ފައިނަލުގައި، ދިވެހި ސިފައިންގެ ކުލަބު (ޑީއެސްސީ) ގެ މައްޗަށް ކާމިޔާބު ހޯދައި، ހޭންޑްބޯލް މޯލްޑިވެސްގެ ޗެމްޕިއަންޝިޕްގެ ޗެމްޕިއަންކަން ޠުތު ސްޕޯޓްސް ކުލަބު ކާމިޔާބު ކޮށްފި އެވެ.
ފައިނަލު މެޗު، ޔޫތުން ކާމިޔާބު ކުރީ، ދެ ލަނޑުގެ ތަފާތަކުން ނެވެ. ޔޫތުން، 29 ލަނޑު ކާމިޔާބު ކުރިއިރު، ޑީއެސްސީއަށް ކާމިޔާބު ކުރެވުނީ 27 ލަނޑެވެ. މެޗުގެ އެންމެ މޮޅު ކުޅުންތެރިޔަކަށް ހޮވިފައި ވަނީ، ޔޫތުގެ އަހްމަދު ސާއިފް ނަސީމެވެ. އޭނާ އަކީ މެޗުގައި އެންމެގިނަ ސްކޯ ކުރި ކުޅުންތެރިޔާވެސް މެއެވެ. އޭނާ ވަނީ ނުވަ ލަނޑު ސްކޯ ކޮށްފަ އެވެ.
ޔޫތުގެ އިސްމާއިލް ޒައިދުވެސް ވަނީ ހަތް ލަނޑު ސްކޯ ކޮށްފަ އެވެ. ޑީއެސްސީގެ އަހްމަދު ރަޒްނީ އާއި އަހްމަދު ނަސީރު ވަނީ ހަތް ލަނޑު ސްކޯ ކޮށްފަ އެވެ. ޔޫތުގެ އަހްމަދު ފިރުނާޝް ވެސް ވަނީ ހަ ލަނޑު ސްކޯ ކޮށްފަ އެވެ.
މުބާރާތުގެ އެންމެ މޮޅު ހަތް ކުޅުންތެރިންނަށް ހޮވުނީ ޔޫތުގެ އަހްމަދު އިނާޝް އާއި ސާއިފް އަދި އަބްދުﷲ ޒިޔާއު އެވެ. ޑީއެސްސީގެ ވެސް ތިން ކުޅުންތެރިޔަކު ވަނީ ގަދަ ހަތް ކުޅުންތެރިންގެ ތެރޭގައި ހިމެނިފަ އެވެ. އެއީ މުހައްމަދު މަހްދީ އާއި އަހްމަދު ނަސީރު އަދި އަހްމަދު ރަޒްނީ އެވެ. ދެން ހިމެނުނީ ޕޮލިސް ކުލަބުގެ އަލީ ފަޒްލީ އެވެ.