ސަރުކާރު ހިންގާ ޕާޓީ، ޕީޕީއެމްގެ ލީޑާޝިޕާ ރައީސުލްޖުމްހޫރިއްޔާ އަދި އެ ޕާޓީގެ މުސްތަޝާރު އަބްދުﷲ ޔާމީން އަބްދުލް ގައްޔޫމް ބައްދަލު ކުރައްވައިފި އެވެ.
ޕީޕީއެމްގެ މައި އޮފީހުން މިރޭ ބޭއްވި ބައްދަލުވުމުގައި ރައީސް ޔާމީން ބައްދަލު ކުރައްވާފައި ވަނީ އެ ޕާޓީގެ ނައިބު ރައީސުން ކަމަށްވާ، ޓޫރިޒަމް މިނިސްޓަރު މޫސާ ޒަމީރާއި ފޮނަދޫ ދާއިރާގެ މެންބަރު އަބްދުއް ރަހީމް އަބްދުﷲ އަދި ޕީޕީއެމްގެ ސެކްރެޓަރީ ޖެނެރަލް އަބްދުﷲ ހަލީލްގެ އިތުރުން ޕީޖީ ލީޑަރު އަހުމަދު ނިހާން ހުސެން މަނިކާއި ޑެޕިއުޓީ ޕީޖީ ލީޑަރު އިބްރާހިމް ފަލާހުއާ އެވެ. ނަމަވެސް އެ ބައްދަލުވުމުގައި މަޝްވަރާކުރައްވާފައި ވަނީ ކޮން ކަން ކަމަކާ ގުޅޭ ގޮތުން ކަމެއް ސާފެއް ނުވެ އެވެ.
ޕީޕީއެމްގެ ލީޑާޝިޕްއާ ރައީސް ޔާމީން ބައްދަލު ކުރެއްވި އިރު ޕީޕީއެމް ތަމްސީލު ކުރައްވާ ބައެއް މަޖިލިސް މެންބަރުން އިދިކޮޅު ފަރާތްތަކާ ގުޅިގެން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ފާސް ކުރަން މަސައްކަތް ކުރާ ކަމަށް ބުނާ މައްސަލަ އެއް ވަނީ ބަހުސަކަށް ވެފައެވެ.
