ރެފްރީންގެ މައްސަލަތަކުގައި ކޮންމެ ދުވަހަކު ތަކުރާރު ވަނީ އެއްމައްސަލަތަކެއް ކަމަށާއި މައްސަލަ ދިމާވާ ކޮންމެ ދުވަހަކު ހިންދިރުވާލާފަ ދެވެން ނެތް ކަމަށް ގްރީންސްޓްރީޓްގެ ކޯޗް ސޮބާހް މުހައްމަދު ބުނެފި އެވެ.
ދިވެހި ޕްރިމިއާ ލީގްގައި މާޒިޔާ އާއި ގްރީން ސްޓްރީޓް މެޗު ދެވަނަ ހާފުގެ ހަތް ވަނަ މިނެޓްގައި ހުއްޓާލީ ރެފްރީއާ މެދު، ގްރީންގެ ކުޅުންތެރިން ހިތްހަމަ ނުޖެހި، މައްސަލަ ހޫނުވުމުން، ރެފްރީ ދަނޑުން ފައިބައިގައިގެން ދިއުމުން ނެވެ.
ރޭގެ މެޗުގެ ފުރަތަމަ ހާފުގައި ކަށިގަނޑު ހިފައިގެން ދަނޑަށް ނިކުތީ، މެޗަށް ހަމަޖައްސާފައިވާ ރެފްރީ އާދަމް ފަޒީލެވެ. ނަމަވެސް ދެ ވަނަ ހާފުގައި ކަށިގަނޑު ހިފައިގެން ދަނޑަށް ނިކުތީ ދެ ވަނަ އެސިސްޓެންޓް ރެފްރީ ނިއުޝާދު މުހައްމަދެވެ.
ސޮބާ ބުނީ، ނިއުރޭޑިއަންޓާ ދެކޮޅަށް މިދިޔަ މަހު 18 ވަނަ ދުވަހު ގްރީން ކުޅުނު މެޗުގައިވެސް ރެފްރީއަކަށް ނެރުނީ ރޭ ގެ މެޗުގައި ދެ ވަނަ ހާފުގައި ނެރުނު ރެފްރީ ކަމަށާއި އެ ދުވަހުވެސް މައްސަލަ ފެންމަތިވި ކަމަށެވެ.
"އަޅުގަނޑުމެން މެޗަކަށް ނިކުންނަނީ ވަރަށް ތައްޔާރުވެގެން ވަރަށް ގިނަ ހަރަދު ކޮށްގެން މެޗަށް ހާއްސަކޮށް ކުޅުންތެރިން ވަރަށް ބުރަކޮށް މަސައްކަތް ކުރޭ މެޗު އޮންނަ ދުވަހު މެޗަށް ވަރަށް ބޮޑަށް ތައްޔާރުވޭ،" ސޮބާ ބުންޏެވެ. "ނަމަވެސް ރެފްރީންގެ ފަރާތުން އެ ތައްޔާރީތަކެއް ނުފެނޭ އެ މެޗަށް [ނިއު އާ ދެކޮޅަށް ކުޅުނު މެޗަށް] ވެސް އެ ރެފްރީ އައީ އެދުވަހު އޮތް ކިޑްސް ފުޓްބޯލް ފެއިސްޓާގައި ހަރަކާތްތެރި ވުމަށް ފަހު ހެނދުނުން ފެށިގެން މެންދުރާ ހަމަޔަށް އެތާންގައި އުޅުމަށްފަހު ކިހިނެއް ހަވީރު އޮންނަ މެޗަކަށް ރަނގަޅަށް ސަމާލުކަން ދޭނީ."
އޭނާ ބުނީ، ނިއުގެ މެޗަށްފަހުވެސް، ރެފްރީގެ ނިންމުތަކާ މެދު، ލިޔުމުން ޝަކުވާ ހުށަހަލާފައިވާނެ ކަމަށާއި ނަމަވެސް އެކަންކަން ހިނގާތަން ނުފެންނަ ކަމަށެވެ.
"ކުޅުންތެރިން ގޯސް ހެދުމުން ކުލަބު ތަކުގެ އޮފިޝަލުން ގޯސް ހެދުމުން އެ ކުޅުންތެރިޔަކާ މެދު ނުވަތަ އެ އޮފިޝަލަކާ މެދު ޑިސިޕްލިނަރީ ފިޔަވަޅު އެޅުމަކީ މައްސަލަ އެއް ނޫން،" ކަންބޮޑުވުންތަކާއެކު ސޮބާ ހިއްސާ ކުރި އެވެ. "ނަމަވެސް ރެފްރީން ގޯސް ހެދުމުން އެ މައްސަލަ ހުށަހެޅުމުންވެސް މައްސަލަ ބަލައި އެ ރެފްރީއަކާ މެދު ފިޔަވަޅު އެޅިގެނެއް ނުދޭ."
މެޗުގެ ރެފްރީ އާދަމް ފަޒީލްގެ ބަދަލުގައި، ދެ ވަނަ ހާފުގައި، ދެ ވަނަ އެސިސްޓެންޓް ރެފްރީ މެޗަށް ނެރުމަކީ ކުރެވިގެންވާނެ ކަމެއް ނޫން ކަމަށް ސޮބާ ބުންޏެވެ.
"މެޗުގެ ރެފްރީއަށް މެޗު ކުރިއަށް ނުގެންދެވޭ ހާލަތެއް އަތުވެއްޖެ ނަމަވެސް، ބަދަލުގައި ދެ ވަނަ އެސިސްޓެންޓް ރެފްރީ އެރިދާނެ ބާއޭ އަޅުގަނޑަށް ސުވާލު އުފެދޭ، ރެފްރީގެ ބަދަލުގައި އަރަން ޖެހުނަސް އަރަން ޖެހޭނެ ކަމަށް އަޅުގަނޑަށް ގަބޫލު ކުރެވެނީ، ފޯތު އޮފިޝަލު ނުވަތަ ސީނިއާ އެސިސްޓެންޓް ރެފްރީ." ސޮބާ ސުވާލު އުފެއްދި އެވެ.
އޭނާ ބުނީ، އެ ރެފްރީ އަރައިގެން ޖެހުނު މައްސަލަތަކާއެކު މެޗު ކުޅެން ބޭނުންނުވުން އެއީ މުޅި ޓީމުގެ ނިންމުމެއް ކަމަށެވެ.