މިދިޔަ މަހުން ފެށިގެން ދަތުރުތައް ހުއްޓާލާފައިވާ، މެގަ މޯލްޑިވްސްގެ ދަތުރުތައް އަލުން ފެށުމަށް ނިންމައި ބައެއް މުވައްޒަފުން ނަގަން ފަށައިފި އެވެ.
މެގަ މޯލްޑިވްސްގެ ދަތުރުތައް އަލުން ފެށުމުގެ ގޮތުން، ވަނީ ފްލައިޓް ދުއްވާނެ ޕައިލެޓުން ހޯދަން އިއުލާނުކޮށްފަ އެވެ. މިގޮތުން އެއާބަސް އޭ 320 އާއި އޭ 330 އަދި އޭ 340 ގެ ޓްރެއިނިން ކެޕްޓަނުން ހޯދަން ވަނީ އިއުލާނުކޮށްފަ އެވެ.
މެގަ މޯލްޑިވްސްގެ ދަތުރުތައް މިދިޔަ މަހުގެ ދެވަނަ ދުވަހު ހުއްޓާލާފައިވަނީ އެ ކުންފުންޏަށް ދިމާވެފައިވާ މާލީ ގެއްލުންތަކުގެ ސަބަބުން ކުންފުނި ރީސްޓްރަކްޗާ ކުރުމަށެވެ. މި ދަތުރުތައް ހުއްޓާލުމާއެކު އެ ކުންފުނިން ގެންގުޅުނުގެ ބޯޓުތައް ވެސް ފޮނުވާލާފައިވެ އެވެ.
ރާއްޖޭގެ ޓޫރިޒަމްގައި މުހިންމު ރޯލެއް އަދާކުރި އެއާލައިން ހުއްޓާލުމާއެކު، ރާއްޖޭގެ ވިޔަފާރިވެރިއަކު އެއާލައިންގެ ހިއްސާ ގަންނަން އުޅޭކަމަށް އަޑުތައް ފެތުރުނެވެ. ނަމަވެސް ފަހުން މެގަ މޯލްޑިވްސް އާއި އެ ވިޔަފާރިވެރިޔާ ވެސް ވަނީ އެކަން ދޮގުކޮށްފަ އެވެ.
މެގަ މޯލްޑިވްސްއިން ބުނެފައިވާ ގޮތުގައި އެ ކުންފުނިން އިތުރު ރައުސުލްމާލު ހޯދުމަށް މިދިޔަ އަހަރުން ފެށިގެން މަސައްކަތް ކުރަމުންދިޔަ ކަމަށެވެ.
އެމެރިކާ ކުންފުންޏަކާއި ދިވެހި ކުންފުންޏެއް ގުޅިގެން 2009 ގައި ފެށި މެގާ މޯލްޑިވްސްއިން ރާއްޖޭގައި އަށް އަހަރު ހިދުމަތް ދީފައިވެ އެވެ. އަދި ކުންފުނީގައި ފަސް ފްލައިޓެއް އޮޕަރޭޓް ކުރަމުން ގެންދިޔަ އެވެ. މި އެއާލައިނުން ވަނީ ރާއްޖޭގެ ޓޫރިޒަމަށް ގިނަ ބޮޑެތި އެހީތެރިކަމެއް ދީފަ އެވެ. ހާއްސަކޮށް ޗައިނީސް ޓޫރިސްޓުން އިތުރު ކުރުމުގައި މެގަ މޯލްޑިވްސްގެ ދަތުރު ބޮޑެވެ.