ޓީސީ ސްޕޯޓްސްގެ ފޯވަޑް ލައިން އޮތީ ވަރަށް ރަނގަޅު ފޯމެއްގައި ކަމަށާއި އޭނާ އަށް ލިބޭ އެންމެ ބޮޑު ހިތްހަމަ ޖެހުމަކީވެސް އެއީކަމަށް ޓީސީގެ ކޯޗް މުހައްމަދު ނިޒާމް ބުނެފި އެވެ.
އުރީދޫ ދިވެހި ޕްރިމިއާ ލީގްގައި މިއަދު، ގދ. ތިނަދޫއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުން ނިޒާމް ބުނީ، ހަމަލާ އުފައްދާއިރު ޓީސީގެ އެޓޭކިން ލައިނަށް ކުޅުންތެރިން އިތުރު ކުރާ ކަން ޓީސީއާ ދެކޮޅަށް، ނިކުންނަ ހުރިހާ ޓީމެއްގެ ކޯޗުންވެސް ފާހަގަ ކުރާ ކަމަށެވެ. އޭނަ ބުނީ، ކުޑަހުވަދޫއާ ދެކޮޅަށް ކުޅުނު މެޗުގައި ގިނަ ލަނޑުތަކެއް ޖެހުމަކީ އެޓޭކިން ލައިންގެ ކުޅުންތެރިންނަށް ލިބުނު ވަރުގަދަ ރޫހެއް ކަމަށެވެ.
ނިޒާމް ބުނީ، ތިނަދޫއާ ދެކޮޅަށް ކުޅޭއިރު، ގޭމް ސްޓައިލް ތަފާތު ކުރަން ޖެހޭ ކަމަށާއި، ސަބަބަކީ މިނިވަން ޗެމްޕިއަންޝިޕުން އައި ޓީމަކަށް ވިޔަސް، އެޓީމުގައި ފުރަތަމަ ޑިވިޝަންގެ ތަޖުރިބާ ހުރި، ގިނަ ކުޅުންތެރިންތަކެއް ތިބުމުން ކަމަށެވެ.
"ލީގްގައި، މަސައްކަތް ކުރާ، ހުރިހާ ބިދޭސީ ކޯޗުންވެސް ފަހަގަ ކުރޭ، ޓީސީ އެޓޭކަށް ދާއިރު، ކުޅުންތެރިން އިތުރު ކުރާ ވާހަކަ، ޓީސީގެ ސްޓްރެންތަކީވެސް އެއީ ކަންނޭންގެ، އެ ސްޓްރެންތައް ބޭސްކޮށް ކަންނޭންގެ ގޭމް ޕްލޭން އަތުރަން ޖެހޭނީވެސް،" ނިޒާމް ބުންޏެވެ. ތިނަދޫއާ ދެކޮޅަށް ނިކުންނަ އިރު، ކުޅޭ ވައްޓަފާޅި ތަފާތު ކުރަން ޖެހޭ، އެއީ ތިނަދޫގެ ތިބި ކުޅުންތެރިން ތަންކޮޅެއް ހުނަރުވެރި ވެފަ، ފުރަތަމަ ޑިވިޝަންގެ އެކްސްޕީރިއަންސް ކުޅުންތެރިންނަށް ވީމަ، އެހެންވީމަ މިހުރިހާ ކަމަކަށްވެސް ވިސްނަން ޖެހޭ ކަމަށް ގަބޫލު ކުރަނީ،"
ޓީސީގެ އިތުބާރު ފޯވަޑް ނައިޒު ހަސަން (ދާދު) ރަނގަޅު ފޯމަކަށް އެޅެމުން އަންނަކަން، ނިޒާމް ފާހަގަ ކުރި އެވެ. އޭނާ ބުނީ، ދާދު އަކީ ވަރަށް ޑިސިޕްލިން، އަދި ވަރަށް ބުރަކޮށް މަސައްކަތް ކުރާ ކުޅުންތެރިޔެއް ކަމަށެވެ.
"ދާދު އަކީ ވަރަށް ޅަ ކުޅުންތެރިޔެއް، ޅަ ކުޅުންތެރިޔަކަށް ވުމުން، ދާދު ފޯމް ގެއްލުނަސް، ފޯމަށް އައުން އެއީ މާކަ އުނދަގޫ ކަމަކަށް ވެގެން ނުދާނެ، ދެން އަނެއްކޮޅުން ވަރަށް ޑިސިޕްލިން ކުޅުންތެރިޔެއް ވަރަށް ބަސްއަހާ ކުޅުންތެރިޔެއް ބުނާ ކޮންމެ ގޮތަކަށް މަސައްކަތް ކުރަން ބޭނުންވާ ކުޅުންތެރިޔެއް އެހެންވީމަ އެ ހުރިހާ ކަމަކަށް ބަލާއިރު އުންމިދު ކުރަނީ ލީގްގައި ހަމަ މެޗުތައް ކުޅެމުންދާ ވަރަކަށް ދާދު ދައުރު ބޮޑުވެގެންދާނެ ކަމަށް."
ތިނަދޫގެ ކޯޗް، ހުއާން މެނުއަލް މާޓިނޭޒް ބުނީ، ޓީސީގެ އެޓޭކް ވަރުގަދަކަން އޭނާ ވެސް ފާހަގަ ކުރާ ކަމަށާއި ތިނަދޫ ޓީމުން، ޓީސީގެ އެޓޭކް ހުއްޓުވަން މަސައްކަތް ކުރާނެ ކަމަށެވެ.
"ކޮންމެ ގޮތެއްވިޔަސް މެޗު ފަށާނީ 0-0 ން، ޓީސީގެ ކޯޗަށްވެސް އެނގޭނެ އަހަރެމެން ޓީސީއާ ދެކޮޅަށް މަސައްކަތް ކުރާނެކަން، ދަނޑުމަތީގައި އަހަރެމެންނަށް ލިބެންޖެހޭ އިހްތިރާމް ލިބެންޏާ އަހަރެން، ލީގްގެ ހުރިހާ ޓީމުތަކާ ދެކޮޅަށް ވެސް ވަރުގަދަ ފައިޓެއް ދޭނަން." މާޓިނޭޒް ބުންޏެވެ. "ދަނޑުމަތީގައި ލިބެންޖެހޭ އިހްތިރާމް" ކަމަށް އޭނާ އެ އިޝާރަތް ކުރީ، ރެފްރީގެ ހަމަހަމަ ނިންމުން ތަކަށެވެ. އޭނާ، މީގެކުރިންވެސް ވަނީ، ރަށްރަށުން އައިސް ތިބި ޓީމު ތަކާ ދެކޮޅަށް ރެފްރީ، ތަފާތު ކުރުން ގެންގުޅޭ ކަމަށް ތުހުމަތު ކޮށްފަ އެވެ.
މިއަދު ޓީސީއާ ދެކޮޅަށް ކުޅޭ މެޗުގައިވެސް އޮތީ، ގްރީން ސްޓްރީޓާ ދެކޮޅަށް އޭނާގެ އޮތް "ސީކްރެޓް ރެސިޕީ" ކަމަށް، މާޓިނޭޒް ބުންޏެވެ. އެއީ އިދިކޮޅު ޓީމަށް ހުސް ފުރުސަތެއް ނުދިނުން ދެވަނަ ރެސިޕީ އަކީ އަމިއްލަ ފުރުސަތު ތަކުން ގޯލް ޖެހުމެވެ. އޭނާ ބުނީ ގްރީން ސްޓްރީޓް އަތުން ބަލިވީ އެ ދެކަންތައް ނުކުރެވުމުން ކަމަށެވެ. ނަމަވެސް ޓީސީއާ ދެކޮޅަށް، ހަމަ އެރެސިޕީ ދަމަހައްޓަން ވަރަށް ބުރަ ކޮށް މަސައްކަތް ކުރާނެ ކަމަށް އޭނާ ބުންޏެވެ.