މުޒާހަރާތަކުގައި ގާނޫނާއި ޚިލާފް ކަންތައްތައް ކުރަމުންދާ ކަމަށް ބުނެ އަދާލަތު ޕާޓީ ޖޫރިމަނާ ކުރީ ކޮން ހެކިތަކެއްގެ މައްޗަށް ބުރަވެގެންތޯ ސާފުކޮށް ދިނުމަށް އެ ޕާޓީން އިލެކްޝަންސް ކޮމިޝަންސްގައި އެދިއްޖެ އެވެ.
އަދާލަތު ޕާޓީން އެގޮތަށް އެދިފައިވަނީ ސަރުކާރާ ދެކޮޅަށް އިދިކޮޅު ފަރާތްތަކުން މިހާރު ކުރަމުންދާ މުޒާހަރާތަކުގައި ޖިނާއީ ކުށްތަކަށް އަރައިގަނެ، އެފަދަ ކަންކަމަށް ހިތްވަރު ދެމުންދާ ކަމަށް ބުނެ އަދާލަތު ޕާޓީ 33،000ރ. އިން ޖޫރިމަނާކޮށްފައިވާތީ އެކަމާ ގުޅިގެން އެ ޕާޓީގެ ރައީސް ޝައިހް އިމްރާން އަބްދުﷲ އިލެކްޝަންސް ކޮމިޝަންގެ ރައީސަށް އިއްޔެ ފޮނުވި ސިޓީއެއްގަ އެވެ.
އެ ސިޓީގައިވަނީ އެ ޕާޓީއަށް އެނގިގެން ތަހުގީގު ކުރުމަކާ ނުލައި އެ ޕާޓީއާ މެދު އެ ފިޔަވަޅު އެޅީ ކޮން ހެކިތަކެއްގެ މައްޗަށް އަދި ކޮން ތަހުގީގެއްގެ މައްޗަށް ބިނާކޮށްގެންތޯ ސާފުކޮށް ދިނުން އެދޭ ކަމަށެވެ.
މީގެ އިތުރުން އެ ޕާޓީން ކުރަމުންދާ މުޒާހަރާތަކުގެ ތެރެއަށް ސަރުކާރަށް ނިސްބަތްވާ ފަރާތްތަކުން ވަދެ މުޒާހަރާ ކުރާ މީހުންނަށާއި ފުލުހުންގެ އިތުރުން މުދަލަށް ގެއްލުން ދެމުންދާއިރު އެކަމާ މެދު ފިޔަވަޅު ނާޅަނީ ކީއްވެގެން ކަމާ މެދު ވެސް އެ ސިޓީގައި ސުވާލު އުފައްދާފައިވެ އެވެ.