އުރީދޫ ދިވެހި ޕްރިމިއާ ލީގުގައި މިއަދު ދިހަ މީހުންނާއެކު މެޗުގެ ބޮޑު ބައި ކުޅުނު މަހިބަދޫ ސްޕޯޓްސް ކްލަބް އަތުން 3-0 އިން މޮޅުވެ، ބީޖީ ސްޕޯޓްސް ކްލަބް ލީގުގައި ފެށުން ރަނގަޅުކޮށްފި އެވެ.
މެޗުގެ 16 ވަނަ މިނިޓުގައި ބީޖީ އަށް ލީޑު ހޯދައިދިނީ އިބްރާހިމް ހަމްދާނެވެ. ބީޖީ އަށް ކުޅޭ ޕާކިސްތާންގެ ގައުމީ ޓީމުގެ ފޯވަޑް ސައުދުﷲ ދިން ބޯޅައެއްގައި، ޕެނަލްޓީ އޭރިޔާ ތެރެއިން ބީޖީގެ އިބްރާހިމް ޝިޔާމް (ކުޑަތޮއްޑޫ) ގޯލާ ދިމާލަށް ފޮނުވާލި ބޯޅަ ދަނޑީގަ ޖެހިފައި ނިކުތް ވަގުތު، ހަމްދާން ވަނީ ގޯލަށް ބޯޅަ އަމާޒުކޮށްލައިފަ އެވެ.
މަހިބަދޫ ދިހަ ކުޅުންތެރިންނަށް މަދުވީ މެޗުގެ 34 ވަަނަ މިނިޓުގައި އެ ޓީމުގެ ބިދޭސީ ޑިފެންޑަރު ސަނީ އަށް ރަތްކާޑު ދެއްކުމުންނެވެ. ސަނީ އަށް ރެފްރީ ރަތްކާޑު ދެއްކީ ހަމްދާނަށް ކުރި ފައުލަކާ ގުޅިގެންނެވެ.
ދެވަނަ ހާފުގައި މަހިބަދޫން މެޗުގެ ނަތީޖާ އެއްވަރުކުރަން މަސައްކަތްކުރި ނަމަވެސް، ބީޖީން ލީޑު ފުޅާކުރީ މެޗުގެ 81 ވަނަ މިނިޓުގައި ސްޕެއިންގެ ފޯވަޑް ޑޭވިޑް ކަރްމޯނާ ޖެހި ލަނޑުންނެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އަބްދުﷲ މުއާޒް (އޮޓޯ) ހުރަސްކޮށްލި ބޯޅަ، ޕެނަލްޓީ އޭރިޔާ ތެރެއިން ޑޭވިޑް ވަނީ ގޯލަށް އަމާޒުކޮށްލައިފަ އެވެ.
ބީޖީގެ ތިން ވަނަ ލަނޑު މެޗުގެ ފަހު މިނިޓުގައި ޖެހީ އޮޓޯ އެވެ. މަހިބަދޫގެ ދެ ކުޅުންތެރިން ކައިރިން ނައްޓާލުމަށް ފަހު، އޮޓޯ ތިރިތިރިން ފޮނުވާލި ޝޮޓް އަމާޒުވީ ގޯލުގެ ތިރީ ކަނަށެވެ.
މެޗަށް ފަހު ބީޖީގެ ކޯޗު މުހައްމަދު ޝާޒްލީ ބުނީ މެޗުގެ ނަތީޖާއާމެދު ވަރަށް ހިތްހަމަޖެހޭ ކަމަށެވެ.
"ފުރަތަމަ މެޗު ވީމަ ހަމަ ނުކުތީ ތިން ޕޮއިންޓް ހޯދަން. ކުޅުންތެރިންގެ މަސައްކަތާއި، ކުރި ހިތްވަރާމެދު ވަރަށް ހިތްހަމަޖެހޭ. ފުރަތަމަ މެޗު ވީމަ ފެންނާނެ މިސްޓޭކްތައް. އެކަމަކު އެކަންތައްތައް ރަނގަޅުވާނެ،" ޝާޒްލީ ބުންޏެވެ.
މަހިބަދޫގެ ކޯޗު ބަލްގޭރިއާގެ ޔޯރްދާން އިވަނޯފް ސްޓޮއިކޯފް ބުނީ މެޗުން ބަލިވި އެންމެ ބޮޑު އެއް ސަބަބަކީ ދިހަ ކުޅުންތެރިންނާއެކު ކުޅެން ޖެހުން ކަމަށެވެ.
"3-0 އިން ބަލިވީމަ، އޭގެ މާނައަކީ އަހަރެމެންގެ ކުޅުން މި މެޗުގައި ދަށޭ. އެންމެ ބޮޑު މައްސަލައަކަށްވީ ދިހަ ކުޅުންތެރިންނާއެކު ކުޅެންޖެހުން. އެއީ ބޭކާރު ކާޑެއް. އަހަރެމެން ރަނގަޅުކުރަންޖެހޭ ވަރަށް ގިނަ ކަންތައްތައް އެބަހުރި. ފުރަތަމަ މެޗުން ބަލިވުމަކީ މާ ބޮޑު މައްސަލައެއް ނޫން. އަހަރެމެންނަށް ކުރިއެރުން ހޯދޭނެ،" ސްޓޮއިކޯފް ބުންޏެވެ.