ޓެރަރިޒަމާ ދެކޮޅަށް ހިންގި އޮޕަރޭޝަނެއްގައި ދެ ދިވެހިން ހައްޔަރުކޮށްފި

މެލޭޝިއާގައި ޓެރަރިސްޓް ހަމަލާއެއް ދޭން ރާވަމުން ދިޔަ ބައެއް އަތުލައިގަތުމަށް ހިންގި އޮޕަރޭޝަނެއްގައި ދެ ދިވެހިން ހައްޔަރުކޮށްފައިވާ އެ ގައުމުގެ ފުލުހުންނާ ހަވާލާދީ ނޫސްތަކުން ބުނެފި އެވެ.

މެލޭޝިއާގެ ސިޓީއެއް ކަމަށްވާ ޖޯހޯ ބަހްރޫއިން ހައްޔަރުކުރި ދެ ދިވެހިންނަކީ އުމުރުން 29 އަހަރާއި 33 އަހަރުގެ ދެ މީހުންނެވެ. އެ ދެ މީހުންނަކީ އެއާ ކޮންޑިޝަނާ ޓެކްނީޝަނުންގެ ގޮތުގައި މަސައްކަތް ކުރާ ދެ މީހުން ކަމަށް މެލޭޝިއާގެ ނޫސްތަކުގައިވެ އެވެ. އަދި އެ ދެ މީހުންނަކީ އައިއެސްއާ ގުޅުން އޮންނަ ބައެއް ކަމަށްވެސް ރިޕޯޓްތަކުގައިވެ އެވެ. އެމީހުން މަސައްކަތް ކުރަމުން ދިޔައީ މެލޭޝިއާ އާއި ސިންގަޕޫރު ޓްރާންސިޓް ޕޮއިންޓެއްގެ ގޮތުގައި ބޭނުން ކޮށްގެން ސީރިއާއަށް ދިޔުމަށް ކަމަށް ވެސް މެލޭޝިއާގެ ނޫސްތަކުގައި ބުނެފައިވެ އެވެ. ނަމަވެސް މެލޭޝިއާގައި ދޭން ރާވަމުން ދިޔަ ޓެރަރިސްޓް ހަމަލާއާ ދެ ދިވެހިންނާ ސީދާ ގުޅުމެއް އޮތް ކަމެއް ފުލުހުން ބުނެފައެއް ނުވެ އެވެ.

މެލޭޝިއާގައި ދޭން ރާވަމުން ދިޔަ ވަރުގަދަ ޓެރަރިސްޓް ހަމަލާ ނާކާމިޔާބު ކޮށްލައި އެ ގައުމުގެ ފުލުހުން ވަނީ ދެ ދިވެހިންނާއެކު ޖުމްލަ 19 މީހަކު ހައްޔަރުކޮށްފަ އެވެ. އޭގެ ތެރޭގައި ހިމެނީ އިރާގާއި ފަލަސްތީނާއި އިންޑޮނޭޝިއާ އާއި ފިލިޕީންސް އާއި ބަންގްލަދޭޝް މީހުން ހިމެނެ އެވެ. އެ އެންމެން ވެސް ހައްޔަރުކޮށްފައިވަނީ އައިއެސްއާ ގުޅުން އޮންނަ ކަމުގެ ތުހުމަތުގައި މިދިޔަ ޖުލައި މަހުން ފެށިގެން މަލޭޝިއާގެ ފުލުހުން ހިންގަމުން ދިޔަ އޮޕަރޭޝަނެއްގަ އެވެ.

މެލޭޝިއާގެ ފުލުހުން ބުނެފައިވާ ގޮތުގައި އޮޕަރޭޝަން ހިންގާފައިވަނީ އެ ގައުމުގައި ދެ ސަރަހައްދެއްގައި ދޭން ރާވަމުން ދިޔަ ހަމަލާތަކެއް ނާކާމިޔާބު ކޮށްލާށެވެ. އެއީ މެލޭޝިއާގެ މިނިވަން ދުވަހާ ގުޅިގެން ބާއްވާ ރަސްމިއްޔާތެއްގެ ތެރޭގަ އާއި ސައުތުއީސްޓް އޭޝިއަން ގޭމްސް ނިންމުމުގެ ހަފުލާގައި ދޭން ރާވަމުން ދިޔަ ހަމަލާތަކެކެވެ. ހައްޔަރުކޮށްފައިވާ މީހުންނަކީ ސީދާ ހަމަލާއާ ގުޅުން އޮންނަ ބައެއް ކަމެއް އެ ގައުމުގެ ފުލުހުން ބުނެފައެއް ނުވެ އެވެ.