ކުލަބު އީގަލްސް އަތުން 1-1 އެއްވަރުވެ، ތާވަލުގެ އެއް ވަނަ އަށް އަރަން ލިބުނު ފުރުސަތު ނިއުރޭޑިއަންޓުން ގެއްލުވާލައިފި އެވެ. އީގަލްސް މޮޅުވި ނަމަ، އެ ޓީމަށްވެސް ތާވަލުގެ ތިން ވަނައަށް އަލުން އެރޭނެ އެވެ.
މެޗު އެއްވަރު ވުމުން، ނިއު އަށް ވަނީ، މިއަދު ގްރީން ސްޓްރީޓް އަތުން ބަލިވި މާޒިޔާއާ ޕޮއިންޓްގެ ގޮތުން އެއްވަރު ވެފަ އެވެ. ދެ ޓީމަށް ވެސް ލިބިފައި ވަނީ 26 ޕޮއިންޓެވެ. ނަމަވެސް، މާޒިޔާއަށް ގޯލްގެ ތަފާތުން ކުރި ލިބޭތީ، ތާވަލުގެ އެއް ވަނަ މާގާމުގައި އޮތީ މާޒިޔާ އެވެ.
ނިއުގެ ކޯޗް އޮސްކާ ބުރުޒޮން ބުނީ، މެޗު ދިޔަ ގޮތުން ބަލި ނުވެ ސަލާމަތްވުމަކީވެސް ލިބުނު ހިތްހަމަ ޖެހުމެއް ކަމަށެވެ. އީގަލްސް އާއި ނިއު ފުރަތަމަ ބުރުގައި ކުޅުނު މެޗު އީގަލްސް ކާމިޔާބު ކުރީ، 1-0 ން ނެވެ. މިރޭ ގެ މެޗުގައިވެސް، ފުރަތަމަ ލީޑް ނެގީ އީގަލްސްއިން ނެވެ. މެޗުގެ 67 ވަނަ މިނެޓްގައި، އެ ޓީމުން ނެގި ކޯނަރަކުން އެ ބޯޅަ ކާމިޔާބު ކުރީ، މުހައްމަދު ނާއިމް އެވެ. ދެ ވަނަ ހާފުގައި، އޭގެ ކުރިންވެސް އީގަލްސްއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިގެން ގޮސްފަ އެވެ. ކެޕްޓަން އިމްރާން ނަޝީދަށް ޕެނަލްޓީ އޭރިއާ ތެރެއިން ލިބުނު ބޯޅަ ދިޔައީ ގޯލާ މާ ދުރަށެވެ.
ފުރަތަމަ ހާފުގައި، ދެ ޓީމަށްވެސް މާ ހުސް ފުރުސަތެއް ލިބިފައެއް ނުވެ އެވެ. ނަމަވެސް، އީގަލްސްގެ ޕެނަލްޓީ އޭރިއާ ބޭރުން، އެޑްރިއަން ގަލާޑޯ ފޮނުވާލި ބޯޅަ، ގޯލްގެ ކަނަށް އަމާޒުވާން ދިޔަ ނަމަވެސް އެ ބޯޅަ، އީގަލްސްގެ ކީޕަރު ސޫޖަން ޕެރޭރާ ވަނީ ދިފާއު ކޮށްފަ އެވެ.
ދެ ވަނަ ހާފަުގައި، އީގަލްސްގެ ޕެނަލްޓީ އޭރިއާ ބޭރުން ހުޅަނގު ފަރާތުން ލިބުނު ހިލޭ ޖެހުމެއްގައި އަލީ ފާސިރު (ސެންޓޭ) ފޮނުވާލި ހިލޭ ޖެހުން ވެސް، ނުރައްކާކޮށް ދިޔަ ނަމަވެސް ސޫޖަން ވަނީ އެ ބޯޅަ ކޯނަރަކަށް ބޭރު ކޮށްލާފަ އެވެ. ނިއުގެ ލަނޑަކީ، ލިބުނު ޕެނަލްޓީ އަކުން ގަލާޑޯ ކާމިޔާބު ކުރި ލަނޑެކެވެ.
އެ ޕެނަލްޓީ، އަކީ އީގަލްސްގެ ޕެނަލްޓީ އޭރިއާ ތެރެއިން، އެ ޓީމުގެ ކުޅުންތެރިޔަކު ސެންޓޭ އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ. މި ޕެނަލްޓީއިން އީގަލްސް ކޮޅަށް، ނިއު އިން ޖެހި ގޯލަކީ، މާލޭ ލީގްގެ ދެ ވަނަ ބުރުގައި އީގަލްސް ކޮޅަން ވަން ފުރަތަމަ ލަނޑެވެ.
ލަނޑަށް ފަހުވެސް އީގަލްސްގެ ކުޅުންތެރިން ވަނީ ހަމަލާ އުފައްދަން މަސައްކަތް ކޮށްފަ އެވެ. އެގޮތުން އެޓީމުން ވަނީ ހިލޭ ޖެހުމެއްގައި ނިއު އަށް ސިހުން ގެނުވާފަ އެވެ. ޕެނަލްޓީ އޭރިއާ ބޭރުން ލިބުނު ހިލޭ ޖެހުން، އަހްމަދު ރިޒްވާން އިސްމާއީލް (ރިޒޭ) ފޮނުވާލި ބޯޅަ، ސަލަމާތް ކުރީ އަނިޔާގެ ސަބަބުން މެޗުގައި ނުކުޅެވުނު އެއް ވަނަ ކީޕަރު އިމްރާންގެ ބަދަލުގައި ގޯލް ބެލެހެއްޓި އަބްދުﷲ ޒިޔަޒަން އެވެ. ޒިޔަޒަން އެ ބޯޅަ ސަލާމަތް ކުރީ ގޯލް ލައިން މަތިން ކަހަލަ ގޮތަކަށެވެ.