ރައްޔިތުންގެ މަޖިލީހުގައި މިރޭ ރޯކޮށްލާފައިހުރީ ގަސްދުގައި ކަމަށް ގަލޮޅު ދެކުނު ދާއިރާގެ މެންބަރު އަހުމަދު މަހުލޫފް ވިދާޅުވެއްޖެ އެވެ.
މިރޭ އިރުއޮއްސި، 6:00 ހާއިރު ރޯވެފައިވަނީ މަޖިލީހުގެ ފާހަނާއެއްގަ އެވެ. އެ މައުލޫމާތު މީޑިއާއަށް ހިއްސާކުރަމުން އެމްއެންޑީއެފްއިން ބުނެފައިވަނީ އަލިފާނުގެ ހާދިސާގެ ރިޕޯޓު ލިބުމުން އެތަނުގައި ރޯވެފައިވާ އަލިފާންގަނޑު އެމްއެންޑީއެފްއިން ނިއްވާލާފައިވާ ކަމަށެވެ.
އަލިފާން ރޯވި ސަރަހައްދު ބެލުމަށްފަހު މަހުލޫފް ކުރެއްވި ޓްވީޓެއްގައި ވަނީ އެއީ ބަޔަކު ގަސްދުގައި ރޯކޮށްފައިވާ ކަމަށް ތުހުމަތުކޮށްފަ އެވެ. އަދި މަޖިލީހުގެ ޖަލްސާއަށް ނުބާއްވަން ޖެއްސި މަޅިއެއްތޯ ސުވާލު އުފައްދާފަ އެވެ. މަހުލޫފް ވަނީ އެ ތަނުގެ ވީޑިއޯއެއް ވެސް އާންމުކޮށްފަ އެވެ.
މަޖިލިސް އިދާރާގައި އަލިފާނުގެ ހާދިސާއެއް މިރޭ ހިނގާފައިވާއިރު މި ދުވަސްވަރު އެ މަޖިލީހުގައި ސިފައިން ސަލާމަތީ ކަންކަން ވަނީ ވަރުގަދަކޮށްފަ އެވެ.