ޗެނަލް 13 ގެ ސީއީއޯގެ މަގާމަށް ހަސަން ގައްސާން ހަމަޖައްސައިފި އެވެ. ޗެނަލް 13 ގެ ސީއީއޯ ކަމަށް ގައްސާން އައްޔަން ކުރިކަން އޭނާ ވަނީ "އަވަސް"އަށް ކަށަވަރުކޮށްދީފަ އެވެ.
ޗެނަލް 13 ގައި މަސައްކަތް ކުރައްވާތާ ތިން އަހަރުވެފައިވާ ގައްސާން އެ ކުންފުންޏާ ފުރަތަމަ ގުޅިވަޑައިގަތީ ޕްރޮޑަކްޝަަން މެނޭޖަރެއްގެ ގޮތުގަ އެވެ. އަދި ބައެއް ޓީވީޝޯތައް ޕްރެޒެންޓު ކުރުމުގެ މަސައްކަތް ވެސް ގައްސާން ކުރިން ކުރެއްވިއެވެ. އޭނާ މީގެ ކުރިން ވެސް ވަނީ ބައެއް މީޑިއާތަކުގައި މަސައްކަތް ކުރައްވާފަ އެވެ.
މިއަދު މެންދުރު ފަހު އެ ޗެނަލްގައި ބޭއްވި ސްޓާފް ބައްދަލުވުމެއްގައި ގައްސާން އެ މަގާމަށް އައްޔަން ކުރިކަން ވެސް ވަނީ އިއުލާންކޮށްފަ އެވެ.
ގައްސާންއަކީ ރައިސުލްޖުމްހޫރިއްޔާގެ އަނބިކަނބަލުން މެޑަމް ފާތުމަތު އިބްރާހިމް ހިންގަވާ، ސަދަގާތު ފައުންޑޭޝަންގައި ވެސް މަސައްކަތް ކުރައްވާ ބޭފުޅެކެވެ. އަދި ޕީޕިއެމްގެ އިވެންޓްތައް ހުށަހަޅައި ދިނުމުގެ މަސައްކަތް ވެސް އޭނާ ކުރައްވަ އެވެ. މީގެ ކުރިން އޭނާ ވަނީ ނ މިލަދޫ ކައުންސިލްގެ ރައީސްކަން ވެސް ކުރައްވައިފަ އެވެ.