އެސްޓީއޯ މާލޭ ލީގުގެ ފަހު ތިން މެޗަށްެ ކްލަބުތައް ކުރިމަތިލާއިރު، ގަދަ ހަތަރެއްގެ ވާދަވެރިކަން ވަނީ ބޮޑުވެފަ އެވެ. ތާވަލްގެ އެއްވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ދެވަނައިގައި އޮތް ނިއު ރޭޑިއަންޓް ފިޔަވައި އެހެން ކްލަބަަކަށް އަދި ގަދަ ހަތަރެއްގެ ޔަގީންކަމެއް ނެތެވެ. ގަދަ ހަތަރެއް ބައްޓަން ވާނެ ގޮތް އެނގޭނީ ލީގުގެ ފަހު ތިން މެޗުންނެވެ.
ތާވަލްގެ އެއްވަނައިގައި މާޒިޔާ އޮތީ 25 ޕޮއިންޓާއެކު އެވެ. ދެވަނައިގައި ނިއު އޮތީ 24 ޕޮއިންޓާއެކު އެވެ. ތިން ވަނައިގައި ކްލަބް އީގަލްސް އޮތީ 20 ޕޮއިންޓާއެކު އެވެ. މި ސީޒަންގައި އަލަށް ފުރަތަމަ ޑިވިޝަންގައި ވާދަކުރާ ގްރީން ސްޓްރީޓްސް ހަތަރު ވަނައިގައި އޮތީ 18 ޕޮއިންޓާއެކު އެވެ. އަށާރަ ޕޮއިންޓާއެކު ފަސް ވަނައިގައި އޮތީ ވިކްޓަރީ އެވެ. ޓީސީ ހަ ވަނައިގައި އޮތީ 15 ޕޮއިންޓާއެކު އެވެ. ހަތް ވަނައިގައި ތިން ޕޮއިންޓާއެކު ޔުނައިޓެޑް ވިކްޓަރީ އޮތްއިރު، ތާވަލްގެ ފުލުގައި ދެ ޕޮއިންޓާއެކު އޮތީ ވެލެންސިއާ އެވެ. ޔުނައިޓެޑް ވިކްޓަރީ އާއި ވެލެންސިއާ އަށް ވަނީ ގަދަ ހަތަރެއްގެ ފުރުސަތު ގެއްލިފަ އެވެ.
މި ސީޒަންގައި މާލޭ ލީގުގެ ގަަދަ ހަތަރެއްގެ ޖާގަ ހޯދާ ކްލަބުތަކަށް ދިވެހި ޕްރިމިއާ ލީގުގެ ޖާގައެއްގެ އިތުރުން އެއް މިލިއަން ރުފިޔާ ލިބޭނެ އެވެ. އެހެންކަމުން މާލީ ގޮތުން ބަލާއިރު ވެސް، ގަދަ ހަތަރެއްގެ ޖާގައެއް ކްލަބުތަކަށް މުހިންމެވެ. ލީގުގައި ބާކީ ތިން މެޗު އޮތްއިރު، ގަދަ ހަތަރެއްގެ ޖާގައަކަށް ވާދަކުރަނީ އީގަލްސް، ގްރީން ސްޓްރީޓްސް، ވިކްޓަރީ އަދި ޓީސީ ސްޕޯޓްސް އެވެ.
"އެއްވެސް ޓީމަކަށް ޔަގީންކަމާއެކު ނެތް ބުނެވޭކަށް މިހާރު ގަދަ ހަތަރެއް ޔަގީންކަމާއެކު،" ގްރީން ސްޓްރީޓްސްގެ ކޯޗު ސޮބާހު މުހައްމަދު ބުންޏެވެ. "ވަރަށް ޓައިޓްކޮށް މި އޮތީ. ޕްރެޝަރު މެޗުތަކެއް ބާކީ އޮތީ ކޮންމެ ޓީމަކަށް ވެސް."
މި އަހަރު އަލަށް ފުރަތަމަ ޑިވިޝަންގައި ވާދަކުރަން ފެށި ގްރީން ސްޓްރީޓްސް މާލޭ ލީގުގެ ގަދަ ހަތަރަކަށް ވާދަކުރާނެ ކަމަށް ކުރިން ނުބެލެވެ އެވެ. އެކަމަކު އެ ޓީމުން ވަނީ މި ސީޒަންގައި ރަނގަޅު ނަތީޖާތަކެއް ނެރެ، ގަދަ ހަތަރެއްގެ "ކޮންޓެންޑާ" އަކަށްވެފަ އެވެ.
ލީގުގައި ގްރީން ސްޓްރީޓަށް ބާކީ އޮތީ ޔުނައިޓެޑް ވިކްޓަރީ، މާޒިޔާ އަދި އީގަލްސްއާ ދެކޮޅަށް ކުޅެންޖެހޭ މެޗެވެ. ލީގުގައި މިއަދު ހަވީރު ޔުނައިޓެޑް ވިކްޓަރީއާ ދެކޮޅަށް ގްރީން ސްޓްރީޓްސް ކުޅޭ މެޗުން ގްރީން ސްޓްރީޓްސް މޮޅުވެއްޖެ ނަމަ، އެ ޓީމަށް ގަދަ ހަތަރެއްގެ އުންމީދު ބޮޑުވާނެ އެވެ.
މިދިޔަ އަހަރު ޕްރެޒިޑެންޓްސް ކަޕް ކާމިޔާބުކުރި ކްލަބު އީގަލްސް އަށް ބާކީ އޮތީ އުނދަގޫ ތިން މެޗެވެ. ލީގުގައި މާދަމާ ޓީސީއާ ދެކޮޅަށް އީގަލްސް ނުކުންނައިރު، އެ މެޗަށް ފަހު އީގަލްސް ވާދަކުރަން ޖެހޭނީ ނިއު އައި ގްރީން ސްޓްރީޓްސްއާ އެވެ.
ލީގުގައި މާދަމާ ރޭ އީގަލްްސް އާއި ޓީސީ ބައްދަލުކުރާ މެޗަކީ ފޯރިގަދަ މެޗަކަށްވާނެ އެވެ. މި މެޗުން މޮޅުވެއްޖެ ނަމަ، އީގަލްސް އަށް ގަދަ ހަތަރެއްގެ އުންމީދު ބޮޑުވާނެ އެވެ. ބަލިވެއްޖެ ނަަމަ، އެ ޓީމު އިތުރު ޕްރެޝަރަކަށްދާނެ އެވެ. ޓީސީ އަށް މި މެޗުން ތިން ޕޮއިންޓް ވަރަށް މުހިންމެވެ. ޓީސީ މޮޅުވެއްޖެ ނަމަ، އެ ޓީމަށް ގަދަ ހަތަރެއްގެ ރޭހުގައި ދެމި އޮވެވޭނެ އެވެ. އެކަމަކު ބަލިވެއްޖެ ނަމަ، ގަދަ ހަތަރެއްގެ ފުރުސަތު އެ ޓީމަށް ހަނިވާނެ އެވެ.
ސީޒަންގެ ކުރީކޮޅު ނަތީޖާތައް ދަށްވިޔަސް، މި ފަހުން ކުޅުނު މެޗުތަކުގައި ނަތީޖާތައް ރަނގަޅުކޮށް ވިކްޓަރީ ވަނީ ގަދަ ހަތަރެއްގެ ރޭހުގައި ފައި ހަރުކޮށްލައިފަ އެވެ. ވިކްޓަރީ އަށް ލީގުގައި ބާކީ އޮތީ ނިއު އާޢި ވެލެންސިއާ އަދި ޓީސީއާ ދެކޮޅަށް ކުޅޭ މެޗެވެ. ލީގުގައި މިއަދު ހަވީޜު ނިއުއާ ދެކޮޅަށް ކުޅޭ މެޗުން މޮޅުވެއްޖެ ނަމަ، ވިކްޓަރީ އަށް ގަދަ ހަތަރެއްގެ އުންމީދު ބޮޑުވާނެ އެވެ.
