ސުޕަސްޓާ ސަލްމާން ޚާނާ އެކު "ކިކް" ގައި ފެނިގެންދިޔަ ބަތަލާ ޖެކުއަލީން ފާނެންޑޭޒަށް ވަނީ ސަލްމާނާ އެކު "ރޭސް 3" ގެ ބަތަލާގެ ރޯލު ކުޅެން ހަމަޖެހިފަ އެވެ.
"ރޭސް 3" ކުޅެން ޖެކުއަލީން އެއްބަސްވުމުން އޭނާ އަށް ވަނީ "ކިކް 2" ގެ ބަތަލާގެ ރޯލު ސަލްމާނާ އެކު ކުޅެން ލިބުނު ފުރުސަތު ދޫކޮށްލާފަ އެވެ.
ދެހާސް ސާދަ ވަނަ އަހަރު ނިކުތް ކާމިޔާބު ފިލްމު "ކިކް" ގެ ދެވަނަ ފިލްމެއް އުފައްދަން ނިންމައި، ފިލްމުގެ ޑައިރެކްޓަރު ބޭނުންވީ ސަލްމާނާއި ޖެކުއަލީން ދެވަނަ ފިލްމުގެ ލީޑްރޯލުގައި ވެސް ހިމަނާށެވެ.
ނަމަވެސް ޖެކުއަލީން މާ ކުރިން "ރޭސް 3" ކުޅެން އެއްބަސްވުމުން "ކިކް" އުފައްދާ ސާޖިދް ނަޑިއަޑްވާލާ ވަނީ ސަލްމާނާ އެކު އެ ސިލްސިލާގެ ދެވަނަ ފިލްމުގައި މުޅިން އާ މޫނެއް ދައްކާށެވެ. އެގޮތުން އެ ފިލްމުގެ ބަތަލާގެ ރޯލު މިހާރު ބޮލީވުޑްގެ އެންމެ ކާމިޔާބު ބަތަލާ ދިޕިކާ ޕަދުކޯނަށް ވަނީ ހުށަހަޅާފަ އެވެ.
"ސާޖިދް ބޭނުންވަނީ ދެވަނަ ފިލްމު ވަރަށް ބޮޑު ފިލްމެއްގެ ގޮތުގައި އުފައްދަން، އޭނާ ބޭނުންވަނީ ސަލްމާނާ އެކު މުޅިން އާ ތަރިއެއް ބަތަލާގެ ރޯލު ކުޅެން،" ފިލްމުގެ ފަރާތުން ވާހަކަދެއްކި މީހަކު ބުނެފައިވެ އެވެ.
"އޯމް ޝާންތީ އޯމް" އިން ޝާހްރުކް ޚާނާ އެކު 2007 ވަނަ އަހަރު ބޮލީވުޑަށް ނިކުތުމުގެ ކުރިން ސަލްމާން ވަނީ ދިޕިކާ އަށް އޭނާގެ ފުރަތަމަ ފިލްމު ހުށަހަޅާފަ އެވެ. ނަމަވެސް އެ ފަހަރު ވެސް ދިޕިކާ ހިޔާރު ކުރީ ޝާހްރުކްގެ ފިލްމެކެވެ.
މި އަހަރުގެ ޖޫން މަހު ނިކުތް ސަލްމާންގެ ފިލްމު "ޓިއުބްލައިޓް" ގެ ބަތަލާގެ ރޯލު ވެސް ދިޕިކާ އަށް ހުށަހެޅި އެވެ. ނަމަވެސް އެ ރޯލަކީ ޗައިނާގެ މީހެއްގެ ރޯލު ކުޅެން ޖެހޭ ބަޔަކަށް ވެފައި ރޯލު މާ ކުޑަވުމުން ދިޕިކާ ވަނީ އެ ފިލްމު ދޫކޮށްލާފަ އެވެ.
"ޓްރިޕަލް އެކްސް: ދަ ރިޓާން އޮފް ޒެންޑާ ކޭޖް" އާއެކު ހޮލީވުޑް ފިލްމުތައް ވެސް ކުޅެން ފަށާފައިވާ ދިޕިކާ މިހާރު ކުޅެމުން އަންނަ . އެންމެ ހިންދީ ފިލްމެކެވެ. އެއީ ޑައިރެކްޓަރު ސަންޖޭ ލީލާ ބަންސާލީ ތާރީހީ ލޯބީގެ ވާހަކައެއްގެ މައްޗަށް އުފައްދާ "ޕަދްމާވަތީ" އެވެ.
އަދި އެ ފިލްމަށް ފަހު އޭނާ ދެން ކުޅެން ނިންމާފައިވާ ހިންދީ ފިލްމަކީ ވިޝާލް ބަރްދްވާޖްގެ "ސަޕްނާ ދީދީ" އެވެ.