މީގެ ކުރިން ސަރުކާރުން މާލޭގެ ބައެއް ބިންތައް ވިއްކުމަށް މަސައްކަތް ކުރި ނަމަވެސް ގާނޫނީ އިމުގެ ތެރެއިން އެ ބިންތައް ވިއްކުމަށް ޖާގަ ލިބިފައިނުވާ ކަމަށާއި މިހާރު އެވަނީ ގާނޫނީ އިސްލާހުގެނެވި ގާނޫނީ އިމުގެ ތެރެއިން އެ ބިންތައް ބީލަމުގެ އުސޫލުން ވިއްކުމަށް އިއުލާން ކުރެވިފައި ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ހައުސިން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ މާލޭގައި ހުރި ބައެއް ބިންތައް ތަރައްގީ ކުރުމަށް ތަރައްގީގެ ޕްލޭން ހަދައިގެން އެ ބިންތައް ހިތްފަސޭހަ މައިޒާންތައް ހަދައިގެން އެ ޕްލޭންގެ ތެރެއިން ބައްޓަން ކުރެވިގެން ދާ ކަމަށެވެ. އަދި އެއާ ގުޅިގެން މާލޭގެ ބިންތަކުގެ އަގު ވަރަށް މައްޗަށް ގޮސްފައިވާ ކަމަށާއި ރިއަލް އެސްޓޭޓް ވެލިއުވެސް ވަރަށް ބޮޑަށް އުފުލިގެން ގޮސްފައިވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މާލޭގެ ބިންތައް ބީލަމުގެ އުސޫލުން ވިއްކަން ނިންމި ސަބަބަކީ ކެރިފޯރުން ތެރިކަން ހުރި ފަރާތްތަކަށް ބިންތައް ދޫކޮށްލައިފިނަމަ އެތަންތަން ސަރުކާރުން ކަނޑަޅާ މިންގަޑުތަކަށް ތަރައްގީ ގެނެވިދާނެ ކަމަށް ގަބޫލު ކުރެވޭ ތަންތަން ކަމަށް ވާތި ކަމަށެވެ. އަދި ހަމަ އަގުގައި ބިން ވިއްކުމުން ގެއްލިގެންދާ އާންމުދަނީގެ ބަަދަލުގައި މިކަމުގެ ސަބަބުން ދައުލަތަށް ލިބިގެންދާނީ ފައިދާ ކަމަށާއި އެ ބިންތައް ނުވިއްކަ ބަހައްޓައިފި ނަމަ ދައުލަތަށް ގެއްލުން ލިބިގެންދާނެ ކަމަށް މިނިސްޓަރު ވިދާޅުވި އެވެ.
"ބީލަމްގެ އުސޫލުން ބިން ވިއްކަން މިހާރު މިވަނީ އިއުލާން ކުރެވިފައި، މިއީ ވަރަށް ތާރީހީ ކަމެއް، މީގެ ކުރިންވެސް ބިން ވިއްކަން މަސައްކަތް ކުރި ނަމަވެސް ގާނޫނީ އިމުގެ ތެރެއިން ބިން ވިއްކަން ޖާގަ ލިބިފައިނުވޭ. މިހާރު މިވަނީ ގާނޫނީ އިމުގެ ތެރެއިިން ބިން ވިއްކުމަށް ފުރުސަތުލިބި އެކަމަށް ހުޅުވާލެވިފައި" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ މި ބިން ވިއްކުމުގެ ސަބަބުން ލިބިގެންދާ އާންމުދަނީ އިން ތަރައްގީއަށް އިތުރު ކުރިއެރުން ތަކެއް ލިބިގެންދާނެ ކަމަށާއި މިކަމުގެ ސަބަބުން ސީދާ ގޮތުންނާއި ނުސީދާ ގޮތުން ރައްޔިތުންނަށް ފައިދާ ކުރާނެ ކަމަށެވެ. އަދި އެ ބިންތައް ވިއްކުމަކީ މިއަހަރުގެ ބަޖެޓްގައި ވެސް ރެވެނިއު މެޝާއެއްގެ ގޮތުގައި ހިމެނި، ޕްލޭން ކުރެވިފައިވާ ކަމަކަށް ވާތީ ކުރިއަށް ގެންދާ ކަމެއް ކަމަށް މިނިސްޓަރު ވިދާޅުވި އެވެ.
ޑެޕިއުޓީ މިނިސްޓަރު ނާޒިމް ވިދާޅުވީ ކޮންމެ ދުވަހަކުވެސް އެ ދުވަހަކު ހުށަހެޅޭ އަގު ޖެހިގެން އަންނަ ދުވަހު މިނިސްޓްރީގެ ނޯޓިސް ބޯޑާއި ވެބްސައިޓުގައި ޝާއިރު ކުރެވިގެންދާނެ ކަމަށާއި ހުށަހަޅާ އެންމެ މަތީ އަގަށްވުރެ އިތުރަށް ބިޑް ކުރަން ބޭނުން ނަމަ ފަސް ލައްކަ ރުފިޔާގެ ކުޑަ ނޫން އަދަދަކުން ބިޑް ކުރެވޭނެ ކަމަށެވެ. އަދި ބިމުގައި ކުރެވޭނެ ކަންކަމާއި ނުކުރެވޭނެ ކަންކަން ހުންނާނެ ކަމަށާއި އެގޮތުން ރެސިޑެންޝަލް އާއި ކޮމާޝަލް ބޭނުންތަކަށް ބިންތައް ބޭނުން ކުރި ނަމަވެސް ސިނާއީ ކަންކަމަށް ބޭނުން ނުކުރެވޭނެ ކަމަށް ނާޒިމް ވިދާޅުވި އެވެ.
މާލޭގެ ތިން ސަރަހައްދަކުން 19 ބިމެއް ވިއްކުމަށް ހަމަޖެހިފައި ވެއެވެ. އެގޮތުން މިހާތަނަށް އިއުލާން ކޮށްފައިވަނީ 209 ނަމްބަރު ކޮށި އެއީ މ. ދަންޑަހެލުގޭގެ ދެ ޕްލޮޓަކާއި 378 ކޮށީގެ ހަތަރު ޕްލޮޓާއި 386 ކޮށިން ހަ ޕްލޮޓެކެވެ. އެ ބިންތަައް ވިއްކުމަށް ހަމަޖެހިފައިވަނީ އަކަފޫޓަކަށް 15000 ރުފިޔާގެ މަގުން ނެވެ. ބިން ގަންނަން ބޭނުންވާ ފަރާތްތަކުން މިމަހުގެ 20 ވަނަ ދުވަހުން ފެށިގެން 24 ވަނަ ދުވަހުގެ ނިޔަލަށް ޕްރޮޕޯސަލް ހުށަހަޅަން އިއުލާނުގައި ބުނެފައިވެ އެވެ. ޕްރޮޕޯސަލް ބަލައިގަތުން އެ ދުވަސްތަކުގެ ހެނދުނު 8:30 އިން މެންދުރު 1:30 ގެ ނިޔަލަށް ވަނީ ހުޅުވާލައިފަ އެވެ. ބިންތަކާއި ބެހޭ މައުލޫމާތު އަންނަ އާދިއްތަ ދުވަހުން ފެށިގެެން ހައުސިންގެ ވެބްސައިޓްގައި ޝާއިރު ކުރެވިގެންދާނެ ކަމަށް މިނިސްޓްރީން ބުންޏެވެ.