އިސް މަގާމުތަކަށް އަންހެނުން އިސް ކުރުމާ ގުޅޭ ގޮތުން އުފެދުނު ބަހުސްގައި އަންހެނުންގެ ދިފާއުގައި ހެލްތް މިނިސްޓްރީގެ ސްޓޭޓް މިނިސްޓަރު ދުންޔާ މައުމޫން ވާހަކަ ދައްކަވައިފި އެވެ.
ސަރުކާރުގެ ވަރަށް އިސް މަގާމުތައް ފުރުއްވަވާފައިވާ ދުންޔާ ވިދާޅުވީ، އިސް މަގާމުތައް އަންހެނުން ފުރުމަށް އިސްލާމް ދީނާއި ރާއްޖޭގެ ގާނޫނުތައް ވެސް ހުރަސް ނާޅާ ކަމަށެވެ. އަދި އަންހެނުންނަކީ އެ މަގާމުތަކަށް ގާބިލު ބައެއްކަން ސާބިތުކޮށްދީފައިވާ ކަމަށެވެ.
މިހާރު ވެސް ރާއްޖޭގެ ވަރަށް އިސް މަގާމުތަކެއްގައި އަންހެން ބޭފުޅުން ތިއްބަ އެވެ. އަންހެނުން އިސް މަގާމުތައް ފުރުމާ ގުޅޭ ގޮތުން ބަހުސްއެއް ފެށިފައިވަނީ އާޒިމާ ޝުކޫރު ސުޕްރީމް ކޯޓުގެ ފަނޑިޔާރު ކަމަށް ގެންނަން އުޅޭ ވާހަކައަށް އިޝާރަތް ކުރައްވައި އަންހެން ފަނޑިޔާރުކަން ކުރުން އިސްލާމް ދީން ހުއްދަ ނުކުރާ ކަމަށް ރޭ ކުރީގެ އިސްލާމިކް މިނިސްޓަރު ޑރ.އަބްދުލް ބާރީ އަބްދުލް މަޖީދު ވިދާޅުވުމާ ގުޅިގެންނެވެ.
އެހެން ބާރީ ވިދާޅުވީ، ކުރީގެ ރައީސް މައުމޫން އަބްދުލް ގައްޔޫމްގެ ވެސް ކުރިފުޅުމަތީގަ އެވެ. ރައީސް މައުމޫންގެ ވެރިކަމުގައި ވެސް އަންހެން ބޭފުޅުންނަށް ފަނޑިޔާރުކަން ދެއްވާފައިވެ އެވެ. ދުންޔާ ވިދާޅުވީ، ރާއްޖޭގެ ފުރަތަމަ އަންހެން ފަނޑިޔާރު އައިޝާ ޝުޖުނެ އަދި ހުޒެއިފާ މުހައްމަދު އައްޔަންކުރެއްވީ ރައީސް މައުމޫން ކަމަށެވެ. އަދި އެކަމަށް އދ.އިން ރާއްޖެއަށް ތައުރީފުކުރައްވާފައިވާކަން ދުންޔާ ފާހަގަކުރެއްވި އެވެ.
ރޭ ރައީސް މައުމޫން ވެސް އަންހެނުންގެ ދިފާއުގައި ޓްވީޓެއް ކުރައްވާފަ އެވެ. ރައީސް މައުމޫން، ވިދާޅުވީ، ސިޔާސީ އަދި ޝަރުއީ ދާއިރާގެ މަގާމުތައް އަންހުންނަށް ފުރޭނެ ކަމުގެ ހެކި އިސްލާމީ ޝަރީއަތުން ފެންނަން އެބަހުރި ކަމަށެވެ. ރައީސް މައުމޫން މީގެކުރިން ވެސް އެ މައުލޫގައި ވާހަކަފުޅު ދައްކަވާފައިވެ އެވެ. އަދި ޑރ. އަފްރާޝީމް އަލީ، އަންހެނުން އެންމެ އިސް މަގާމުތައް ފުރުއްވުމާ ގުޅޭ ގޮތުން ލިޔުއްވާފައިވާ ފޮތެއް ވެސް ރައީސް މައުމޫން ދާދިފަހުން ނެރުއްވާފައިވެ އެވެ.