ގްރީން ސްޓްރީޓާ ދެކޮޅަށް ކުޅުނު މެޗު 1-0 ގެ ހަނި މޮޅަކާއެކު، އުރީދޫ ދިވެހި ޕްރިމިއާ ލީގްގެ ތާވަލުގެ ދެ ވަނަ އަށް ނިއުރޭޑިއަންޓް ޖެހިލައިފި އެވެ.
މިއަދު ހަވީރު ކުޅުނު މެޗުގައި، ނިއުގެ ހަމައެކަނި ލަނޑު ކާމިޔާބު ކުރީ އަލީ އަޝްފާގް (ދަގަނޑޭ) އެވެ. މެޗުގެ 42 ވަނަ މިނެޓްގައި ދަގަނޑޭ ލަނޑު ޖެހީ، ގްރީންގެ ޑިފެންޑަރުންނާއި ގޯލް ކީޕަރު ޖޫން ކޮޗީ އަށް ހެދުނު މިސްޓޭކެއްގެ ފައިދާ ނަގައި ގޯލް ތެރެއަށް ބޯޅަ ފޮނުވާލައިގެން ނެވެ.
ޕެނަލްޓީ އޭރިއާ ތެރެއިން، ދަގަނޑޭއަށް ބޯޅަ ލިބުނީވެސް، ގްރީންގެ ޑިފެންޑަރުންނަށް، ބޯޅަ ސާފް ކޮށް ނުލެވުމުން ނެވެ. އަދި ކީޕަރު ކޮޗީވެސް ބޯޅަ ދިފާއު ކުރަން ނިކުމެ، އޭނާއަށްވެސް ބޯޅަ ހުއްޓުވުމަށް މާ ބޮޑު ކަމެއް ނުކުރެވުނެވެ.
ފުރަތަމަ ހާފު، ގެ ކުރީ ކޮޅުގައި ނިއު އަށް ލިބުނު ހިލޭ ޖެހުމެއްގައި، ގްރީންގެ ޕެނަލްޓީ އޭރިއާ ބޭރުން ނުރައްކާތެރި ބޯޅަ އެއް ދަގަނޑޭ ފޮނުވާލި އެވެ. ނަމަވެސް އެބޯޅަ ގޯލާ އަމާޒުވާ ގޮތެއް ނުވި އެވެ. މެޗުގެ 79 ވަނަ މިނެޓްގައި ނަތީޖާ ފަރަގު ބޮޑު ކުރަން ނިއު އަށް ފުރުސަތެއް ލިބުނެވެ. ނަމަވެސް އެފުރުސަތު ބޭނުން ކުރެވޭ ގޮތެއް ނުވި އެވެ.
މެޗުގެ 82 ވަނަ މިނެޓްގައި ގްރީންއަށް ވަނީ ނަތީޖާ ހަމަހަމަ ކުރުމަށް ޕެނަލްޓީ އެއް ލިބިފަ އެވެ. އެ ޕެނަލްޓީ އަކީ ކައުންޓަ އެޓޭކް ފުރުސަތެއްގައި، ގްރީންގެ ސޮބެލް އިލިއާ ބޯޅަ ހިފައިގެން ނިއުގެ ޕެނަލްޓީ އޭރިއާ ތެރެއަށް ވަދެ ފޮނުވާލަން، އުޅުމުން ނިއުގެ އަކްރަމް އިލިއާއަށް ފައުލު ކުރުމުން ދިން ޕެނަލްޓީ އެކެވެ.
ރެފްރީ ވަނީ، ދެ ފަހަރަށް، ޕެނަލްޓީ ޖައްސުވާފަ އެވެ. ފުރަތަމަ ފޮނުވާލި ޕެނަލްޓީ އިލިއާ ފޮނުވާލީ ގޯލްގެ ތެރެއަށެވެ. ނަމަވެސް، ޕެނަލްޓީ ޖެހުމުގެ ކުރިން، ގްރިންގެ އެހެން ކުޅުންތެރިޔަކު ނިއުގެ ޕެނަލްޓީ އޭރިއާ ތެރެއަށް ވަނުމުން، ރެފްރީ އެނގީ އަލުން ޖެހުމަށެވެ. އިލިއާ ފޮނުވާލި ދެ ވަނަ ޕެނަލްޓީ އަމާޒުވީ ގޯލްގެ ދަނޑިއަށެވެ. އެ ބޯޅަ ރީބައުންސަށް ނިކުތުމުން، އޭނާ، ގޯލް ތެރެއަށް ފޮނުވާލި ނަމަވެސް، އެއްވެސް އެހެން ކުޅުތެރިއެއް ގައިގައި ނުޖެހި ދެ ފަހަރަށް ބޯޅައިގަ ޓަޗު ކުރުމުން، ގޯލެއް ނޫން ކަމަށް ރެފްރީ ވަނީ ކަނޑައަޅާފަ އެވެ.
ޕޮއިންޓްގެ ގޮތުންނާއި ފައިދާ ގޯލްގައިވެސް ނިއު އާއި ގްރީންއަށްވެސް އޮތީ ހަމަހަމަ ކޮށެވެ. ދެ ޓީމަށްވެސް ހަ ޕޮއިންޓެވެ. އަދި ފައިދާ ގޯލްގެ ގޮތުގައި ދެ ޓީމަށްވެސް އޮތީ އޮތީ، އެންމެ ގޯލެކެވެ.