ފުލުހުންގެ މަސައްކަތާ ގުޅޭ ގޮތުން ބޭރުގެ ފާޑުކިޔުންތައް އައި ނަމަވެސް އެކަމަށް ބީރު ކަންފަތެއް ދީ މުޖުތަމައު އަމާން ކުރުމުގެ ގައުމީ ވާޖިބުގެ މަތީގައި ފުލުހުން ދެމި ތިބުމަށް ރައީސް އަބްދުﷲ ޔާމީން ރޭ އިލްތިމާސް ކުރައްވައިފި އެވެ.
ފުލުހުންގެ އަހަރީ ދުވަސް ފާހަގަ ކުރުމަށް ދަރުބާރު ގޭގައި ބޭއްވި ހަފްލާގައި ވާހަކަފުޅު ދައްކަވަމުން ރައީސް ވިދާޅުވީ ފުލުހުންގެ ގައުމީ ވާޖިބު އަދާކުރާ އިރު އެންމެން ހިތްހަމަ ޖެހޭ ގޮތަކަށް ކަންތައްތަކެއް ނުކުރެވޭނެ ކަމަށެވެ. އަދި ގާނޫނުގެ ހުކުމް ގާއިމްކޮށް މުޖުތަމައު އަމާން ކުރުމަށް ކުރާ މަސައްކަތުގައި ފުލުހުންނަށް ފާޑު ކިޔުންތަކާއި ގޮންޖެހުންތައް އަންނާނެ ކަމަށް ވެސް ރައީސް ވިދާޅުވި އެވެ. އަދި ރާއްޖޭގެ ހާލަތަށް ބެލުމެއް ނެތި ފުލުހުންނަށް ބޭރުގެ ފަރާތްތަކުން ފާޑުކިޔައި، ޕްރެޝަރު ކުރަމުން އަންނަ ކަމަށް ރައީސް ވިދާޅުވި އެވެ. ނަމަވެސް މި ރާއްޖޭގެ ހަމަޖެހުމާއި މިނިވަންކަން ދިފާއުކުރުމަށް ގުރުބާންވާން ތިބޭނީ ޔުނީފޯމު އެޅި މުއައްސަސާތަކުގެ މީހުން ކަމަށް ވެސް އެމަނިކުފާނު ވިދާޅުވި އެވެ. ރައީސް ވިދާޅުވި ގޮތުގައި ބޭރުގެ ފާޑުކިޔުންތަކަށް ވުރެ އެތެރޭގެ ހަމަޖެހުން ގާއިމް ކުރުން މާ މުހިންމެވެ.
"އެހެންވެ، އަޅުގަނޑު މުއައްސަސާތަކަށް ދަންނަވަން އޮތީ ތިބޭފުޅުންގެ ގައުމީ ހިދުމަތުގައި ތިއްބަވާށޭ. އެގޮތުގައި ތިއްބަވާ އިރު މުއައްސަސާތަކަށް އަޅުގަނޑު ގޮވާލާނީ ބޭރުން އަންނަ ޕްރެޝަރުތަކަށް ބީރު ކަންފަތެއް ދެއްވުމަށް. ބޭރުގެ ވާހަކަތަކަށް ބޯލެބުމަށް ވުރެ އަޅުގަނޑުމެންނަށް މުހިންމީ މި ގައުމުގެ އަމާންކަން ސުލްހަ މަސަލަސްކަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ، ސިޔާސީ ވަކި ބަޔަކަށް ކަންތައްތަކެއް ކޮށްދީ އެމީހުންގެ ފައިދާއަށް ގައުމުގެ ކަންކަން އަނބުރާލުމަށް ޓަކައި، ބޭރު ގައުމުތަކުގެ ސިފައިން ރާއްޖެ އައުމަށް ގޮވާލަމުން ދާ ދިވެހިން ތިބި ކަމަށެވެ. އަދި އެކަން ކުރައްވަނީ ރާއްޖޭގެ ފޮރިން މިނިސްޓަރުކަން ކުރައްވާފައިވާ ދެ ބޭފުޅަކު ކަން ފާހަގަ ކުރައްވައި ރައީސް ވިދާޅުވީ މިއީ ހިތާމަ ހުރި ކަމެއް ކަމަށެވެ. ރައީސް ވިދާޅުވި ގޮތުގައި މި ސަރުކާރަށް ނޫނީ ޚުދު އެމަނިކުފާނާ ދިމާލަށް ކޮންމެ ފަދަ ފާޑެއް ކިޔަސް އެއްވެސް ފަރުވާލެއް ނެތެވެ. އެކަމަކު ރާއްޖޭގެ މިނިވަންކަމާއި އިސްތިގުލާލު ގެއްލުވާލަން ގޮވޭ ގޮވުންތަކަށް ޖާގައެއް ނެތް ކަމަށް ރައީސް ވިދާޅުވި އެވެ. ރާއްޖޭގެ މިނިވަންކަމާއި އިސްތިގުލާލު ހިމާޔަތްކޮށް މުޖުތަމައު އަމާން ކުރުމަށް އަޅަން ޖެހުނު ކޮންމެ ފިޔަވަޅެއް އެޅުއްވުމަށް ރައީސް ވައުދުވެ ވަޑައިގެންނެވި އެވެ.
"އަޅުގަނޑުމެންގެ ތެރޭގައި ސިޔާސީ ހަމަނުޖެހުންމާއި ހިޔާލުތަފާތުވުން އޮތީމައި މުޅި ދައުލަތަށް އަސަރު ކުރަން ޖެހޭ ކަމެއް ނޫން އެއީ. ޑިމޮކްރަސީގެ ނަމުގައި މުޅި ގައުމަށް މިފަދަ މުސީބާތެއް [ބޭރުގެ ބަޔަކު މިތަނަށް ގެނައުމަށް ގޮވާލުމަކީ] ޖެއްސުމަށް ގޮވާލުމަކީ މައްސަލައެއް އަޅުގަނޑުމެން ހަނދާން ކުރަން ޖެހެނީ މިފަދަ ކަންތައްތަކާ ދެކޮޅަށް މަސައްކަތްކޮށް އެތައް ދިވެހިންނެއްގެ ފުރާނަ ވަނީ ގުރުބާންވެފައިކަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ޑިމޮކްރަސީ އާއި ހިޔާލުފާޅު ކުރުމުގެ ނަމުގައި މުޅި ގައުމު ހަލާކުކޮށް އަމާންކަން ނަގާލުމަކީ އެއްވެސް ގައުމެއްގައި ކަން ކުރާ ގޮތެއް ނޫނެވެ. އަދި ޑިމޮކްރަސީއާ އެކު ކުށުގެ އާ ބާވަތްތައް އުފަންވެ ކުށްކުރާ މަގުސަދުތައް ވެސް ތަފާތުވެފައިވާ ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވީ އެ ކަންތައްތައް ހުއްޓުވުމަށް ފުލުހުން ތިބެންވީ ފުރިހަމައަށް ތައްޔާރުވެގެންނެވެ. އަދި މި ސަރުކާރުން ފުލުހުންގެ މަސައްކަތަށް ފުރިހަމައަށް އެއްބާރުލުން ދެމުން ދާނެ ކަމުގެ ޔަގީންކަން ވެސް ރައީސް ދެއްވި އެވެ.