އޭނާގެ ހަޔާތުގައި، ފެނުނު ކުޅުންތެރިންގެ ތެރެއިން އެންމެ ބޮޑަށް ޕްރޮފިޝަނަލް ކުޅުންތެރިޔާއަކީ، މާޒިޔާ ގެ ކެޕްޓަން އަސަދުﷲ އަބްދުﷲ (އަސައްކޮ) ކަމަށް، މާޒިޔާގެ ކޯޗް މެސަޑޯނިއާގެ މަރުޔަން ސެކޮލޮސްކީ ބުނެފި އެވެ.
އޭއެފްސީ ކަޕްގައި މޮޅު ކުޅުމެއް ދެއްކި ނަމަވެސް، މިވަގުތު އަސަދުﷲ ގެ ފަރާތުން އޭނާގެ އަސްލު ފޯމު ނުފެނެ އެވެ. ސެކޮލޮސްކީ ބުނީ، މި ސީޒަންގައި އެންމެ ގިނަ މެޗު ކުޅުނު ކުޅުންތެރިޔަކީ އަސަދުﷲ ކަމަށާއި އޭއެފްސީ ކަޕަށް ފަހު އޭނާ އަށް ބްރޭކެއް ލިބުނު ނަމަ އޭނާގެ އެ ޕާފޯމަންސް ދެމި އޮތިސް ކަމަށެވެ.
"މިހާރު އޭނާ ދަނީ ވަރަށް ބުރަކޮށް މަސައްކަތް ކުރަމުން، ގަބޫލު ކުރޭ އޭނަ އަމިއްލައަށް ވެސް ވަރަށް ބުރަކޮށް މަސައްކަތް ކުރޭ، އޭނާ އަކީ އަހަރެންގެ ހަތާރުގައި ފެނުނު އެންމެ ބޮޑަށް ޕްރޮފިޝަނަލް ކުޅުންތެރިޔާ، އޭނާ ޓީމަށް ޓަކައި ވަރަށް ބުރަކޮށް މަސައްކަތް ކުރޭ، މިވަގުތަށް އޭނާ އަށް ބޭނުންވަނީ އެންމެ ގޯލެއް އެއަށް ފަހު އޭނާގެ ފަރާތުން ގޯލް ފެނިގެންދާނެ،" ސެކްލޮސްކީ ބުންޏެވެ.
މިއަދު ހަވީރު ގްރީން ސްޓްރީޓާ ދެކޮޅަށް ކުޅޭ މެޗުގައި އަސަދުﷲ އަށް ނުކުޅެވޭނެ އެވެ. އޭނާ އަށް ވަނީ ދެ ރީނދޫ ކާޑު ހަމަވެފަ އެވެ. ސެކޮލޮސްކީ ގަބޫލު ކުރާ ގޮތުގައި މިއަދު ނުކުޅެ ކުރިއަށް އޮތް އަންނަ މެޗަށް އަސައްކޮ ފްރެޝްކޮށް ހުންނާނެ އެވެ. އޭނާ ބުނީ މާލޭ ލީގް ކުރިއަށް ހުރި މެޗުތައް އިންޖަރީ ނުވެ އަސައްކޮ އާއި މުހައްމަދު އުމޭރު ނިންމާލައިފިނަމަ އެއަށްފަހު އެ ކުޅުންތެރިންގެ ފަރާތުން ކުރީގެ ޕާފޯމަންސް އަލުން ފެންނާނެ ކަމަށެވެ.
"މިވަގު އަސައްކޮ އަށް އެންމެ ރަނގަޅީ އިންޖަރީ ނުވެ ނިންމާލުން، އޭރުން މާލޭ ލީގަށް ފަހު އޭނާގެ ފަރާތުން ރަނގަޅު ކުޅުމެއް ފެނިގެންދާނެ، އަސަދުﷲ، އުމޭރު، [އަސްހަދު އަލީ] އަޑޭ، [އަމްދާން އަލީ] އެންޑީ މީ އަހަރެމެންގެ އެންމެ ޕްރެޝާގައި ކުޅޭ ކުޅުންތެރިން ބޮޑު އިންޖަރީއެއް ނުވެ، ނިންމާ ލެވިއްޖެނަމަ އަހަންނަށް ވަރަށް ބޮޑު ހިތްހަމަ ޖެހުމަކަށް ވާނެ، މާލޭ ލީގަށް ފަހު އެކުޅުންތެރިންގެ ފަރާތުން ކުރީގެ ފޯމަށް އަންނާނެ."
މިއަދުގެ ގެ މެޗުގައި އަސަދުﷲ ނެތްތަން ފޫބެއްދުމަށް، ސެކޮލޮސްކީ ނެރޭނީ ދެ ވަނަ ސްޓައިކަރެވެ. ގްރީން ސްޓްރީޓްގެ ކޯޗް ސޮބާހް މުހައްމަދު ބުނީ، އަސަދުﷲ ނުކުޅެވުނަސް އެ މަގާމު ފޫބައްދަން ގައުމީ ޓީމުގެ ކުޅުންތެރިޔަކު މާޒިޔާގައި ހުންނާނެ ކަމަށެވެ.
ސެކޮލްސްކީ ބުނީ، މާލޭ ލީގް ކާމިޔާބު ކުރުމުގެ ރޭސް މިހާރު މާބޮޑަށް އުނދަގޫ ވެއްޖެ ކަމަށެވެ. އެންމެ ފަހުން ވެލެންސިއާ ދެކޮޅަށް ކުޅުނު މެޗުން މާޒިޔާއަށް ލިބުނީ ޕޮއިންޓެކެވެ.