ޔޫކްރޭންގެ ޑްރިފްޓް ރޭސިން ޗެމްޕިއަން އަދި މަޝްހޫރު ރެޑްބުލްގެ އެތުލީޓް އެލެކްސަންޑާ ގްރިންޗުކް މިއަދު ރާއްޖެ އަތުވެއްޖެ އެވެ.
ޔޫކްރޭންގެ ޑްރިފްޓް ޗެމްޕިއަންކަން ދެ ފަހަރު ހޯދައިފައިވާ ގްރިންޗުކް މިއަދު ރާއްޖެ މިއައީ ރާއްޖޭގައި ހުނަރު ދައްކާލުމުގެ ޝޯތަކެއް ބޭއްވުމަށެވެ. މީގެ ތެރެއިން ބައެއް ޝޯތައް އޮންނާނީ މި މަހުގެ 1 އިން 2 އަށް ހުޅުމާލޭގައި ބާއްވާ ޕިސްޓަން މޮޓޯ ރޭހުގެ ތެރެއިންނެވެ. މީގެ އިތުރުން ރާއްޖޭގައި މޮޓޯ ރޭސިންގައި ހަރަކާތްތެރިވާ ފަރާތްތަކަށް ގްރިންޗުކް ވޯކްޝޮޕެއް ވެސް ބާއްވާނެ އެވެ.
"މިހާރު ރާއްޖެ އަކީ ޔޫކްރޭންގައި ވަރަށް މަޝްހޫރު ގައުމެއް. އެހެންވެ އަހަރެން ވަރަށް އުފާވެއްޖެ މި ގައުމަށް އާދެވުނީމަ،" ގްރިންޗުކް ބުންޏެވެ. "ރާއްޖޭގައި އަހަރެންގެ ހުނަރު ދައްކާލުމުގެ ޝޯތައް ބޭއްވުމަށް މިހުރީ ކެތްމަދުވެފައި."
ގްރިންޗުކް ބުނީ ރާއްޖޭގެ މޮޓޯ ރޭސިން ކޮމިނުއިޓީއާ ބައްދަލުކޮށް، އޭނާގެ ތަޖުރިބާގެ އަލީގައި ރާއްޖޭގައި މޮޓޯ ރޭސިންގައި ހަރަކާތްތެރިވާ މީހުން ކުރިއެރުވުމުގައި އެހީތެރިވުމަށް އޭނާ ބޭނުންވާ ކަމަށެވެ.
"ރާއްޖެ އަކީ ވަރަށް ކުޑަ ގައުމެއް. އެހެންވީމަ އަހަރެން ވަރަށް ބަލާލާ ހިތްވޭ ރާއްޖޭގެ މޮޓޯ ރޭސިން ކޮމިނުއިޓީ އިން މިކަންކުރާ ގޮތް. ޕިސްޓަން މޮޓޯ ރޭސް ވަރަށް ބަލާލާހިތްވޭ. އަދި ރާއްޖޭގައި މޮޓޯ ރޭހުގައި ވާދަކުރާ ޑްރިވަރުންނަށް އަހަރެންގެ ފަރާތުން އެހީތެރިކަން ދޭން ބޭނުން،" ޔޫކްރޭންގެ ޑްރިފްޓް ރޭސިންގައި އެންމެ ކާމިޔާބު ޑްރައިވަރު ކަމަށްވާ ގްރިންޗުކް ބުންޏެވެ.
ޑްރިފްޓް ރޭސިން އަށް ގްރިންޗުކް ހިތްޖެހުނީ ފާސްޓް އެންޑް ފިއުރިއަސް ފިލްމުންނާއި ނީޑް ފޯ ސްޕީޑް ވީޑީއޯ ގޭމްތަކުންނެވެ. ޑްރިފްޓް ރޭސިން އަށް ޖެހުނު ލޯތްބާއެކު، 2006 ވަނަ އަހަރު އާ ކާރެއް ގަތުމަށް ފަހު، 2007 ވަނަ އަހަރު އޭނާ ވަނީ މުބާރާތްތަކަށް ނިކުމެފަ އެވެ. އެ ހިސާބުން ފެށިގެން އޭނާ ވަނީ ޔޫކްރޭނާއި ދުނިޔޭގެ އެހެން ކަންކޮޅުތަކުގައި އޮންނަ ޑްރިފްޓް ރޭސްތަކުގައި ބައިވެރިވާން ފަށައިފަ އެވެ.
ގްރިންޗުކް އެންމެ ފުރަތަމަ ކާމިޔާބު ލިބުނީ 2008 ވަނަ އަހަރެވެ. ދެހާސް އެގާރަ ވަނަ އަހަރު ނިމުނުއިރު، އޭނާ ވަނީ ތިން ފަހަރު ޔޫކްރޭންގެ ޗެމްޕިއަންކަން ހޯދައިފަ އެވެ.
ދެހާސް ތޭރަ ވަނަ އަހަރު ބާއްވަން ފެށި ޕިސްޓަން މޮޓޯ ރޭހަކީ ރާއްޖޭގައި ބާއްވާ އެންމެ ބޮޑު މޮޓޯ ރޭސް މުބާރާތެވެ. އެ މުބާރާތް މި އަހަރު ހާއްސަވެގެންދާނީ ގްރިންޗުކްގެ ހުނަރު ދައްކާލަން ބާއްވާ ޝޯތަކުންނެވެ.