ޑިފެންސްގައި ށ. މިލަންދޫ ވަރަށް ޑިސިޕްލިން ކަމަށާއި މާޒިޔާ ނިކުންނަން ޖެހޭނީ އުނދަގޫ މެޗަކަކަށް ކަމަށް، މާޒިޔާގެ ކޯޗް މަރުޔަން ސެކްލޮސްކީ ބުނެފި އެވެ.
އުރީދޫ ދިވެހި ޕްރިމިއާ ލީގްގައި، މިރޭ މިލަންދޫއާ ދެކޮޅަށް ނިކުންނަ މެޗުގެ ކުރިން، ވާހަކަ ދައްކަމުން، ސެކްލޮސްކީ ބުނީ، މިލަންދޫއާ ދެކޮޅަށް، މާޒިޔާ ފަސޭހަކޮށް ނުވިސްނާ ކަމަށާއި އެ ޓީމާ ދެކޮޅަށް ނިކުންނާނީވެސް ނިއު ރޭޑިއަންޓާ ދެކޮޅަށް ނިކުތް ވިސްނުމުގައި ކަމަށެވެ.
"މިލަންދޫ ކުޅުނު ދެ މެޗުވެސް އަހަރެން ބެލިން، އެ ޓީމަކީ ވަރަށް ރަނގަޅު ޓީމެއް ހާއްސަ ކޮށް ޑިފެންސްގައި އެ ޓީމުގެ ކުޅުންތެރިން ވަރަށް ޑިސިޕްލިން، އިދިކޮޅު ޓީމުން އެ ޓީމާ ދެކޮޅަށް މާ ފަހި ފުރުސަތުތަކެއް ތަނަވަސް ކުރާކަށް އެމީހުން ފުރުސަތެއް ނުދޭ، އަދި ކައުންޓަ އެޓޭކްގައިވެސް އެ ޓީމު ނުރައްކާ ކުރޭ އެމީހުން އެންމެ ފަހު ވަގުތާ ހަމަޔަށް ގިވްއަޕް ނުކޮށް މަސައްކަތް ކުރޭ، އެންމެ ފަހުން ކުޅުނު މެޗުގައި ވެސް، 86 ވަނަ މިނެޓާ ހަމަޔަށް އެމީހުން ހިފެހެއްޓި، ގްރީން ސްޓްރީޓާ ދެކޮޅަށްވެސް މެޗުގެ އެންމެ ފަހު މިނެޓާ ހަމަޔަށް 1-1 ން އެ ޓީމު ހިފެހެއްޓި، މިލަންދޫ ޓީމާ ދެކޮޅަށް އަހަރެމެން ކުޅޭނީ ނިއު ރޭޑިއަންޓާ ދެކޮޅަށް އަހަރެމެން ކުޅުނު ވިސްނުމުގައި."
މިލަންދޫ ޓީމުގެ ކޯޗް މުހައްމަދު ނާސިރު ބުނީ، މިލަންދޫ ކޮޅަށް ވަންނަ ގޯލްގެ އަދަދު މަދު ކުރުން އެއީ އޭނާ ވަރަށް ސަމާލުކަން ދޭ ކަމެއް ކަމަށާއި މާޒިޔާއާ ދެކޮޅަށް ނިކުންނާނީ ޑިފެންސްކޮށް، ކައުންޓަ އެޓޭކުން ހަމަލާ އުފެއްދުމަށް ކަމަށެވެ.
"ފަސްޓް ޑިވިޝަން ކުޅެފައި ހުރި ކުޅުންތެރިޔެއްވެސް މިލަންދޫގެ ޓީމުގައި ނެތް، އަދި މާޒިޔާ ކަހަލަ ވަރުގަދަ ޓީމަކާ ދެކޮޅަށް ކުޅޭއިރު، ޑިފެންސް ކޮށް ކައުންޓަ އޭޓޭކް އުފެއްދުން ފިޔަވާ އެހެން ގޮތެއް ނެތް، މިހާ ބޮޑު ޓީމަކާ ދެކޮޅަށް ކުޅެވޭނެ ގޮތަކީވެސް އެއީ. އިސކޮޅުގެ ގޮތުން ބަލައިފިއްޔާ ވަރަށް ބޮޑެތި ކުޅުންތެރިންވެސް އެޓީމުގައި އެބަތިބި އެހންވީމަ އެ ހުރިހާ ކަމަށް ބަލައިގެން މި މެޗަށް ނިކުންނަނީ."
ސެކްލޮސްކީ ބުނީ، ޗެމްޕިއަންޝިޕުން އަންނަ ޓީމަކަށް ވުރެ، ފުރތަމަ ޑިވިޝަންގެ ޓީމުތަކަށް އަބަދުވެސް ޕްރެޝާ އޮންނާނެ ކަމަށާއި، އެހެންވެ މިރޭގެ މެޗުގައި ޕްރެޝާ އޮތީ މާޒިޔާއަށް ކަމަށެވެ. ނަމަވެސް މާޒިޔާގައި ތަޖުރިބާ ކާރު ކުޅުންތެރިން ގިނަ ވުމުން، ޕްރެޝަރުގައި ކުޅެން އޭނާގެ ޓީމުގެ ކުޅުންތެރިންނަށް އެނގޭނެ ކަމަށެވެ.