މި ސީޒަންގައި، ވިކްޓަރީއަށް ކުޅުނު ތިން ކުޅުންތެރިން ކަމަށްވާ، އެ ޓީމުގެ ކެޕްޓަން، އިސްމާއިލް އީސަ އާއި އެ ޓީމުގެ ގޯލްކީޕަރު ސީރިޔާގެ މަހްމޫދު އަލް ޔޫސުފް އަދި، ސްޓައިކަރު އަންދުރޭ ކެރިޗް، ސީޒަންގެ ބާކީ އޮތްބައިގައި މާޒިޔާއަށް ކުޅެން ސޮއި ކޮށްފި އެވެ.
ކީޕަރު މަހްމޫދު ގެނައުމުގެ ކުރިން، މާޒިޔާ އިން ވަނީ އެ ޓީމުގެ ކީޕަރަކަށް ހުރި، ކިރިގިސްތާންގެ އެއްވަނަ ކީޕަރު ޕަވެލް މަޓިއަޝްއާ އެކު ހަދާފައިވާ ކޮންޓްރެކްޓް އުވާލާފަ އެވެ.
މާޒިޔާއިން ބުނީ، މަޓިއަޝްގެ ކޮންޓްރެކްޓް އުވާލީ، އަމިއްލަ ކަމެއް ދިމާވެ، އޭނާ ދާން އެދުމުން ކަމަށެވެ. އެ ޓީމުން ބުނީ މަޓިއަޝްގެ ކެރިއަރުގައި އޭނާ އަށް ކާމިޔާބަށް އެދޭ ކަމަށެވެ.
"އާ ކީޕަރަކު ގެނައުމުގެ ބަދަލުގައި އަޅުގަނޑުމެން ބެލީ، އަޅުގަނޑުމެންނަށް މިހާރުވެސް ފެންވަރު އެނގޭ ކީޕަރެއް ގެނައުމަށް، އެގޮތުން މަހްމޫދު ގެންނަން ނިންމީ." މާޒިޔާގެ އޮފިޝަލަކު ބުންޏެވެ.
އީސަ އަލުން މާޒިޔާއާ ގުޅުނު އިރު، އޭނާ ވަނީ މިދިޔަ ސީޒަންގައި މާޒިޔާއަށް ކުޅެފަ އެވެ. އަދި މިދިޔަ އަހަރު އޭނާ އަކީ މާޒިޔާގެ ވައިސް ކެޕްޓަން ވެސް މެއެވެ.
ކެރިޗް، މާޒިޔާއަށް ގެނައީ، އެ ޓީމުގެ ފޯވަޑް ލައިން ވަރުގަދަ ކުރުމަށެވެ. ސީޒަންގައި، އެޓީމުގެ ފޯވަޑްލައިން ބަލަހައްޓާފައި ވަނީ ސާބިއާގެ އެލގެޒެންޑާ ރެކިސިޗެވެ. ނަމަވެސް މާޒިޔާއިން ވަނީ އޭނާ އެއްބަސްވުން އުވާލައި އޭނާ ރަށަށް ފޮނުވާލާފަ އެވެ.