ޒުވާން ދެތަރިން ކަމަށްވާ ރަންވީރު ސިންގް އާއި އާލިއާ ބަޓް އެކުގައި ފެނިގެންދާ ފުރަތަމަ ފިލްމު "ގަލީ ބޯއި" އަކީ "ޒިންދަގީ ނާ މިލޭގޯ ދޮބާރާ" ގެ ޑައިރެކްޓަރު ޒޯޔާ އަހްތަރުގެ ފިލްމެކެވެ.
މުމްބާއި އަށް ނިސްބަތްވާ ރެޕަރުންގެ ހަޔާތް ފެނިގެންދާ މި ފިލްމުގެ ޝޫޓިން ކުރިން ފަށަން އޮތީ ނޮވެމްބަރު މަހުގެ ތެރޭގަ އެވެ. ނަމަވެސް ރަންވީރާއި އާލިއާ އެހެން ފިލްމުތަކުގައި މާބޮޑަށް ބިޒީވުމުގެ ސަބަބުން މި ފިލްމުގެ މަސައްކަތް ފަސްކޮށްފައިވާ ކަމުގެ ވާހަކަ އަންނަނީ ދެކެވެމުންނެވެ.
އާލިއާ މިހާރު މޭގްނާ ގުލްޒާރުގެ "ރާޒީ" ޝޫޓްކުރަމުން އަންނައިރު އެ ފިލްމު ނިމޭއިރަށް އޭނާ ރަންބީރު ކަޕޫރާއެކު ކުޅޭ "ޑްރެގަން" ގެ ޝޫޓިން ފަށާނެ އެވެ. އަދި ރަންވީރު މިދިޔަ ނޮވެމްބަރުގައި ކުޅެން ފެށި ތާރީހީ ލޯބީގެ ފިލްމު "ޕަދްމާވަތީ" ގެ ޝޫޓިން އަދިވެސް ނުނިމޭއިރު އެ ފިލްމު ނިމުމުން ދެން އޭނާ ފަށާނީ ކަޕިިލް ދޭވްގެ ބައޮޕިކްގެ މަސައްކަތާއި ރޯހިތު ޝެޓީ އުފައްދާ ފިލްމެއްގެ މަސައްކަތެވެ. އަދި "ޕަދްމާވަތީ" ނޮވެމްބަރުގައި ރިލީޒް ކުރާއިރު އެ ފިލްމު ޕްރޮމޯޓް ކުރުމުގެ ހަރަކާތްތަކުގައި ވެސް ރަންވީރު ބައިވެރިވާނެ އެވެ.
މި ދެތަރިން އަތުގައި މިހާރު ހުރި ފިލްމުތަކުގެ ގޮތުން މި އަހަރުގެ ނިމުމުގެ ކުރިން "ގަލީ ބޯއިސް" ގެ މަސައްކަތް ފެށޭނެހެން ހީނުވާތީ ޒޯޔާ ވަނީ އޭނާގެ ފިލްމުގެ ޝޫޓިން އެ ދެތަރިންނަށް ވަގުތު ވަންދެން ލަސްކޮށްފަ އެވެ.
"ގަލީ ބޯއި" އަކީ އާލިއާ އާއެކު ރަންވީރު ފެނިގެންދާ ފުރަތަމަ ފިލްމު ނަމަވެސް މި ދެތަރިން ވަނީ މީގެ ކުރިން އެކުގައި އިޝްތިހާރުތަކުން ފެނިފަ އެވެ.