ދެ އަހަރުގެ މެދު ކެނޑުމަކަށް ފަހު، ޑިފެންޑަރު ރިލްވާން ވަހީދު (ރިލޭ) ގައުމީ ސްކޮޑުން ޖާގަ ހޯދައިފި އެވެ. އަދި، ދިވެހި ޕްރިމިއާ ލީގުން މި ސީޒަންގައި ކުޅުމާ ބައިވެރިވި، ގައުމީ ޓީމުގެ ކުރީގެ ކެޕްޓަން އަލީ އަޝްފާގް (ދަގަނޑޭ) ސްކޮޑްގައި ހިމަނާފައެއް ނުވެ އެވެ.
އަންނަ މަހު ފަސް ވަނަ ދުވަހު، އޭޝިއަން ކަޕް ކޮލިފައިންގައި އޮމާންއާ ދެކޮޅަށް އެ ގައުމުގައި ކުޅޭ މެޗަށް އެކުލަވާލި ގައުމީ ސްކޮޑްގައި އަޝްފާގް ނުހިމެނުނު ސަބަބާ ބެހޭގޮތުން އެފްއޭއެމްގެ ޖެނަރަލް ސެކެޓްރީ ހުސައިން ޖަވާޒު (ޖަވާ) ވިދާޅުވީ، އަޝްފާގް މަޑުކޮށްގެން ހުރީ ފިޓްނަސް ރިޕޯޓްގެ ނަތީޖާ ލިބެން ދެން ކަމަށާއި، ނަތީޖާއިން އޭނާގެ ނަމާ މެދު ވަކިގޮތެއް އެނގިގެން ދާނެ ކަމަށެވެ.
މިދިޔަ އަހަރު، ނިއުގައި ހުރުމަށްފަހު، ވިކްޓަރީއަށް ބަދަލުވެ، އަދި މިއަހަރުގެ ޖުލައި ޓްރާންސްފާ ޕީރިއަޑްގައި އަލުން ނިއުއާ ގުޅުމަށްފަހު ރިލޭ ބުނީ، މިހެން ނެވެ.
"ނިއު ރޭޑިއަންޓަށް ކާމިޔާބު ހޯދައިދޭން މަސައްކަތް ކުރުމާއެކު ދެން އަޅުގަނޑުގެ އެންމެ ބޮޑު އަމަޒަކީ އަލުން ގައުމީ ޓީމުން ޖާގަ ހޯދުން." ނިއުއާ ގުޅި، އޭނާ ދަނީ ނިއުގެ ފުރަތަމަ 11 އިން ބަރާބަރަށް ޖާގަ ހޯދަމުން ނެވެ. އަދި ލީގްގައި ނިއު ކުޅުނު ފުރތަމަ މެޗުގައި، އޭނާ ވަނީ އޭނާގެ ކުރީގެ ކުޅުން ދައްކާލާފަ އެވެ.
އެންމެ ފަހުން، ގައުމީ ޓީމުން ރިލޭއަށް ޖާގަ ދީފައި ވަނީ، 2015 ވަނަ އަހަރު އިންޑިއަން އޯޝަން އައިލެންޑް ގޭމްސްގަ އެވެ. ރިލޭއަށް ގައުމީ ޓީމުން، ޖާގަ ދިން އިރު، އަފްގާނިސްތާނާއި، ބޫޓާންއާ ދެކޮޅަށް، ނެގި ޓީމުގައި ހިމެނުނު ގްރީން ސްޓްރީޓްގެ ޑިފެންޑަރު ސާއިފް އަހްމަދަށް ފުރުސަތު ދީފައެއް ނުވެ އެވެ. ޕްރިމިއާ ލީގްގައި ކުޅުނު ތިން މެޗުގައިވެސް އޭނާ ކުޅެފައެއް ނުވެ އެވެ.
މާލޭ ލީގާއި، ޕްރިމިއާ ލީގްގައި ކުޅުނު ތިން މެޗުގައިވެސް، މޮޅު ކުޅުމެއް ދެއްކި ބައެއް ކުޅުންތެރިން، ސްކޮޑްގައި ހިމަނާފައެއް ނުވެ އެވެ. އެގޮތުން، ވިކްޓަރީން މާޒިޔާ އަށް ބަދަލުވި، ގައުމީ ޓީމުގެ ކުރީގެ ވައިސް ކެޕްޓަން މުހައްމަދު އާރިފް (ބަކާ) އާއި ގްރީން ސްޓްރީޓްގެ އިބްރާހިމް ރިޒްހާން (ރިޒްކޯ) އަހްމަދު ހަސަން (ކުޑަ އަންމަޑޭ) އަށް ސްކޮޑުން ޖާގަ ދީފައެއް ނުވެ އެވެ. މި ތިން ކުޅުންތެރިންވެސް ވަނީ ލީގްގައި މޮޅު ކުޅުމެއް ދައްކާފަ އެވެ.
އެންމެ ފަހުން އެކުލަވާލި ސްކޮޑްގައި ހިމެނުމަށްފަހު، މިފަހަރު ސްކޮޑުން ފުރުސަތު ލިބިފައި ނުވަނީ، މާޒިޔާގެ ހުސައިން ނިޔާޒު މުހައްމަދު (ބޮކްރީ) އަށެވެ. މިފަހަރުގެ ސްކޮޑުންވެސް، މާޒިޔާގެ އަހްމަދު އިމާޒު (އާއްކޮ) އާއި ޔަޝްފާދު ހަބީބު (މުލަކޭ) އަށް ފުރުސަތު ލިބިފަ އެއް ނުވެ އެވެ.
ގޯލް ކީޕަރުންގެ ގޮތުގައި، ކުރިން ހިމެނި، މާޒިޔާ އާއި ނިއުގެ ޒުވާން ދެ ގޯލްކީޕަރުން ކަމަށްވާ، ނިއުގެ އަބްދުﷲ ޒިމާމް އާއި މާޒިޔާގެ ހުސައިން ޝަރީފްއަށް ފުރުސަތު ދީފައެއް ނުވެ އެވެ. ތިން ވަނަ ކީޕަރެއްގެ ގޮތުގައި މިފަހަރު ފުރުސަތު ދީފައި ވަނީ، ނިއު އަބްދުﷲ ޒިޔަޒަން އަށެވެ.
ގައުމީ ސްކޮޑްގައި ހިމަނާފައިވާ ކުޅުންތެރިން
މާޒިޔާ:
އަސަދުﷲ އަބްދުﷲ (އަސައްކޮ)
މުހައްމަދު އުމޭރު
އަމްދާން އަލީ (އެންޑީ)
މުހައްމަދު އިރުފާން (އިރޭ)
އަސްހަދު އަލީ (އަޑޭ)
ސަމޫހް އަލީ (ސަމުއްޓޭ)
އިސްމާއިލް އީސާ (މެސީ)
ނިއު ރޭޑިއަންޓް:
އަލީ ފާސިރު (ސެންޓޭ)
މުހައްމަދު ރަޝީދު (ހޮކޭ)
އަހްމަދު އަބްދުﷲ (ލިލީ)
ހަމްޒާ މުހައްމަދު (ހަމްޕް)
އަކްރަމް އަބްދުލް ގަނީ (އަކޫ)
ރިލްވާން ވަހީދު (ރިލޭ)
މުހައްމަދު ފައިސަލް - ގޯލްކީޕަރު -
އަބްދުﷲ ޒިޔަޒަން - ގޯލްކީޕަރު -
ގދ. ތިނަދޫ
އަހްމަދު ރިޒްވާން (ރިޒޭ)
އިމްރާން ނަޝީދު (އިންމަ)
ޓީސީ ސްޕޯޓްސް ކުލަބު:
ހަސަން ނާއިޒު (ދާދު)
އިބްރާހިމް ވަހީދު ހަސަން
އަހްމަދު ޒާދު
ށ. މިލަންދޫ
މުހައްމަދު އިމްރާން (ކުޑަ އިމްރާން) - ގޯލްކީޕަރު -
ގްރީން ސްޓްރީޓް:
ޝާފިއު އަހްމަދު (ޝާފީ)
އަހްމަދު ރަޝީދު (އަންމަޑޭ)