ދައުލަތުގެ މީޑިއާ، ހިންގާ، މޯލްޑިވްސް ބްރޮޑްކާސްޓިން ކޯޕަރޭޝަން (އެމްބީސީ) އުވާލައި އާ ކުންފުންޏެއްގެ ދަށުން ދައުލަތުގެ މީޑިއާ ހިންގުމުގެ ބިލެއް ރައްޔިތުންގެ މަޖިލީހަށް މިއަދު ހުށަހަޅައިފި އެވެ.
އެމްޑީއޭއަށް ނިސްބަތްވާ ހޯރަފުށީ ދާއިރާގެ މެންބަރު މުހައްމަދު އިސްމާއިލް ހުށަހެޅުއްވައި މަޖިލީހުގެ ފުރަތަމަ ކިއުން މިއަދު އިއްވި، "ޕަބްލިކް ސާވިސް މީޑިއާ"ގެ ބިލްގެ މަގުސަދުތަކުގެ ތެރޭގައި ބުނެފައި ވަނީ ނިއު މީޑިއާގެ ވަސީލްތައްތަކުގެ ބޭނުން ހިފައިގެން ޓީވީ އާއި ރޭޑިއޯ އަދި ނޫސް ހިންގުމަށް ހަރުދަނާ ޒަމާނީ ދައުލަތުގެ މީޑިއާއެއް ތަރައްގީކޮށް ހިންގުމެވެ.
ބިލްގައިވާ ގޮތުން، ގާނޫނަކަށްވެ އަމަލު ކުރަން ފަށާތާ 30 ދުވަހުގެ ތެރޭގައި ގަވަނިން ބޯޑް އެކުލަވާލަންޖެހެ އެވެ. އަދި ގަވަނިން ބޯޑަކީ ދައުލަތުގެ މީޑިއާގެ އެޑިޓޯރިއަލް ޕޮލިސީތަކާއި ބެހި ދުވަހުން ދުވަހަށް ހިނގާ ކަންކަމާ ބެހުމުގެ ބާރު އޮންނަ ބޯޑެއް ނޫން ކަމަށް ވެސް ބިލްގައިވެ އެވެ.