އަންނަ އާދީއްތަ ދުވަހުން ފެށިގެން ފުލުހުންގެ ޓްރެއިނިން ތަކަށް ކުއްތާތަށް ބޭނުންކުރަން ފަށާނެ ކަމަށް ފުލުހުން ބުނެފި އެވެ.
އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ޑްރަގް އެންފޯންސްމެންޓް ޑިޕާޓްމެންޓުގެ ހެޑް، ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ކުއްތާތައް ޓްރެއިނިން ހަދަމުންދާއިރު މާލެ ތެރެއިން ވެސް ފެނުން އެކަށީގެންވާ ކަމަށާއި އެހެންކަމުން އާންމު ރައްޔިތުންގެ އެއްބާރުލުމަށް އެދޭ ކަމަށެވެ.
ޝިފާން ވިދާޅުވީ މިހާރު ނެދަލޭންޑުގެ ފާމްއަކާއި ގުޅިގެން ދިވެހި ފުލުހުން، ކުއްތާ ގެންގުޅުމަށް ޓްރެއިން ކުރަމުން ދާ ކަމަށާއި މި ހަފްތާގައި ތިއަރީ ކްލާސްތައް ކުރިއަށް ދާނެ ކަމަށެވެ.
ހޯމް މިނިސްޓަރު ވިދާޅުވެފައިވާ ގޮތުގައި ކުއްތާތައް ބޭނުން ކުރާނީ، އެއާޕޯޓްތަކުގަ އާއި ޕޯޓްތަކުގަ އާއި މަސްތުވާތަކެތި ހޯދުމަށް ފުލުހުން ކުރިއަށް ގެންދާ އެކި އޮޕަރޭޝަންތަކުގަ އެވެ. އެގޮތުން ގޭގެ އާއި ރަށުގެ އެކި ތަންތަން ބަލައި ފާސްކުރުމުގައި ކުއްތާ ގެންގުޅޭނެ ކަމަށް ހޯމް މިނިސްޓަރު ވިދާޅުވެފައިވެ އެވެ.