ހައްޔަރު ކޮށްފައިވާ ރައްޔިތުން މަޖިލީހުގެ މެންބަރުން ދޫކޮށްލުމަށް ގޮވާލައި ގއ. ވިލިނގިލީގައި މިއަދު މުޒާހަރާއެއް ކޮށްފި އެވެ.
މިއަދު ހަވީރު ވިލިނގިލީގައި ބޭއްވި މުޒާހަރާގައި ހައްޔަރު ކޮށްފައިވާ މެންބަރުން ކަމަށްވާ ސައުދު ހުސެއިނާއި މުހައްމަދު އަމިތާއި މުހައްމަދު ވަަހީދުގެ އިތުރުން ދިއްގަރު ދާއިރާގެ މެންބަރު ފާރިސް މައުމޫން ދޫކޮށްލުމަށް ވެސް ގޮވާލާފައި ވެއެވެ. އަދި ރައްޔިތުން މަޖިލީހުގެ ރައީސް އަބުދުﷲ މަސީހު މުހައްމަދު އިސްތިއުފާ ދިނުމަށްވެސް މުޒާހަރާގެ ބައިވެރިން ގޮވާލާފައި ވެއެވެ.
އެ މުޒާހަރާގައި އެރަށު ކައުންސިލްގެ އިސްބޭފުޅުންނާއި ގއ. އަތޮޅު ކައުންސިލްގެ ބޭފުޅުންގެ އިތުރުން އެރަށުގެ އާންމުން ވަނީ ބައިވެރިވެފަ އެވެ. މުޒާހަރާ ކުރިއަށް ގެންގޮސްފައިވަނީ އެރަށުގެ ބޮޑެތި މަގުތަކުގައި އެވެ.
ސައުދު ހައްޔަރު ކުރުމާއި ގުޅިގެން ވިލިނގިލި ކައުންސިލުން މިއަދު ވަނީ ސައުދު ދޫކޮށްލުމަށް ގޮވާލައި ބަޔާނެއްވެސް ނެރެފަ އެވެ.