ރައްކާތެރި ގޮތުގައި ކުނި ނައްތާލައި ސާފުވެއްޓެއް ގާއިމްކުރުމަށް މީހުން ހޭލުންތެރި ކުރަން ބާއްވާ މަހާސިންތާ 2017 ގއ. ވިލިގިލީގައި މިއަދު ހެނދުނު ފަށައިފި އެވެ.
ސަރަހައްދީ މަހާސިންތާ 2017 ވިލިގިލީގައި މިއަދު ހެނދުނު 8:00 ގައި ފަށައިފި އެވެ. ތިން ދުވަހުގެ މުއްދަތަށް ކުރިއަށް ގެންދާ މަހާސިންތާގައި ގއ އަތޮޅާއި ގދ، ޏ އަދި ސ މި ހަތަރު އަތޮޅުގެ 100 އެންހާ މަންދޫބުން ބައިވެރިވެފައި ވެއެވެ. މަހާސިންތާގެ އެންމެ ބޮޑު ބޭނުމަކީ ހަތަރު އަތޮޅުތަކުގެ ރަށްރަށުގައި ރަށުފެންވަރުގައި ކުނި މެނޭޖު ކުރާނެ ރަނގަޅު ޕްލޭންތައް އެކުލަވާލުން ކަމަށް އެންވަޔަރަންމަންޓް މިނިސްޓުރީން ބުންޏެވެ.
މަހާސިންތާ ހުޅުވުމުގެ ރަސްމިއްޔާތުގައި އެންވަޔަރަންމަންޓް މިނިސްޓްރީގެ ނައިބު އަލީ އާމިރު ވިދާޅުވި ޓޫރިޒަމާއި މަސްވެރިކަން ތަރައްގީކޮށް ކުރިއެރުވޭނީ ދިވެހިރާއްޖެއަކީ ސާފުރާއްޖެއަކަށް ހަދައިގެންކަން ރައްޔިތުންނަށް ގަބޫލުކުރެވެމުންދާ ކަމަށެވެ. އަދި ސަރުކާރުން ދަނީ ރާއްޖޭގެ ހުރިހާ ރަށެއްގައި ކުނިކޮށި ހަދައިދިނުމުގެ ކާމިޔާބު މަސައްކަތްތަކެއް ކުރަމުން ކަމަށާއި އެ މަޝްރޫއު 2018 ގެ ނިޔަލަށް ނިންމާލެވޭނެ ކަމަށް އާމިރު ވިދާޅުވި އެވެ.
މަހާސިންތާގައި ކުނި މެނޭޖު ކުރުމުގެ ގައުމީ ސިޔާސަތާ ބެހޭ މައުލޫމާތު އާމިރު ވަނީ ބައިވެރީންނަށް ސާފުކޮށްދެއްވާފަ އެވެ. އަދި ކުނި މެނޭޖު ކުރުމާ ބެހޭ ގޮތުން އެކުލަވާލާފައިވާ ގާނޫނަށް ބައިވެރިންގެ ހިޔާލު ހޯދައި އެ ގާނޫނު ވަނީ އެޓަރނީ ޖެނެރަލްގެ އޮފީހަށް ވެސް ފޮނުވާފައި އެވެ.