މެންޗެސްޓާ ޔުނައިޓެޑްގެ ފޯވަޑް ވޭން ރޫނީ އޭނާގެ ކުރީގެ ކްލަބް އެވަޓަން އަށް ބަދަލުވެއްޖެ އެވެ.
އެވަޓަން ދޫކޮށް މީގެ 13 އަހަރު ކުރިން ޔުނައިޓެޑަށް ބަދަލުވި ރޫނީ ،31، އެ ކްލަބު ދޫކޮށްލިއިރު، އޭނާ ވަނީ އެ ކްލަބުގެ ތާރީހުން ޖާގަ ހޯދައިފަ އެވެ. ޔުނައިޓެޑްގެ ކެޕްޓަންގެ ގޮތުގައި ރޫނީ އެ ކްލަބާ ދުރަށް ދިޔައިރު، އޭނާ އަކީ ކްލަބުގެ ތާރީހުގައި އެންމެ ގިނަ ލަނޑު ޖެހި ކުޅުންތެރިޔާ އެވެ. ރޫނީ ޔުނައިޓެޑަށް ކުޅުނު 559 މެޗުގައި އޭނާ ވަނީ 253 ލަނޑު ޖަހައިފަ އެވެ.
ޔުނައިޓެޑާއެކު ރޫނީ ވަނީ ޕްރިމިއާ ލީގު ފަސް ފަހަރު ހޯދައިފަ އެެވެ. މީގެ އިތުރުން އެފްއޭ ކަޕާއި ޗެމްޕިއަންސް ލީގު އަދި ޔޫރޮޕާ ލީގު ވެސް ހޯދި އެވެ.
އެވަޓަންގެ ޔޫތު އެކެޑަމީން ނިކުތް ރޫނީ އެ ކްލަބަށް އެނބުރި ދިޔައީ ހިލޭ ޓްރާންސްފާއެއްގަ އެެވެ. އަދި އޭނާ ވަނީ އެ ކްލަބާއެކު ދެ އަހަރުު ދުވަހުގެ އެއްބަސްވުމެއް ހަދައިފަ އެވެ.
"މި ކްލަބަށް އެނބުރި މި ބަދަލުވި ހަމައެކަނި ސަޕޯޓްކުރާ ޓީމަށްވާތީ އެއް ނޫން. މި ކްލަބަކީ ކުރިއަށް ދެވޭ ފެންވަރުގެ ކްލަބެއްގެ ގޮތުގައި އަހަންނަށް ގަބޫލްކުރެވޭތީ،" ރޫނީ ބުންޏެވެ. "މި ކްލަބަށް ކާމިޔާބު ހޯދައިދެވޭނެ ކަމަށް ގަބޫލްކުރެވޭ."
ރޫނީ ބުނީ އެވަޓަން އިން އެނާ ބޭނުންވާކަން އެނގުނު ހިސާބުން "އެހެން ކްލަބަކަށް ދާން ހިޔާލު ވެސް ނުކުރާ" ކަމަށެވެ.
ރޫނީ އެވަޓަންގެ ކޮންޓުރެކްޓްގައި ސޮއިކުރަނީ. -- ފޮޓޯ: ބީބީސީ