މި ހަފްތާ ބަންދާއި ދިމާކޮށް ހައުސިން ޑިވްލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ހާއްސަ ހަރަކާތްތަކެއް ބާއްވަން ނިންމައިފި އެވެ.
އެޗްޑީސީގެ މުނިސިޕަލް އެޑްމިނިސްޓްރޭޓިވް ޑިރެކްޓަރު އަހުމަދު ފާތިހު ވިދާޅުވީ ހުކުރު އަދި ހޮނިހިރު ދުވަހު ހުޅުމާލޭގައި އެޗްޑީސީގެ ފަރާތުން ހަރަކާތްތަކެއް ހިންގަން ހަމަ ޖެހިފައިވާ ކަމަށާއި އެގޮތުން ހުކުރު ދުވަހުގެ ހަވީރު ދެ އިވެންޓެއް ސެންޓްރަލް ޕާކްގައި ކުރިއަށް ގެންދިއުމަށް ހަމަޖެހިފައިވާ ކަމަށެެވެ. އަދި ހޮނިހިރު ދުވަހު ހެނދުނު އެއް އިވެންޓް ކުރިއަށް ގެންދިއުމަށް ހަމަ ޖެހިފައިވާ ކަމަށް ފާތިހު ވިދާޅުވި އެވެ.
ހުކުރު ދުވަހު ހަވީރު 4:00 އިން 6:00 އަށް ސީނިއާ ސިޓިޒަންސް ނުވަތަ އުމުރު 55 އަހަރުން މަތީގެ މީހުންނަށް އަމާޒުކޮށްގެން "ތަޖުރިބާ ސިކުނޑިތައް" ޝިއާރުގެ ދަށުން އިސް ރަށްވެހިންނަށް، މެޑިކަލް ޗެކަޕް ހެދުމާއި ކެއުމާއި ކަސްރަތު ކުރުމުގެ މަައުލޫމާތު ދޭނެ އެވެ. އެގޮތުން މެޑިކަލް ޗެކަޕް ކުރިއަށް ގެންދާނީ ހުޅުމާލެ ހޮސްޕިޓަލްގެ ފަރާތުންނެވެ. އަދި އެމްޓީސީސީގެ ބަހުގައި ހުޅުމާލެ ފޭސްޓޫ ދައްކާލުމުގެ ޓުއާ އެއްވެސް ކުރިއަށް ގެންދިއުމަށް ހަމަޖެހިފައި ވެއެވެ. ޓުއާގައި އާއިލާ އާއި އެކޮންވެސް ބައިވެރިވެވޭ ގޮތް ވަނީ އިންތިޒާމު ކުރެވިފައެވެ.
ހަމަ އެ އިވެންޓްގައި ފޮޓޯ ފިއުޝަން އެއް ގާއިމް ކުރާނެ އެވެ. އާއިލާ އާއި އެކު ފޮޓޯ ނަގާލުމަށް ބޭނުންވާ ފަރާތްތަކަށް އެ ފުރުސަތުވެސް އޮންނާނެ ކަމަށް އެޗްޑީސީން ބުންޏެވެ. އެ އިވެންޓްގެ ޕާޓްނަރުންނަކީ އެސްޓީއޯ، ހުޅުމާލެ ހޮސްޕިޓަލް، އެމްޓީސީސީ އަދި ފިޓްޒޯން އެވެ.
"އެ އިވެންޓްގެ އެންމެ ބޮޑު މަގުސަދަކީ ރައްވެހިންނާއި ގުޅުން ބަދަހި ކޮށް އާއިލާއާ އޮންނަ ގުޅުން ބަދަހިކޮށް އާއިލާއާއެކު ވަގުތު ހޭދަ ކުރުމަށް ފުރުސަތުދިނުން، އެކްސްޕެކްޓް ކުރަނީ 2000 އަށްވުރެ ގިނަ ފަރާތްތަކުން ބައިވެރިވާނެ ކަމަށް،" ފާތިހު ވިދާޅުވި އެވެ.
އެދުވަހުގެ އެވަގުތުގައި މީރާގެ އަހަރީ ދުވަހާއި ގުޅުވައިގެން ކުރިއަށްގެންދާ ހަރަކާތެއްވެސް ސެންޓްރަލް ޕާކްގައި އޮންނާނެ އެވެ. އެ ހަރަކާތުގައި ވެސް އެޗްޑީސީގެ ސްޓޯލްއެއް ހަދާފައި ހުންނާނެ އެވެ. އެ އިވެންޓްވެސް ކުރިއަށް ދާނީ ހަވީރު 4:00 އިން 6:00 އަށެވެ.
ހޮނިހިރު ދުވަހު ހުޅުމާލެ ސާފުކުރުމުގެ ހަރަކާތެއް ކުރިއަށް ގެންދިއުމަށް ވަނީ ހަމަޖެހިފަ އެވެ. އެގޮތުން އެ އިވެންޓް ކުރިއަށް ގެންދިއުމަށް ހަމަޖެހިފައިވަނީ ހެނދުނު 9:00 އިން މެންދުރު 12:00 އަށެވެ. މީގެ ކުރިން އަހަރަކު އެއްފަހަރު ކުރިއަށް ގެންދާ ހުޅުމާލެ ސާފުކުރުމުގެ ހަރަކާތް، ކޮންމެ މަހަކު ބާއްވާ ގޮތަށް ވަނީ ބަދަލުކޮށްފަ އެވެ.