ ގާނޫނުތަކުގައި ހުރި "ލޯވަޅުތައް" ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ފުލުހުންގެ ހިދުމަތަށް 82 އަހަރު ފުރުމާ ގުޅިގެން މިރޭ ބޭއްވި ހާއްސަ ރަސްމިއްޔާތެއްގައި އުމަރު ވިދާޅުވީ ފުލުހުންގެ ދައުރު އަދާ ނުކުރެވުމުން އެންމެން ވެސް އިނގިލި ދިއްކުރަނީ ފުލުހުންނާ ދިމާލަށް ކަމަށެވެ. ނަމަވެސް ގާނޫނު ތަކުގަ ހުރި "ލޯވަޅު" ތަކުގެ ސަބަބުން ފުލުހުން ކުރާ މަސައްކަތް "ފަނު ފުލުންދާ" ކަމަށް އުމަރު ވިދާޅުވި އެވެ.
"މާލޭގެ މަގުތަކުގައި މީހަކު މަރާލައިފިނަމަ މީހުންގެ ތުހުމަތުތައް އަންނަނީ ފުލުހުންނަށް. އެކަމަކު މީހަކު މޫދަށް ފުންމާލައިގެން ފުރާނަ ނަގާލަން މަސައްކަތް ކުރާއިރު އެމީހާ ސަލާމަތް ކުރުމުން ތައުރީފް އަންނާނީ ވެސް ފުލުހުންނާއި ދިމާލަށް،" އުމަރު ވިދާޅުވި އެވެ.
އުމަރު ވިދާޅުވީ ގާނޫނު ހެދެން ޖެހޭނީ އެގައުމެއްގައި ތަބީއަތާއި ގުޅޭ ގޮތަށް ކަމަށާއި އެހެން ނޫން ނަމަ ނަތީޖާއެއް ނުނެރެވޭނެ ކަމަށެވެ. އަދި ވިދާޅުވީ ރާއްޖޭގައި ހެދިފައި ހުރި ގާނޫނުތަކަކީ އިނގިރޭސިވިލާތުގެ ގާނޫނުތައް ނަމޫނާއަކަށް ބަލައިގެން ހަދާފައިވާ ގާނޫނުތައް ކަމަށެވެ. އެހެން ކަމުން ގާނޫނު ނެގެހއްޓުމަށް އުނދަގޫވާ ކަމަށް އުމަރު ވިދާޅުވި އެވެ.
އުމަރު އިތުރަށް ވިދާޅުވީ ފުލުހުންގެ ދައުރު އަދާ ކުރުމަށް ގާނޫނުތައް ރާއްޖޭގެ މާހައުލާ ގުޅޭ ގޮތަށް އިސްލާހު ކުރަން ޖެހޭ ކަމަށާއި އެކން ކުރުމަށް ރައްޔިތުންގެ މަޖިލީހަށް ގޮވާލައްވާ ކަމަށެވެ.